ހަސަން ކުރުސީ ނަމުގައި ހިންގާ އެކްސް އެކައުންޓުގެ ސަސްޕެންޝަން އުވާލުމުން ކުރުސީ އެނބުރި އަތުވެއްޖެ އެވެ.

މީގެ ދެ ދުވަސް ކުރިން ކުރުސީގެ އެކައުންޓް ސަސްޕެންޑްކުރުމަށްފަހު، އަލުން އެ އެކައުންޓް އެކްޓިވްކޮށްފައިވަނީ ރޭގެ ވަގުތެއްގަ އެވެ. މީގެ ކުރިންވެސް ދެ ފަހަރެއްގެ މަތިން މި އެކައުންޓް ވަނީ ސަސްޕެންޑްކޮށްފަ އެވެ.

ވިސްލް ބްލޯވާއެއްގެ ގޮތުގައި ހިންގާ ހަސަން ކުރުސީ އެކައުންޓް ސަސްޕެންޑްކޮށްފައިވަނީ ސަރުކާރުގެ އެކި ކޮރަޕްޝަންގެ ވާހަކަތަކާއި ސަރުކާރުގެ އިސްވެރިންނަށް ފާޑުކިޔަމުން ގެންދާތީ ސަރުކާރަށް ތާއީދުކުރާ ފަރާތްތަކުން ރިޕޯޓްކުރަމުން ދިއުމާއި ގުޅިގެންނެވެ.

ކުރުސީ އެކައުންޓް ސަންސްޕެންޑްކުރުމުން ގިނަ ބަޔަކު ވަނީ 'BringBackHKurusee#' ގެ ނަމުގައި އެކްސްގައި ޕޯސްޓްތަކެއް ކޮށްފަ އެވެ. އެގޮތުން އެ ހޭޝްޓެގް ވަނީ ރާއްޖޭގެ ޓްރެންޑިން ތެރޭގައި ހިމެނިފަ އެވެ.

ކާކުކަން ނޭނގޭ ގޮތަށް ހިންގާ މި އެކައުންޓުގައި ސަރުކާރުގެ ކޮރަޕްޝަންތައް ހާމަކޮށް އެކަންކަމާއި ގުޅޭ ލިޔެކިޔުންތައް އާއްމުކޮށްފައިވެ އެވެ. ކުރީގެ ސަރުކާރުންނާއި މިހާރުގެ ސަރުކާރުން ވަނީ އެ އެކައުންޓު ހުއްޓުވުމަށާއި އެކަން ކުރާ މީހަކު ނުވަތަ ބަޔަކު ހޯދުމަށް މަސައްކަތްތަކެއް ކޮށްފައިކަން ފާހަގަކޮށްލެވެ އެވެ.