ރިސޯޓްތަކަށް ލިބޭ އާމްދަނީގެ ވަކި ޕަސެންޓެއްގެ ޑޮލަރު މާރުކުރަންޖެހޭގޮތަށް އެކުލަވާލާފައިވާ ބިލެއްގެ ޑްރާފްޓަށް އާންމުންގެ ހިޔާލު ހޯދަން ހުޅުވާލައިފި އެވެ.

"ބޭރު ފައިސާއާބެހޭ ބިލް"ގެ ޑްރާފްޓްގައިވާ ގޮތުން އަހަރެއްގެ ތެރޭގައި ވިހި މިލިއަން އެމެރިކާ ޑޮލަރަށް ވާ އަދަދަށް ބޭރު ފައިސާ ލިބޭ ވިޔަފާރިތައް އެ ފަރާތްތަކަށް ލިބޭ ބޭރުފައިސާގެ އާމްދަނީ ރާއްޖޭގެ ބޭންކު އެކައުންޓަކަށް ޖަމާކުރަންޖެހޭނެ އެވެ.

އެ ޑްރާފްޓްގައި ވަނީ ރިސޯޓްތަކުން ބޭރުފައިސާގެ އާމްދަނީން 25 ޕަސެންޓަށް ވުރެ ބޮޑުނުވާ ގޮތަށް އެމްއެމްއޭއިން ހަދާ ގަވާއިދެއްގެ ތެރެއިން މާރުކުރަންވާނެ ކަމަށެވެ.

މީގެއިތުރު ބޭރު ފައިސާ މާރުނުކުރަންޖެހޭ ހާލަތްތައް ވެސް އެ ޑްރާފްޓްގައި ބަޔާންކޮށްފައިވެ އެވެ. އެއީ

  • ސައުވީސް ގަޑިއިރު ހޭދަނުކުރާ ޓޫރިސްޓުންނަށް
  • ދެ އަހަރުން ދަށުގެ ކުދިން
  • ހިލޭ ނުވަތަ ކޮމްޕްލިމެންޓަރީކޮށް ތިބޭ ފަރާތްތައް

މި ބިލް މަޖިލީހަށް ހުށަހަޅައި ބޭރު ފައިސާ މާރުކުރުމުގެ އުސޫލު މި ބިލްގައިވާގޮތަށް ފާސްވެއްޖެނަމަ، ބޭރު ފައިސާ މާރުކުރަންޖެހޭނީ ލިބޭ އާމްދަނީގެ ވަކި ޕަސެންޓެކެވެ. އެއިރުން މިހާރު އޮތް އުސޫލުކަމަށްވާ ކޮންމެ ޓޫރިސްޓެއްގެ ބޮލަށް 500 ޑޮލަރު މާރުކުރަން ޖެހޭޖެހުން ނިމުމަކަށް އައީ އެވެ.

ޑޮލަރު މާރުކުރުމުގެ އުސޫލަށް މިފަދަ ބަދަލުތަކެއް ގެންނަން އުޅޭއިރު، މި ސަރުކާރަށް އެއް އަހަރު ފުރުން ފާހަގަކުރަން ބޭއްވި ޖަލްސާގައި ރައީސް ޑރ. މުހައްމަދު މުއިއްޒު ވިދާޅުވީ ބޭރު ފައިސާ މާރުކުރާ ގަވާއިދު ބަދަލުނުކުރާނެ ކަމަށެވެ. އަދި 500 ޑޮލަރު ޖެހޭނީ މާރުކުރަން ކަމަށް ވިދާޅުވެ އެމަނިކުފާނު ވިޔަފާރިވެރިންނަށް ގޮންޖެއްސެވި އެވެ. އެ ޖަލްސާގައި އެމަނިކުފާނު ހަރުއަޑުން ތަކުރާރުކޮށް ވަނީ 500 ޑޮލަރު މާރުކުރަން އޮންނަ އޮތުން ބަދަލެއް ނުކުރާނެ ކަމަށެވެ.