އއ.މާޅޮހުގައި ބޮޑެތި ޒަހަމްތަކެއް ދީ އުމުރުން ދުވަސްވީ މީހަކު މަރާލައިފި އެވެ.

ފުލުހުން ބުނީ މާޅޮހުގެ ގެއެއްގައި ނިދާފައި އޮތް މީހަކަށް ބޮޑެތި ޒަހަމްތަކެއް ދިނުމުގެ ސަބަބުން ސިއްހީ މަރުކަޒަށް ގެންދެވި ފަރުވާ ދެމުންދާ ކަމުގެ މައުލޫމާތު ރޭ ދަންވަރު 1:50 ހާއިރު ލިބިފައިވާ ކަމަށެވެ.

ފުލުހުން ބުނީ އެމީހާ އަށް ފަރުވާ ދެމުން ދަނިކޮށް ރޭ ފަތިހުގެ ވަގުތެއްގައި ނިޔާވެފައިވާކަމަށެވެ.

ފުލުހުން ބުނި ގޮތުގައި ނިޔާވީ އއ.މާޅޮސް/ އޯކިޑްމާގެ، އަބްދުލް ރަހުމާން އާދަމް (65 އ.) އެވެ.

މި މައްސަލަ ފުލުހުން ތަހުގީގު ކުރަމުންދާއިރު، މައްސަލައިގެ ތަހުގީގަށް ފުލުހުންގެ ތަހުގީގު ޓީމެއް މާލެއިން އެރަށަށް ދަނީ ދަތުރުކުރަމުންނެވެ.