އިނގިރޭސިވިލާތުގެ ނޯތު ޔޯކްޝަޔާގެ މެލްސޮންބީ ކައިރިން 2،000 އަަހަރުވީ 800 އަށް ވުރެ ގިނަ "އަޔަން އޭޖް"ގެ އާސާރީ ތަކެތި ފެނިއްޖެ އެވެ.
މެޓަލް ޑިޓެކްޓަރިސްޓް، ޕީޓާ ހެޑްސްއަށް ފެނުނު މި ތަކެތި، މެލްސޮންބީ ޚަޒާނާގެ ނަމުން މަޝްހޫރުވެފައިވާއިރު، މި ހޯދުމަކީ އާކިއޮލޮޖިސްޓުން ސިފަކުރާ ގޮތުގައި "އުމުރުގައި އެއްފަހަރު" ފެންނަ ފަދަ ހޯދުމެކެވެ.
ޑާހަމް ޔުނިވާސިޓީގެ އާކިއޮލޮޖީ ޑިޕާޓްމަންޓުގެ އިސްވެރިޔާ ޕްރޮފެސަރު ޓޮމް މޫރު ވިދާޅުވި ގޮތުގައި މި ޚަޒާނާއަކީ އޭގެ މިންވަރާއި ބޮޑުމިނުގެ ގޮތުން ރޯމަން އަދި ފަހަރެއްގައި ޔޫރަޕަށް ވެސް ނިސްބަތްވާ ތަކެއްޗެވެ.
އޭނާ ބުނެފައިވާ ގޮތުން މި ހޯދުންތަކަކީ ހީވާ ގޮތުން، މެޑިޓެރޭނިއަން ޒަމާނުގައި އުޅުނު މީހުން ބޭނުންކުރި ތަކެއްޗެވެ. މި ޚަޒާނާގައި ހިމެނޭ 2000 އަހަރުވެފައިވާ އާސާރީ ތަކެތީގެ ތެރޭގައި ވެގަންތަކުގެ ބައެއް ބައިތަކާއި، ރަސްމީ އިވެންޓުތަކުގައި ބޭނުންކުރާ އަޅިތަކާއި، ކުދި އަސްތަކާއި ބޯތަށި އަދި އެހެނިހެން ސާމާނު ހިމެނެ އެވެ.
ހިސްޓޯރިކް އިންގްލެންޑްގެ ޗީފް އެގްޒެކެޓިވް ޑަންކަން ވިލްސަން ވިދާޅުވި ގޮތުގައި މިއީ އިނގިރޭސިވިލާތުގައި ފެނިފައިވާ އެންމެ މުހިންމު އަޔަން އޭޖުގެ ހޯދުންތަކުގެ ތެރެއިން ހޯދުމެކެވެ. މި ޚަޒާނާގެ އަގު ހިސާބުކުރެވިފައި ވަނީ 254,000 ޕައުންޑަށެވެ.
ސަގާފީ ވަޒީރު ސާ ކްރިސް ބްރަޔަންޓް ވިދާޅުވި ގޮތުގައި މި ޚަޒާނާއަކީ އާދަޔާ ޚިލާފު ހޯދުމެކެވެ. އަދި މިއިން އިނގިރޭސިވިލާތުގެ ތާރީޚުގެ ފޭރާން ރަނގަޅަށް ދެނެގަތުމަށް އެހީތެރިވެދޭނެ އެވެ.
މި ޚަޒާނާގެ އޮށްވަޅުތަކުގެ ތެރެއިން އެއް އޮށްވަޅު މުޅިން ނަގާފައިވާއިރު، އޭގެ އެތެރޭގައި ހުރި ތަކެތި ރައްކާތެރިކުރުމަށްޓަކައި މުޅި އޮށްވަޅު އެއްކޮށް ބްލޮކެއްގެ ގޮތުގައި ބަހައްޓާފައި ހުންނާނެއެވެ.