އެންޓި ކޮރަޕްޝަން ކޮމިޝަނަށް އައްޔަންކުރި ދެ މެމްބަރުންނަށް ރުހުން ދިނުމުގެ ކުރިން އެ ދެ ބޭފުޅުންގެ ޝަކުވާއެއް އޮތްތޯ ބެލުމަށް މަޖިލީހުގެ ގަވާއިދުން ދިވެހި ރައްޔިތުންނަށް ލިބިދީފައިވާ ފުރުސަތު ޕީއެންސީގެ މެޖޯރިޓީ އޮތް މަޖިލީހުން ނިގުޅައިގެންފި އެވެ.

އެންޓި ކޮރަޕްޝަން ކޮމިޝަނަށް އައްޔަންކުރި ދެ މެމްބަރުންނަށް ރުހުން ދިނުމުގެ ކުރިން އެ ދެ ބޭފުޅުންގެ ޝަކުވާއެއް އޮތްތޯ ބެލުމަށް ރައްޔިތުންގެ މަޖިލީހުން އާންމުންނަށް އިއްޔެ ދިނީ އެންމެ 30 މިނިޓްގެ ފުރުސަތެކެވެ.

އޭސީސީއަށް އައްޔަންކުރަން ރުހުންދިން ދެ ބޭފުޅުންނަކީ މއ. ގޯލްޑަން މޫން، އަހުމަދު ނާޝިދު އާއި ރ. އަލިފުށި، ފަސާނާ، އަބްދުﷲ ނާޝިދު އެވެ.

މަޖިލީހުގެ ގަވާއިދުގެ 223 ވަނަ މާއްދާގެ (ބ)ގައި ވަނީ މިނިވަން މުއައްސަސާތަކަށް އައްޔަންކުރާ މީހުންނާމެދު އާންމުންގެ ޝަކުވާއެއް އޮތްތޯ ބެލުމަށް އާންމުކޮށް އަންގައި އިއުލާންކުރަންވާނެ ކަމަށެވެ. މަޖިލީހުން އެކަމަށް ދިނީ އެންމެ 30 މިނިޓެވެ. 30 މިނެޓްގެ ތެރޭގައި އެފަދަ ބޭފުޅުންތަކަކާ ގުޅޭގޮތުން ދިވެހި ރައްޔިތުންގެ ޝަކުވާއެއް އޮތްނަމަ ހުށަނޭޅޭނެ ކަމީ ހަމަބުއްދި ހުރި އިންސާނަކު ވިސްނާނުލިޔަސް އެނގޭނެ ކަމެކެވެ.

މަޖިލީހުގެ ގަވާއިދުގައި އެފަދަ އިއުލާނެއް ކުރަން އޮންނާތީ ނަމަކަށް ކަމެއް ކޮށްލުމުގެ ގޮތުން އެކަން ކުރީ އެވެ. އެފަދައިން އަމަލުކުރާނަމަ އެކަމަށް އެއް މިނެޓްގެ ފުރުސަތު ނުދެވެންވީ ސަބަބެއް ނެތެވެ. އެއިރުން މާ އަވަހަށް އެކަން ނިމޭނެ އެވެ.

މިނިވަން މުއައްސަސާއަކަށް ބޭފުޅަކު އައްޔަންކުރުމުގެ ކުރިން އާންމުންގެ ޝަކުވާއެއް އޮތްތޯ ބެލުމަކީ ވަރަށް މާތް މަގްސަދެއްގައި ކުރަމުން އަންނަ ކަމެކެވެ. މިދިޔަ މަޖިލީހުން ވަރަށް ފުރިހަމައަށް އެކަން ކޮށްފައިވެ އެވެ.

އިއްޔެ ދިން 30 މިނެޓްގެ ވަގުތަކީ މީހަކު ފެންވަރާލައިގެން ނުކުންނާނެހާ ވަގުކޮޅެކެވެ. ގިނަ މީހުންނަކީ 24 ގަޑިއިރު މަޖިލިސް ލައިވްކޮށް ބަލަން ތިބޭނެ ބައެއް ވެސް ނޫނެވެ. އެހެންކަމުން އެކަށީގެންވާ ވަގުތު ދިނުމުން ނޫނީ މަޖިލީހުގެ ގަވާއިދުގެ އެ މާއްދާގެ މަގްސަދު ހާސިލެއް ނުވާނެ އެވެ.

މަޖިލީހުގެ ގަވާއިދުގައި އޮތް ލޫޕްހޯލްއެއް ހޯދައިގެން ރައްޔިތުންނަށް އޮތް ޝަކުވާ ހުށަހެޅުމުގެ ފުރުސަތު މަޖިލީހުން ނިގުޅައިގަތީ އެވެ.