ފުލުހުންނާއި ސިފައިންގެ ވެރިންގެ ކުއްލި ބައްދަލުވުމެއް މިއަދު ބަންޑާރަކޮށީގައި ބާއްވައިފި އެވެ.

މިއަދު ހަވީރު ބޭއްވި ބައްދަލުވުމަށްފަހު ހޯމް މިނިސްޓަރު އަލީ އިހުސާންއާއި ފުލުހުންގެ އިސްވެރިން ބަންޑާރަކޮށިން ނުކުމެގެން ދިޔަ މަންޒަރު ބައެއް އާއްމުންނަށް ވަނީ ފެނިފަ އެވެ.

އެނގިފައިވާ ގޮތުގައި މި ބައްދަލުވުމުގައި ޑިފެންސް މިނިސްޓަރު ޣައްސާން މައުމޫންވެސް ބައިވެރިވެވަޑައިގެންނެވި އެވެ.

މި ބައްދަލުވުން ބާއްވާފައި މިވަނީ "ގާނޫނު އަސާސީގެ ދިފާއުގައި ރައްޔިތުން" ގެ ނަމުގައި އިދިކޮޅު އެމްޑީޕީން ދަނީ ބޮޑު ޖަލްސާއެއް ބޭއްވުމަށް ތައްޔާރުވަމުންނެވެ.

ނަމަވެސް "އަދަދު" ނޫހުން މިނިސްޓަރު އިހުސާންއާއި ހަވާލާދީ ރިޕޯޓްކޮށްފައިވާގޮތުގައި މި ބައްދަލުވުމާއި މިރޭގެ ޖަލްސާއާ ގުޅުމެއް ނުވެ އެވެ. އަދި ބައްދަލުވުން ބޭއްވީ ވަކި ހާއްސަ ހާލަތެއް މެދުވެރިވެގެން ނޫންކަމަށް މިނިސްޓަރާއި ހަވާލާދީ އެ ނޫހުން ބުނެފައިވެ އެވެ.

އެމްޑީޕީން މިރޭ ޖަލްސާ ބާއްވާނެކަން އިއުލާން ކުރި ދުވަހުން ފެށިގެން ރައީސުލްޖުމްހޫރިއްޔާއާއި ސަރުކާރުގެ އިސްވެރިން ގެންދަނީ ވަރަށް ބޮޑަށް ސަރުކާރު ޕްރޮމޯޓްކޮށް ވައުދުތައް ފުއްދުމަށް މަސައްކަތް ކުރަމުންނެވެ. އެގޮތުން ފާއިތުވި އަހަރެއްތެރޭގައި މި ސަރުކާރަށް ނުފުއްދުނު ވައުދުތައް އަލުން އާކުރައްވާ ރައީސް މުއިއްޒު ވަނީ މި ހަފްތާތެރޭގައި ގިނަ ވައުދުތަކެއް ވެވަޑައިގެންފަ އެވެ. އެގޮތުން މަސްވެރިން ބާނާމަހަށް 48 ގަޑިއިރު ތެރޭގައި ފައިސާ ދިނުން ހިމެނެ އެވެ.

މީގެ އިތުރުން ސަރުކާރުން އަންނަ އަހަރަށް ފާސްކުރި ބަޖެޓްގައި ސަބްސިޑީއާއި ޕެންޝަންއަށް ކުރާ ހަރަދު މަދުކުރުމުގެ ގޮތުން ސަބްސިޑީ އުނިކުރަން ނިންމާފައި ވަނިކޮށް ރައީސްވަނީ ސަބްސިޑީ އަދި ޕެންޝަންވެސް މަދުނުކޮށް އިތުރު ކޮށްދެއްވާނެކަމަށް ވައުދުވެ ވަޑައިގެންފަ އެވެ. އާސަންދައިގެ ހިދުމަތް ރައްޔިތުންނަށް ފޯރުކޮށްދޭ އުސޫލަށްވެސް ސަރުކާރުން ބަދަލު ގެނައުމަށްފަހު ރައީސް މުއިއްޒު މި ހަފްތާގައި ވަނީ އާސަންދަ ލިބުމުގައިވެސް އެއްވެސް ބަދަލެއް ނާންނާނެކަމަށް ވިދާޅުވެފަ އެވެ.

މިރޭ އެމްޑީޕީން ބާއްވާ ޖަލްސާއަށް އިތުރު ސިޔާސީ ޕާޓީތަކަށްވެސް ވަނީ ދައުވަތު ދީފަ އެވެ.