ވަގު ގޯތި މައްސަލާގައި ހިންގާ ޖިނާއީ ތަހުގީގާ ގުޅިގެން އެޗްޑީސީން މިދިޔަ އާދިއްތަ ދުވަހު ވަކިކުރި 15 މުވައްޒަފުންނަށް އަލުން ވަޒީފާ ދީ، ސަސްޕެންޑްކޮށްފި އެވެ.

އެނގިފައިވާގޮތުގައި އެޗްޑީސީގެ އިސް މެނޭޖްމަންޓުގައި ހިމެނޭ ބައެއް މުވައްޒަފުންނާ އެކު ވަކިކުރި އެންމެންނަށް އަލުން ވަޒީފާ ވަނީ ހަމަޖައްސާފަ އެވެ.

އަލުން ވަޒީފާ ދިން މުވައްޒަފުންގެ ތެރޭގައި ޗީފް ފައިނޭންޝަލް އޮފިސަރު އަބްދުﷲ ފާއިދާއި ޗީފް ބިޒްނަސް އޮފިސަރު އަދި މީޑިއާ ޑިޕާޓްމެންޓްގެ ހެޑް އަހުމަދު ޔާމީން ވެސް ހިމެނެ އެވެ.

ނަމަވެސް އެމީހުނަކީ އެޗްޑީސީގެ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު އާއެކު ބޮޑެތި ކޮރަޕްޝަންތަކެއް ހިންގުމުގައި ބައިވެރިވިކަމަށް ތުހުމަތުކުރެވޭ މީހުނެވެ.

ބިންވެރިޔާ މަޝްރޫއުގެ ދަށުން ދޫކުރި ގޯތި ތަކުގެ ތެރެއިން ގޯތި ނުލިބޭ ބަޔަކަށް އެޗްޑީސީން ގޯތި ދީފައިވާކަމުގެ ލިޔުންތަކެއް ސޯޝަލް މީޑިއާގައި ލީކްކޮށްލުމާއި ގުޅިގެންނެވެ. މި މައްސަލައާ ގުޅިގެން އެ ކުންފުނީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ވަނީ ސަސްޕެންޑްކުރިފަހުން އިސްތިއުފާ ދެއްވާފަ އެވެ.

ފަޒުލްގެ މައްޗަށް ކޮރަޕްޝަންގެ ބޮޑެތި ތުހުމަތުތަކެއް ކުރެވޭއިރު، ވަގު ގޯތީގެ މައްސަލަ ފުލުހުންނާއި އޭސީސީން ދަނީ ތަހުގީގު ކުރަމުންނެވެ.

އެޗްޑީސީގެ ކޮރަޕްޝަންގެ މައްސަލަތައް އެ ކުންފުނީގެ ކުރީގެ ޗެއާމަން އަހުމަދު ޒުހޫރު ރައީސް މުހައްމަދު މުއިއްޒުގެ ސަމާލުކަމަށް މީގެ ފަސް މަސް ކުރިން ގެންނެވިނަމަވެސް، އެކަމާއި މެދު އެއްވެސް ފިޔަވަޅެއް އަޅުއްވާފައިނުވެ އެވެ.