ށ. ކޮމަންޑޫގައި ފެނަކައިން ގޭގޭގައި ސްމާޓް މީޓަރު ހަރުކޮށް ކަރަންޓްގެ ހިދުމަތް ދޭން ފެށުމާއެކު މީހުން ދިރިނޫޅޭ ގެއަކަށް 400،000ރ. އަށް ވުރެ ބޮޑު ކަރަންޓް ބިލެއް ފެނަކައިން ފޮނުވައިފި އެވެ.

ސޯޝަލް މީޑިއާގައި ދައުރުވަމުންދާ އެ ބިލުގައިވާގޮތުން އެ ގޭގެ ބިލަށް ޖުމްލަ 412،648 ރުފިޔާ އަރާފައިވެ އެވެ.

ށ. ކޮމަންޑޫގައި މީހުން ނޫޅޭތާ 2 މަސްވީ ގެއަކަށް މިމަހު ފޮނުވި ކަރަންޓް ބިލް

އެރަށުން ވާހަކަ ދެއްކި މީހަކު ބުނިގޮތުގައި އެ ގޭގައި މީހުން ނޫޅޭތާ ދެ މަސް ވެފައިވާ ކަމަށެވެ. ނަމަވެސް އެވަރުގެ ބޮޑު ބިލެއް ލިބިފައި މިވަނީ ދާދިފަހުން އެރަށު ގެެތަކުގެ ކަރަންޓް މީޓަރު ސްމާޓް މީޓަރަށް ބަދަލުކޮށްފައިވަނިކޮށް ކަަމަށް އޭނާ ބުންޏެވެ.

މިކަމާ ގުޅޭގޮތުން ފެނަކަގެ ބަހެއް އަދި ލިބޭ ގޮތް ވަނީ ނުވެފަ އެވެ.

ފެނަކައިން އަންނަނީ ރާއްޖޭގެ ގިނަ ރަށްތަކެއްގައި ފެނާއި ކަރަންޓްގެ ހިދުމަތް ދެމުންނެެވެ. މާލެ ސަރަހައްދުގެ ގެތަކުގައި ވެސް މި މަހު ވެސް ކަރަންޓް ބިލުތައް ބޮޑުވެ، ގިނަ ބަޔަކު ދަނީ ޝަކުވާ ކުރަމުންނެވެ. މާލެ ސަރަހައްދަށް ކަރަންޓް ފޯރު ކޮށްދެނީ ސްޓެލްކޯއިންނެވެ.