ވެލާނާ އިންޓަނޭޝަނަލް އެއާޕޯޓު (ވީއައިއޭ) އިން ފުރި އެއާ އޭޝިއާގެ ބޯޓަކަށް މައްސަލައެއް ދިމާވެގެން އަނބުރާ ޖައްސައިފި އެވެ.

މެލޭޝިއާގެ ކުއަލަ ލަމްޕޫރަށް ދަތުރުކުރަން އޮތް މި ބޯޓު ފުރީ މިއަދު ހެދުނު 10:55 ގަ އެވެ.

ހެނދުނު ބޯޓު ފުރިފަހުން ފްލައިޓު ރާޑަރުގެ ޑޭޓާތަކުން ދައްކާ ގޮތުގައި ބޯޓު ފުރި އިރުން ފެށިގެން ސްޕީޑުގެ މައްސަލަތަކެއް ދިޔައީ ދިމާވަމުންނެވެ. މިހެން ގޮސް ބޯޓު އަނބުރާލީ ފުރިތާ 30 މިނެޓު ފަހުންނެވެ. އަނބުރާލުމަށް ފަހު ވީއައިއޭގައި ޖެއްސެއް ދެން އިތުރު ގަޑިއިރެއްހާއިރު މާލެ އަތޮޅު އިރުން ބޭރުގައި ދުއްވި އެވެ.

މިހެން ދަތުރުކުރަމުން ދަނިކޮށް ދެތިން މިނެޓް ތެރޭގައި ބޯޓު ބާރު ސްޕީޑުގައި 2،000 އެއްހާ ފޫޓު ތިރިއަށް ޖެހުނުކަން ވެސް ފުލައިޓުގެ ޑޭޓާތަކުން ދައްކަ އެވެ. ބޯޓުން ނައްޓާލައިގެން އެނބުރި ހުޅުލޭގައި ޖެއްސުމާ ދެމެދު ވީ ދެ ގަޑިއިރެއްހާއިރު ބޯޓުގެ ސްޕީޑު އެއްވަރެއްގައި ހިފެހެއްޓިފައެއް ނުވެ އެވެ.

މައުލޫމާތު ލިބިފައިވާ ގޮތުގައި މި ބޯޓަށް ދިމާވި މައްސަލައަކީ ލޭންޑިން ގިއަރު މަތިނުވުމުމުގެ މައްސަލަ އެވެ. އަދި ބޯޓު އަނބުރާ ޖެއްސީ ލޭންޑިން ގިއަރަށް ދިމާވި މައްސަލައަށް ހައްލެއް ނުލިބިގެން ކަމަށްވެ އެވެ.

މިކަމާ ގުޅިގެން ރާއްޖޭގެ އެއްވެސް އިދާރާއަކުން އަދި އެއާޕޯޓު ހިންގާ އެމްއޭސީއެލް އިން މިހާތަނަށް ބަހެއް ބުނެފައެއް ނުވެ އެވެ. މިއަދު މެންދުރުފަހު ވީއައިއޭއަށް ޖެއްސި ބޯޓު އަދި ވެސް އޮތީ އެ އެއާޕޯޓުގަ އެވެ. މިއީ އެއާ އޭޝިއާގެ އެއާބަސް އޭ-320 މަރުކާގެ ބޯޓެކެވެ.

އެ މަރުކާގެ ބޯޓުތަކުގެ ފްލައިޓު ކޮންޓްރޯލް އަށް ދިމާވަމުންދާ މައްސަލައެއް ހައްލުކުރުމަށް ހުރިހާ ބޯޓެއްގެ ސޮފްޓްވެއާ އަޕްޑޭޓްކުރަން މިދިޔަ ހުކުރު ދުވަހު އެއާބަސް ކުންފުނިން ވަނީ އެއާލައިންތަކަށް އަންގާފަ އެވެ.