މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން އިންތިޒާމްކޮށްގެން ބާއްވާ 2025 ވަނަ އަހަރުގެ އެންމެ ބޮޑު ގްލޯބަލް ކެމްޕޭން "ވޯލްޑްސް ބިގެސްޓް ގިވްއަވޭ" ރަސްމީކޮށް މިއަދު ފަށައިފި އެވެ.

ވޯލްޑް ޓްރެވަލް މާޓް (ޑަބްލިއުޓީއެމް) ލަންޑަންގައި މިދިޔަ އަހަރުގެ ނޮވެމްބަރު 5 ގައި އިއުލާނުކުރި މި ހަރަކާތުގައި މި އަހަރުގެ ޖެނުއަރީ މަހުގެ އެއްވަނަ ދުވަހުން ފެށިގެން 2025 ވަނަ އަހަރުގެ ކޮންމެ ހަފުތާއަކަށް އެއް ޗުއްޓީ، ޖުމްލަ 52 ޗުއްޓީ، ދިނުމަށް ވަނީ ހަމަޖެހިފަ އެވެ.

އެމްއެމްޕީއާރުސީ އިން ބުނިގޮތުގައި ސޯޝަލް މީޑިއާ މެދުވެރިކޮށް ކޮންމެ މަހަކު ބާއްވާ މި މުބާރާތްތަކުގެ ނަސީބުވެރި ފަރާތްތަކަށް ކޮންމެ ހަފްތާއަކު ވެސް ހިތްގައިމު ޗުއްޓީއެއްގެ ފުރުސަތު ލިބިގެންދާނެ އެވެ. ކޮންމެ މުބާރާތެއްގައި ވެސް ރާއްޖޭގެ ރީތި ގޮނޑުދޮށްތަކާއި ސާފު މޫދާއި، ގުދުރަތީ ރީތިކަމުން ފެށިގެން ރާއްޖޭގެ މުއްސަނދި ސަގާފަތާއި ތަފާތު ކަނޑުގެ ދިރުންތައް ފަދަ އެކިއެކި ކަންކަމަށް އަލިއަޅުވާލާނެ ކަމަށް އެ ކުންފުނިން ބުނެ އެވެ. އަދި ރޮމޭންސް، ލަގްޒަރީ، ފެމިލީ، ޑައިވިން އަދި އެހެނިހެން ހިތްގައިމު ތަފާތު ސެގްމެންޓްތަކަށް އަލިއަޅުވާލެވިގެންދާނެ ކަމަށް އެމްއެމްޕީއާރުސީ އިން ބުނެ އެވެ.

"ދަ ވޯލްޑްސް ބިގެސްޓް ގިވްއަވޭ" ކެމްޕޭންގެ މައިގަނޑު މަޤްސަދަކީ ސޯޝަލް މީޑިއާގެ ޒަރީއްޔާއިން ބައިނަލްއަޤްވާމީ ފަރާތްކަކުގެ ބައިވެރިވުމާއެކު ރާއްޖެއަށް ގިނަ ފަތުރުވެރިން އައުމަށް ޝައުގުވެރިކުރުވުން ކަމަށް އެ ކުންފުނިން ބުނެ އެވެ.

އެމްއެމްޕީއާރުސީން ބުނިގޮތުގައި މި މުބާރާތްތަކުގައި ބައިވެރިވުމުން ފަތުރުވެރިންނަށް ރާއްޖޭގެ ތަފާތު ހިތްގައިމުކަން ދެނެގަނެ، ލިބޭ ތަފާތު ތަޖުރިބާތައް ހިއްސާކޮށް، ރާއްޖެ އަކީ އަހަރުގެ ކޮންމެއިރަކުވެސް ޒިޔާރަތްކުރެވޭނެ މަންޒިލެއްގެ ގޮތުގައި އިޝްތިހާރު ކުރުން ވެސް ހިމެނެ އެވެ. އަދި ރާއްޖެއަކީ އެންމެ މަޤްބޫލު ޓްރެވަލް ޑެސްޓިނޭޝަންގެ ގޮތުގައި ހޭލުންތެރިކަން އިތުރުކޮށް، ރާއްޖޭގެ ތަފާތު ހުށަހެޅުންތަކާ ބެހޭ އަގުހުރި މައުލޫމާތުތައް މިހަރަކާތުގެ ތެރެއިން ފަސޭހަކާއެކު ފޯރުކޮށްދިނުން ކަމަށް އެ ކުންފުނިން ބުނެ އެވެ.

އެމްއެމްޕީއާރުސީއިން މިފަހަރުވެސް ދިވެހިރާއްޖޭގެ ވޯލްޑްސް ލީޑިން ޑެސްޓިނޭޝަންގެ މަގާމު ދެމެހެއްޓުމަށް ގިނަ މަސައްކަތްތަކެއް ކުރާނެކަމަށް އެ ކުންުފުނިން ބުނެ އެވެ. މި ގޮތުން، 2025 ވަނަ އަހަރުގެ ޖުމްލަ އަމާޒަކީ، ހޫނު މޫސުމުގެ ބޮޑެތި ކެމްޕޭންތަކާއެކު 25 މާކެޓުގައި ކޮންމެ ކުއާޓާއެއްގައި ވެސް ހަރަކާތްތައް ކުރިއަށް ގެންދިއުން ކަމަށް ބުނެފައިވެ އެވެ.

އެމްއެމްޕީއާރުސީން ބުނީ ވިޒިޓް މޯލްޑިވްސްއިން މަސައްކަތްކުރަނީ 2025 ވަނަ އަހަރު އިންޑަސްޓްރީ ޕާޓްނަރުންނާ ގުޅިގެން މަސައްކަތް ކޮށް އިތުރު ކާމިޔާބީތަކަށް ވާސިލްވުމަށް ކަމަށެވެ.