މީހެއްގެ ސޯޝަލް މީޑިއާ އެކައުންޓުތައް ކޮމްޕްރޮމައިޒްކޮށް، އޭނާގެ ހިއްސާ އޮންނަ ކުންފުނީގެ ބެންކު އެކައުންޓުން 279،000 އަށް ވުރެ ގިނަ ރުފިޔާ ނެގި މައްސަލައެއްގައި 10 މީހަކު ހައްޔަރުކޮށްފި އެވެ.

ފުލުހުން ބުނީ އެ މީހުން ހައްޔަރުކޮށްފައިވަނީ މީހެއްގެ ސޯޝަލް މީޑިއާ އެކައުންޓުތައް ކޮމްޕްރޮމައިޒްކޮށް، އޭނާގެ ހިއްސާ އޮންނަ ކުންފުނީގެ ބެންކު އެކައުންޓުން 279،600 އަށް ވުރެ ގިނަ ރުފިޔާ ނަގާފައިވާ ކަމަށް ހުށަހަޅާފައިވާ މައްސަލައާ ގުޅިގެން ހިންގި އޮޕަރޭޝަންގައި ކޯޓު އަމުރުގެ ދަށުން ކަމަށެވެ.

މި މަހުގެ 21 ވަނަ ދުވަހުން ފެށިގެން ކުރިއަށް ގެންދިޔަ މި އޮޕަރޭޝަންގައި، އެ މީހުންގެ ތެރެއިން އެކަކު ހައްޔަރުކުރީ ކ. ހިންމަފުށިންނެވެ. އަދި ތިން މީހަކު ހައްޔަރުކޮށްފައިވަނީ އައްޑޫން ނެވެ. ދެން ތިބި މީހުން ހައްޔަރުކޮށްފައިވަނީ މާލެއިންނެވެ.

ހައްޔަރުކުރި މީހުން:

1-މުހައްމަދު ހަސަން، 59، ގުޑްލައިފް/ ލ. އިސްދޫ

2-އަލީ އިރުފާނު އަޙްމަދުދީދީ، 26، އުދަ/ ސ. ހިތަދޫ

3-ޢަލީ ޝިރާޒު، 38، ނަންރީތިގެ/ ސ. ހިތަދޫ

4-އަބްދުﷲ ނާފިޒް، 39، ޕެރިމްރޯޒް/ ހދ. ވައިކަރަދޫ

5-މުހައްމަދު އަލީ، 42، ފޫހިވާގެ / ގއ. ކަނޑުހުޅުދޫ

6-މުހައްމަދު ނުހާދު އަލީ، 30، މ. މާލޭގެއާގެ

7-މުހައްމަދު ސިމާދު، 38، ޕެނަމާ / ހއ. ކެލާ

8-އަލީ އިމްރާން، 38، ހީނާމާގެ / ގދ. ފިޔޯރީ

9-އަބްދުﷲ އިސްރާގު، 19، ގުލްބަކާގެ / ގދ. ތިނަދޫ

10-މުހައްމަދު އިބްރާހީމް، 49، މެޑޯޒް / ކ. ހިންމަފުށި

އެ މީހުންގެ ތެރެއިން ހަ މީހުންނަކީ ސްކޭމްކޮށްގެން ހޯދާފައިވާ ފައިސާ އެ މީހުންގެ އެކައުންޓަށް ޖަމާކޮށް ފައިސާ ނަގާފައިވާ މީހުން ކަމަށެވެ. އަދި އެތަނުން އެކަކު، ސްކޭމްކޮށްގެން ހޯދާފައިވާ ފައިސާ އެކި ވިޔަފާރިތަކަށް ޖަމާކޮށް އެ ފައިސާ އަށް މުދާ ގަނެފައިވާ ކަމަށް ވެސް ފުލުހުން ބުންޏެވެ.

އަނެއް ތިން މީހުންނަކީ އެކި މީސް މީހުން އޭޓީއެމްއަށް ގެންގޮސްގެން އެ މީހުން މެދުވެރިކޮށް އޭޓީއެމްއިން ފައިސާ ނެގުމަށް ފަހު އެ ފައިސާތަކާ ހަވާލުވެފައިވާ މީހުންނެވެ.

މި މައްސަލައާ ގުޅިގެން ހައްޔަރުކުރި 10 މީހުންގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން މުހައްމަދު އިބްރާހީމް ފަސް ދުވަހަށް ބަންދުކުރަން އަމުރުކޮށްފައިވެ އެވެ. އަދި، މުހައްމަދު އަލީ އާއި މުހައްމަދު ހަސަން ހަތް ދުވަހަށް ބަންދުކުރަން އަމުރުކޮށްފައިވެ އެވެ. މީގެ އިތުރުން، އަލީ އިރުފާން އަހުމަދުދީދީ 10 ދުވަހަށް އަދި އަނެއް ހަ މީހުން 15 ދުވަހަށް ބަންދުކުރުމަށް ވަނީ އަމުރުކޮށްފަ އެވެ.