ބޮލީވުޑްގެ މަޝްހޫރު ތަރި އަދި ސައިފް އަލީ ޚާންގެ އަންހެނުން ކަރީނާ ކަޕޫރު ޚާންގެ ރުޅިގަނޑު އަނެއްކާ ވެސް އިންޑިއާގެ މީޑިއާތަކަށް އަމާޒުވެއްޖެ އެވެ.

ކަރީނާގެ ރުޅިގަނޑު މީޑިއާއަށް މިފަހަރު އަމާޒުވެފައި މިވަނީ ސައިފް ހޮސްޕިޓަލުގައި އެނދުމަތިކޮށް ބާއްވާފައި އޮތް ދަނޑިވަޅެއްގައި ކަރީނާ ދާހާ ތަނަކަށް މީޑިއާ ވެސް ދާތީ އެވެ. އެގޮތުން އެންމެ ފަހުން ކަރީނާއާއި މީޑިއާގެ ކުރިމަތިލުމުގައި ކަރީނާ ވަނީ އެ އާއިލާއަށް އުނދަގޫ ނުކޮށް "އެމީހުންގެ ހާލަށް ދޫކޮށްލުމަށް" މީޑިއާގެ ކިބައިން އެދިފަ އެވެ.

ސައިފްގެ ގަޔަށް ވަޅިހެރި ހާދިސާއަށްފަހު އެ އާއިލާއަށް މީޑިއާގެ ފަރާތުން ލިބޭ ސަމާލުކަން ވަނީ ކުރިއަށްވުރެ ވެސް ބޮޑަށް އިތުރުވެފަ އެވެ.

މިދިޔަ ބުރާސްފަތި ދުވަހު ސައިފްއަށް ވަޅިން ހަމަލާ ދީފައިވަނީ އެ އާއިލާ ދިރިއުޅެމުން އަންނަ ގެއަށް ވަތް ވަގެކެވެ. އެ ހާދިސާގައި ސައިފްގެ ހަށިގަނޑުގެ ފަސް ތަނަކަށް ވަޅިން ހަމަލާ ދީފައިވެ އެވެ.

އެ ހަމަލާއަށްފަހު އިމަޖެންސީގައި ސައިފްގެ ސާޖަރީއެއް ކުރެވުނުއިރު މިހާރު އޭނާގެ ހާލު ރަނގަޅުވަމުން އަންނަ ކަމަށް އާއިލާއާ ހަވާލާދީ މީޑިއާތަކުން ބުނެ އެވެ.