އިންޑިއާގެ މުސްލިމުންގެ ވަގުފު ފަންޑުތައް ސަރުކާރުގެ ކޮންޓްރޯލްގެ ދަށަށް ގެންދަން ފާސްކުރުމުން ގިނަ ބަޔަކު ނުރުހުން ފާޅުކުރަން ފަށައިފި އެވެ.

އިންޑިއާގެ ގާނޫނު ހަދާ މަޖިލިސް ލޯކް ސަބާއިން ވަގުފު އިސްލާހު ބިލު ފާސްކޮށްފައި ވަނީ ބުރާސްފަތި ދުވަހު އެވެ. އެ މަޖިލީހުގެ 288-232 ވޯޓުން ފާސްކުރި މި ބިލަކީ މުސްލިމުންގެ ހައްގުތައް ހަނިކުރުމަށް އަމާޒުކޮށްފައިވާ ބިލެއް ކަމަށް ބުނެ ގިނަ ބަޔަކު ދަނީ ފާޑުކިޔަމުންނެވެ.

ޖުމްލަ 12 ގަޑިއިރުގެ ހޫނު ބަހުސަކަށްފަހު ފާސްކުރި މި ބިލަކީ ވަގުފު ބޯޑުތަކުގެ ހިންގުމަށް ބޮޑެތި ބަދަލުތަކެއް ގެންނަ ބިލެކެވެ. މިގޮތުން ވަގުފް ފަންޑުތައް އިންޑިއާ ސަރުކާރުގެ ކޮންޓްރޯލް އޮންނަ ގޮތަކަށް މެނޭޖުކުރަން އަދި ރެޖިސްޓްރީ ކުރަންޖެހެ އެވެ.

މޯދީގެ ބަހާރަތީޔާ ޖަނަތާ ޕާޓީ (ބީޖޭޕީ) އިން ބުނާ ގޮތުގައި 1995 ވަނަ އަހަރުގެ ވަގުފު ގާނޫނަށް ގެންނަން ހުށަހަޅާފައިވާ ބަދަލުތަކުން ކޮރަޕްޝަން ނައްތާލައި ހާމަކަން ބޮޑުވެ، ޖަވާބުދާރީވުން އިތުރުކުރެވޭނެ އެވެ. އަދި ހަމައެހެންމެ ތަފާތު ވިސްނުންތައް ކުރިއެރުވުމަށް މަގުފަހިވާނެ އެވެ.

ނަމަވެސް މުސްލިމުން ބުނަނީ މި ބަދަލުތަކުގެ ސަބަބުން ވަގުފު މުދާތައް - ތާރީޚީ މިސްކިތްތަކާއި ފިހާރަތަކާއި ޒިޔާރަތްތަކާއި ގަބުރުސްތާނުތައް އަދި މުސްލިމުންގެ ބިންތައް އަތުލުމާއި، ދެބަސްވުންތައް އިތުރުވެ، ސަރުކާރަށް މިފަދަ ތަންތަންތަން ނައްތާލުމަށް ފަސޭހަވެގެން ދާނެ ކަމަށެވެ.

ނަމަވެސް އިދިކޮޅު ޕާޓީތަކުން ބުނަނީ މި ބިލަކީ މުސްލިމުންގެ ހައްގުތައް ހަނިކުރުމަށް އަމާޒުކޮށްފައިވާ ބިލެއް ކަމަށެވެ. އަދި ވަގުފު ބޯޑުތަކުގައި މުސްލިމުން ނޫން މެންބަރުން ހިމެނުމާއި ސަރުކާރުގެ ބާރު އިތުރުކުރުން ފަދަ ކަންކަމަކީ މުސްލިމުންގެ ދީނީ މުދަލުގެ މައްޗަށް އޮންނަ ބާރު ކުޑަކުރުމަށް ކުރާ ކަމެއް ކަމަށް ފާޑުކިޔާ ފަރާތްތަކުން ބުނެ އެވެ.

މި ބިލު ފާސްވުމާ ގުޅިގެން އިންޑިއާގެ އެކި ސަރަހައްދުތަކުގައި އިހުތިޖާޖުތައް ދަނީ ކުރަމުންނެވެ. ދެން މި ބިލު ހުށަހެޅޭނީ ރާޖިޔާ ސަބާ އަށެވެ. ރާޖަޔާ ސަބާގައި ސަރުކާރަށް އެހާ ފަހިގޮތަކަށް ކަންކަން ނުހިނގާނެ ކަމަށް ރިޕޯޓުތައް ބުނެ އެވެ.