ވެލާނާ އިންޓަނޭޝަނަލް އެއާޕޯޓް (ވީއައިއޭ) ތަރައްގީ ކުރުމުގެ މަޝްރޫއަށް އަބޫދާބީ ފަންޑް ފޮ ޑިވެލޮޕްމަންޓް (އޭޑީއެފްޑީ) އިން އިތުރު 40 މިލިއަން ޑޮލަރުގެ ލޯނެއް ދޭން ނިންމައިފި އެވެ.
މި ލޯނު އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ ފިނޭންސް މިނިސްޓަރު މޫސާ ޒަމީރު އެވެ. އަބޫދާބީ ފަންޑުގެ ފަރާތުން ސޮއިކުރެއްވީ ޑިރެކްޓަ ޖެނެރަލް މުހައްމަދު ސައިފް އަލް ސުވައިދީ އެވެ.
އެއްބަސްވުމުގައި ސޮއިކުރެއްވުމަށްފަހު މިނިސްޓަރު ޒަމީރު ވިދާޅުވީ ވީއައިއޭ ތަރައްގީކުރުމުގެ މަޝްރޫއާއެކު ޓޫރިޒަމުން ލިބޭ އާމްދަނީ އިތުރުވެގެންދާނެކަން ފާހަގަކުރައްވާފަ އެވެ.
ރައީސް ޔާމީންގެ ވެރިކަމުގައި ތަރައްގީކުރަން ފެށި ވީއައިއޭގެ އާ ޓާމިނަލް މަޝްރޫއަށް އަބޫދާބީ ފަންޑުގެ އިތުރުން ސައުދީ ފަންޑުން މީގެ ކުރިން ވަނީ ލޯނު ދީފަ އެވެ.
ވީއައިއޭގެ އާ ޓާމިނަލްގެ މަސައްކަތް ނިންމާ މިމަހު ހުޅުވަން ކުރިން ބުނި ނަމަވެސް މިހާރު އެތަން ހުޅުވޭނެ ކަމަށް ލަފާކުރަނީ އަންނަ އަހަރުގެ މެދު ތެރޭގަ އެވެ.