ރައްޓެހިންނާއި ތިމާގެ މީހުންގެ ތެރޭގައި ޓެކްސްޓް މެސެޖެއް ލިބޭއިރަށް އެއަށް އަވަހަށް ޖަވާބުދޭ މީހުން ތިބޭކަން ފާހަގަވާނެ އެވެ. އެމީހުން އެގޮތަށް ކަންތައް ކުރަނީ ކީއްވެގެންކަން ސައިކޮލޮޖީގެ އެހީގައި މިހާރު ވަނީ ދެނެގަނެވިފަ އެވެ.
އެއީ މަލްޓިޓާސްކާސް އަދި މީހުންނާ ގުޅޭ މީހުންގެ އިހްސާސް ދަންނަ މީހުން
ސައިކޮލޮޖިސްޓުން ބުނާގޮތުގައި ފޯން މެސެޖަށް އަވަހަށް ޖަވާބުދޭ މީހުންނަކީ "މަލްޓި ޓާސްކާސް" އެވެ. ނުވަތަ އެއްފަހަރާ އެތައް ކަމެއް ކުރުމުގެ ގާބިލުކަން ލިބިފައިވާ ބައެކެވެ. އެމީހުންނަށް ފަސޭހަކަމާއެކު އެއް މަސައްކަތުން އަނެއް މަސައްކަތައް ބަދަލުވާން ފަސޭހަވާނެ އެވެ.
އެމީހުންގެ ފާހަގަވާ ދެވަނަ ސިފައަކީ މީހުންނާއި ގުޅުން ބަދަހިކުރުމަށް ބޭނުންވާ މީހުން ކަމަށް އެމީހުން ވުމެވެ. ސައިކޮލޮޖިސްޓުން ދެކޭގޮތުގައި އެމީހުން މެސެޖަށް އަވަހަށް ޖަވާބުދެނީ އަނެކާއަކީ މުހިންމު މީހެއް ކަމަށް ދެކޭތީ އެވެ.
އަވަހަށް މެސެޖަށް ޖަވާބުދޭ މީހުންނަކީ އަމިއްލަ އިހްސާސާއި އެހެން މީހުންގެ އިހްސާސްތައް ދަންނަ އަދި މީހުންގެ އިހްސާސަތަކަށް ކަމޭހިތާ މީހުންނެވެ. އެމީހުން މެސެޖުގައި ހުންނަ އިހްސާސް ފަސޭހައިން ދެނެގަނެ އެންމެ އެކަށޭނަ ޖަވާބު ދެ އެވެ. މިސާލަކަށް އެމީހުންނަށް ލިބުނު މެސެޖު ފޮނުވި މީހާ ހުރި ހާލަތު ދެނެގަނެ އެވެ. އެއީ އިމަޖެންސީއެއްކަމާއި ނުވަތަ ނޫންކަން ވެސް އެމީހުން މެސެޖުން ކިޔުމާއެކު ފާހަގަކުރާކަން ސައިކޮލޮޖިސްޓުން ބުނެ އެވެ.
ސައިކޮލޮޖިސްޓުން ބުނާގޮތުގައި އަވަހަށް އެމީހުންނަށް އެހެން މީހުންގެ އިހްސާސްތައް ދެނެގަނެވޭތީ އެހެން މީހުންނާ އޮންނަ ގުޅުން ރަނގަޅުވާނެ އެވެ. އަދި ވަޒީފާގެ ކުރިއެރުން ވެސް އެފަދަ މީހުންނަށް ފަސޭހައިން ލިބޭނެ އެވެ.
އެއީ ތަރުތީބުން ކަންކަން ކުރާނެ ކަންކަމާ އިސްނަގާނެ ބައެއް
ކަންކަން ތަރުތީބުން ބެހެއްޓުމަކީ އެފަދަ މީހުންގެ ކިބައިގައި ހުންނަ ސިފައެއް ކަމުގައި ވަނީ ފާހަގަވެފަ އެވެ. ސައިކޮލަޖިސްޓުން ބުނާގޮތުގައި މެސެޖަށް އަވަހަށް ޖަވާބުދޭ މީހުންގެ ދިރިއުޅުމުގެ ކަންކަން ހުންނާނީ ވަރަށް ތަރުތީބުންނެވެ. އެމީހުންނަށް ނުކިޔާ ހުންނަ މެސެޖް ބެހެއްޓުމަކީ އުނދަގޫ ކަމެކެވެ. ނުނިމި ހުންނަ މަސައްކަތެއްގެ ސަބަބުން އުނދަގޫވާތީ އެކަންކަން ފުރިހަމަކުރާނެވެ. މަސައްކަތް ފުނިޖެހުނަނުދީ ވަގުތުން މަސައްކަތް ނިންމާނެ އެވެ.
އަވަހަށް މެސެޖަށް ޖަވާބުދޭ މީހުންގެ ހުންނަ އެހެން ސިފައެއްކަމުގައި ސައިކޮލޮޖިސްޓުން ބުނަނީ އަނެއް މީހާގެ އިހްސާސްތައް ދަނެ އެއަށް ކަމޭހިތުމެވެ. މެސެޖެއް ލިބި އެއަށް އިޖާބަދޭނަމަ އެކަމުން އަންގައިދެނީ މެސެޖު ފޮނުވި ފަރާތާ ދޭތެރޭ އޮންނަ ގާތް ކަމެވެ. އެމީހުންގެ އުފަލާއި ހިތާމާގައި ވެސް ބައިވެރިވާން ބޭނުންވާކަމެވެ. މީހުންގެ އިހްސާސަށް ކަމޭހިތާ މީހުން އުޅޭ މާހައުލަކީ ހިތްހަމަޖެހޭ އުފާވެރި މާހައުލެކެވެ. އަޅާލުމާއި އޯގާތެރި މާހައުލެކެވެ.
ކަންކަމަށް އިސްނެގުމަކީ ވެސް އަވަހަށް މެސެޖަށް ޖަވާބުދޭ މީހުންގެ ކިބައިގައި ހުންނަ ސިފައެކެވެ. ވާނުވާގައި އަނެކާ ބެހެއްޓުމުގެ ބަދަލުގައި އަވަހަށް މެސެޖަށް ޖަވާބުދިނުމާއި އެއްވެސް އޮޅުމެއް ވާނަމަ ސާފުކޮށްދިނުމާއި ބޭނުންވާ މައުލޫމާތު ފޯރުކޮށްދީ ހަދަ އެވެ. މެސެޖެއް ލިބުމުން އެއަށް ވަގުތުން އިޖާބަދީ ހައްލު ކުރާނެ އެވެ.
ޓެކްސްޓް މެސެޖަށް އަވަހަށް ޖަވާބުދޭ މީހުންނަކީ ކަނުލާ އަޑުއަހައި، އުފެދިގެން އުޅޭ މައްސަލައަށް އަވަސް ހައްލެއް ގެނެސްދީ ވެވެން އޮތް އެންމެ ރަނގަޅަކަށް ކަންތައް ކޮށްދޭނެ މީހުންނެވެ. އެފަދަ މީހުންނަކީ މެއިލްއަށް އަވަހަށް ޖަވާބުދީ، ވަޒީފާއާބެހޭ ކަމެއްގައި ނަމަ ވަރަށް ފުރިހަމައަށް އެކަން ބަލައިދީ، އެހީ ބޭނުންވާ ބަޔަކަށް އެހީ ފޯރުކޮށްދޭ މީހުންނެވެ.
ބަސްމޮށުންތެރި ބައެއް
އަވަހަށް ޖަވާބުދޭ މީހުންގެ ކިބައިގައި ފެނުނު އެންމެ ރަނގަޅު އެއްސިފައަކީ ބަސްމޮށުންތެރިކަމެވެ. ބަސްމޮށުންތެރިކަމަކީ ހަމައެކެނި ދޫފަސޭހަ ކަމެއް ނޫނެވެ. އެއީ އެކަކު އަނެކަކާ މުއާމަލާތު ކުރުމުގައި ސާފު އިބާރާތް ބޭނުން ކުރުން ވެސް މެ އެވެ.
ސައިކޮލޮޖިސްޓުންގެ އެއްބަސްވާގޮތުގައި އަވަހަށް މެސެޖަށް ޖަވާބުދޭ މީހާއަކީ އެތައް ގޮތަކުން ކާމިޔާބު މީހެކެވެ. މީހުންގެ އިހްތިރާމާއި ގަދަރު ލިބިފައިވާ ކާމިޔާބު މީހެކެވެ.
