ގއ. މާމެންދޫގެ އިހްތިސާސްގައި އެ އަތޮޅު ހުޅިމެންދޫ ހިމެނުއްވުމަށް ރައީސް މުހައްމަދު މުއިއްޒު ނިންމަވައިފި އެވެ.

ރައީސް މުއިއްޒު އެގޮތަށް ނިންމަވާފައިވަނީ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުން، އެންމެހައި އިދާރީ ދާއިރާތަކުގައި ހިމެނޭ ސިޓީ ކައުންސިލްތަކާއި ރަށު ކައުންސިލްތަކުގެ އިހްތިސާސް ކަނޑައެޅުމަށް މަތިކޮށްފައިވާ މަސްއޫލިއްޔަތުގެ ދަށުން، ހޮނިހިރު ދުވަހު ނެރުއްވި ގަރާރަކުންނެވެ.

ހުޅިމެންދޫއަކީ މާމެންދޫއާ އެއް ފަޅެއްގައި އޮންނަ ގާތްގަނޑަކަށް 5.40 ހެކްޓަރުގެ ރަށެކެވެ. މިރަށް އެރަށުގެ އިހުތިސާސް އިން އުނިކޮށްފައިވަނީ ކުރީގ ރައީސް 2018 ވަނަ އަހަރު އެވެ. މާމެންދޫގެ އިހުތިސާސްއިން އުނިކޮށް ފަތުރުވެރިކަމުގެ ބޭނުމަށް އޭރު އެ ރަށް ދޫކޮށްފައި އޮތަސް އެ މަސައްކަތް ކުރިއަކަށް ނުދެ އެވެ.