ކޮންމެ އާއަހަރަކަށް ތައްޔާރުވުމަކީ ކޮންމެ މީހަކުވެސް ކުރާ ކަމެެކެވެ. އެކިއެކި ސަގާފަތްތަކުގައި އާއަހަރަށް ތައްޔާރުވުމަށް އެކިއެކި ކަންކަން ކުރެ އެވެ. ރާއްޖޭގައި ވެސް ދިވެހިން "ނިއު އިޔާ ރިޒޮލިއުޝަން"ތައް ހަދަ އެެވެ. ބައެއް މީހުން ވަޒީފާ ބަދަލުކުރުމަށް އަޒުމް ކަނޑައަޅަ އެވެ. ހަށިގަނޑު ބަދަލުކުރުމަށް އަޒުމް ކަނޑައަޅަ އެވެ. ނޫނީ މީހުންނާ އޮންނަ ގުޅުންތަކަށް ބަދަލު ގެންނަން ނިންމަ އެވެ.

މިފަހަަރު މިއޮތީ އާކަމެއް ޓްރެންޑް ވާން ފަށައިފަ އެވެ. އެއީ އާ އަހަރަށް "ވިޝަން ބޯޑް" ހެދުމެވެ. މިއީ ވެސް ހަގީގަތުގައި ރިޒޮލިއުޝަން ހެދުމުގެ ވައްތަރެކެވެ.

އަންހެނަކު އޭނާގެ ވިޝަން ބޯޑު ދައްކާލަނީ

ވިޝަން ބޯޑަކީ އާއަހަރު ހާސިލުކުރަން ބޭނުންވާ ލަނޑުދަނޑިތައް ދައްކައިދޭ ފޮޓޯ ހިމަނައިގެން ބޯޑެއްގައި ހަދާ އާޓްވޯކެކެވެ. އޭރުން އާ އަހަރު ހާސިލްކުރަން ބޭނުންވާ ހުރިހާ ކަމެއް އެއްތަނަކުން ފެންނާނެ އެވެ.

https://vt.tiktok.com/ZS6YsXvtj/

ވިޝަން ބޯޑުގައި ބޭނުންކުރާނީ ބޭނުންވާ ކަންކަން ދައްކައިދޭ ޒާތުގެ ފޮޓޯތަކެެކެވެ. މިސާލަކަށް 2025 ގައި ވަކި ތަނަކަށް ދާން ބޭނުންނަމަ އެތަނުގެ ފޮޓޯއެއް ހިމެނިދާނެ އެވެ. ނޫނީ ވަކި ގޮތަކަށް ހަށިގަނޑު ބަދަލުކޮށްލަން ބޭނުންނަމަ އޭގެ ފޮޓޯއެއް ހިމެނިދާނެ އެވެ. ކަައިވެނިކުރަން ބޭނުންނަމަ އެއާ ގުޅޭ ފޮޓޯއެއް ލެވިދާނެ އެވެ.

https://www.instagram.com/reel/DDrPWttphIs/?igsh=MTR1cWM5ajMzNWd3aw==

ކޮންމެހެން ފިޒިކަލް ވިޝަން ބޯޑެއް ހަދަން ބޭނުން ނޫންނަމަ ޕިންޓްރެސްޓް ފަދަ އެޕެއްގައި ވެސް ވިޝަން ބޯޑެއް ޕްރައިވެޓްކޮށް ހަދާލެވިދާނެ އެވެ. މިފަދަ މަޖާ ހިތްހަމަޖެހޭ ކަމެއް އާއަހަރަށް ތައްޔާރުވުމަށް ކުރުމުން އެކަންކަން ހާސިލްކުރުމަށް ބޭނުންވާ ވިސްނުން ވެސް ފުޅާވެގެން ދާނެ އެވެ. އަދި އެކަންކަން ކުރަން ހިތްވަރު ވެސް ލިބޭނެ އެވެ. އަންނަ 2025 އަށް ތައްޔާރުވުމަށް ވިޝަން ބޯޑެއް ހެދުން ކިހިނެތް ހެއްޔެވެ؟