އަންނަ އަހަރަށް ފާސްކުރި ބަޖެޓްގައި ރާއްޖޭގެ ރަށްރަށުގައި ހިންގާ ޕްރޮޖެކްޓުތަކަށް ބަޖެޓްގައި ކަނޑައަޅާފައިވާ ފައިސާ ހަރަދު ކުރާނެ ގޮތުގެ ތަރުތީބެއް ނޭނގޭ ކަމަށް އިންފްރާސްޓްރަކްޗާ މިނިސްޓަރު އަބްދުﷲ މުއްތަލިބު މިއަދު ވިދާޅުވެއްޖެ އެވެ.

މިނިސްޓްރު މިހެން ވިދާޅުވެފައިވަނީ މަޖިލީހުގައި މިއަދު މެންބަރުން ކުރެއްވި ސުވާލުތަކަށް ޖަވާބު ދެއްވަމުންނެވެ.

"އަޅުގަނޑަށް މިވަގުތު ބަޖެޓުގެ ޕްރޮޖެކްޓުތައް ހިންގަން ކަނޑައަޅާފައި އޮތް ތަރުތީބެއް ދަންނަވާކަށް ނޭނގޭ. އެއީ މި ދެންނެވި ގޮތަށް ނީޑް ބޭސިސް އާއި އެ ކަން ކުރަންޖެހޭ ތަރުތީބަށް ބަލާފައި ކުރިއަށް ގެންދާނީ، ދެން އޭގެ ތަފުސީލު އަޅުގަނޑަށް ގަބޫލު ކުރެވެނީ ވީހައިވެސް އަވަހަކަށް މަޖިލީހަށް ސަބްމިޓް ކުރާނެ ކަމަށް ސަރުކާރުން އެކަން ކަނޑައަޅައި ފައިނަލް ކޮށްފައި،" މުއްތަލިބު ވިދާޅުވި އެވެ.

މިހާރު ހުއްޓިފައިވާ ޕްރޮޖެކްޓްތަކާއި އަލަށް ފަށާ ޕްރޮޖެކްޓްތައް ދެން ފަށާނީ އިސްކަންދޭ ތަރުތީބަކުންކަން މިނިސްޓަރު ވިދާޅުވި އެވެ. އެގޮތުން ތަރުތީބެއް ކަނޑައެޅުމުގައި ބަލާނީ އެންމެ ގިނަ ރައްޔިތުންނަށް ފައިދާ ލިބޭނެ މަޝްރޫއުތަކަށް ކަމަށް ވެސް މިނިސްޓަރު ވިދާޅުވި އެވެ،

މިއަދު ފާސްކުރި ބަޖެޓްގައި އަންނަ އަހަރު ހިންގަން ހަަމަޖައްސާފައިވާ އެއްވެސް ޕްރޮޖެކްޓެއްގެ ތަފްސީލެއް ނެތެވެ. ބަޖެޓް ފާސްކުރުމުގެ ކުރިން އިދިކޮޅު މެންބަރުންނާއި އާންމުންވެސް މިއީ ކޮރަޕްޝަންއަށް މަގުފަހިކުރަން ކުރާ ކަމެއް ކަމަށް ބުނެ ސޯޝަލްމީޑިޔާގައި މިކަމާ ދެކޮޅަށް އަޑުއުފާލަފަ އެވެ.