މަޝްހޫރު ފިލްމް ފްރެންޗައިޒް "ހެރީ ޕޮޓާ" އަސްލަކަށް ބަލައިގެން އެޗްބީއޯއިން ހަމަ އެ ނަމުގައި އުފައްދާ ސީރީޒްއާމެދު އެ ފިލްމު ފްރެންޗައިޒްގެ ޑައިރެކްޓަރު ކްރިސް ކޮލަމްބަސް ނުރުހުން ފާޅުކޮށްފި އެވެ.

ދާދި ފަހުން ޕޮޑްކާސްޓަކަށް ދިން އިންޓަވިއުއެއްގައި ކްރިސް ވަނީ ފިލްމެއް އުފައްދާފައިވާ ވާހަކައަށް އަލުން ސީރީޒްއެއް ހެދުމުގެ ހިޔާލަށް އެއްބަސްނުވާ ކަމަށް ބުނެފަ އެވެ.

އެގޮތުން ސީރީޒްގެ ފުރަތަމަ ފެނިލުމުގައި ފިިލްމާ ވަރަށް އެއްގޮތް ކަންތައްތަކެއް ފާހަގަ ކުރެވިފައި ކަމަށާއި އެހެން ކަމުން އަލުން ސީރީޒްއެއް އުފެއްދުމުގެ ބޭނުމެއް ނުވިސްނޭ ކަމަށް ކްރިސް ބުންޏެވެ.

"އަހަންނަށް އެ ސީރީޒްގެ ޓްރެއިލާ ފެނުނު. ހެގްރިޑްގެ ކޮސްޓިއުމް ވެސް ހުރީ ހަމަ ފިލްމާ އެއްގޮތަކަށް. އެއްވެސް ތަފާތެއް ނެތް" ކްރިސް ބުނެފައިވެ އެވެ.

އެ އިންޓަވިއުގައި ކްރިސް ވަނީ ހެރީ ޕޮޓާގެ އުފެއްދުމެއްގައި ދެން މަސައްކަތް ނުކުރަން ނިންމި ސަބަބާ ބެހޭގޮތުން ވެސް ވާހަކަ ދައްކާފަ އެވެ.

ކްރިސް ބުނީ އެ ފިލްމުގެ ޑައިރެކްޓަރެއްގެ ގޮތުގައި އޭނާގެ ފަރާތުން ދެވެން އޮތް ހުރިހާ އެއްޗެއް ދެވިއްޖެ ކަމަށް ގަބޫލުކުރާ ކަމަށާއި އެހެން ކަމުން ދެން އެ މަސައްކަތަށް އެނބުރި ނުދާނެ ކަމަށެވެ.

ހެރީ ޕޮޓާ ސީރީޒްގެ ޕްރޮޑަކްޝަން މަސައްކަތް މިހާރު ކުރިއަށް ދާއިރު އެ ސީރީޒް ޕްރިމިއާ ކުރެވޭނެ ކަމަށް ލަފާ ކުރެވެނީ 2027 ވަނަ އަހަރު އެވެ.