ބޮލީވުޑްގެ މަޝްހޫރު ތަރި ސައިފް އަލީ ޚާން އާއި ކަރީނާ ކަޕޫރު ދިރިއުޅޭ މުންބާއީގެ ބަންޑްރާގައި ހުންނަ ގެއަށް ވައްކަން ކުރަން ބަޔަކު ވަދެ ސައިފްއަށް ވަޅިން ހަމަލާދީ ޒަހަމްކޮށްލައިފި އެވެ.

މި ހާދިސާ ހިނގާފައިވަނީ ބުރާސްފަތި ދުވަހުގެ މެންދަމު 2:30 ހާއިރުއެވެ. އެވަގުތު އާއިލާގެ އިތުރު މެންބަރުންނާއެކު ސައިފްވެސް އޮތީ ނިދާފައިކަމަށް ރިޕޯޓްތައް ބުނެ އެވެ. މި ހަމަލާ ދިންއިރު ސައިފްގެ އަންހެނުން ކަރީނާ އެރޭ އުޅުނީ ދައްތަ ކަރިޝްމާގެ ގޭގައި ކަމަށް ރިޕޯޓްތައް ބުނެ އެވެ.

އިންޑިއާގެ ފުލުހުން ބުނާ ގޮތުގައި ހަމަލާއަށް ފަހު ވަގު ވަނީ ފިލައިގެން ގޮސްފަ އެވެ. އޭނާ ހޯދަން މަސައްކަތް ކުރަމުންދާ ކަމަށް ފުލުހުން ބުނެފައިވެ އެވެ. ބަންޑްރާ ފުލުހުން އެފް.އައި.އާރު އެއް ރަޖިސްޓަރީ ކުރުމުގެ މަސައްކަތް ކުރަމުންދާ ކަމަށާއި، ކުށްވެރިޔާ ހައްޔަރު ކުރުމަށް ގިނަ ފުލުސް ޓީމުތަކެއް އެކުލަވާލާފައިވާ ކަމަށްވެސް ބުނެފައިވެ އެވެ.

އައި.ޕީ.އެސްގެ އިސް އޮފިސަރަކު މި ހާދިސާ ހިނގި ކަން ކަށަވަރުކޮށްދީ ބުނެފައިވަނީ މިހާރު ސައިފް ޢަލީ ޚާން ވަނީ ލީލާވަތީ ހޮސްޕިޓަލަށް ގެންގޮސް ފަރުވާދޭން ފަށާފައިކަމަށެވެ.

ލީލާވަތީ ހޮސްޕިޓަލުގެ ސީ.އޯ.އޯ ޑރ. ނިރާޖް އުއްތަމާނީ ވިދާޅުވީ، ސައިފްއަށް ހަމަލާދީފައިވަނީ އޭނާގެ ގެއަށް މީހަކު ވަދެކަމަށެވެ. އޭނާ ހޮސްޕިޓަލަށް ގެނެވުނީ ފަތިހު 3:30 ގައި ކަމަށާއި އޭނާއަށް 6 އަނިޔާއެއް ލިބިފައިވާކަމަށް ޑރ. ނިރާޖް ވިދާޅުވި އެވެ. އޭގެ ތެރެއިން ފުން ދެ ޒަހަމެއް ހުރިކަމަށާއި މިހާރު ސައިފްގެ އޮޕަރޭޝަނެއް ކުރިއަށް ދާކަމަށް އޭނާ ވިދާޅުވި އެވެ. އަނިޔާގެ މިންވަރު ބުނެދެވޭނީ އޮޕަރޭޝަން ނިމުމުން ކަމަށްވެސް ވިދާޅުވި އެވެ.

ޑރ. ނިރާޖް އިތުރަށް ވިދާޅުވީ ސައިފްގެ ކަރުގައި ވެސް އަނިޔާއެއް ވާ ކަމަށެވެ.

ސައިފް ފިލްމީ ކެރިއަރު ފެށީ 1993 ވަނަ އަހަރު "ޕަރަމްޕަރާ" އިންނެވެ. އޭނާ ވަނީ "ދިލް ޗާހްތާ ހޭ"، "އޮމްކާރާ"، އަދި "ތަންހާޖީ" ފަދަ އެކި ފިލްމުތަކުގައި ފެނިފަ އެވެ. ޕަޓައުޑީ ޢާއިލާއަށް އުފަންވެފައިވާ އޭނާއަކީ އެކްޓްރެސް ޝަރްމިލާ ޓަގޯރު އާއި ކްރިކެޓް ކުޅުންތެރިޔާ މަންސޫރު ޢަލީ ޚާންގެ ދަރިއެކެވެ.