ބޮލީވުޑްގެ މަޝްހޫރު ވެޓެރަން ދެ ތަރިން ކަމަށްވާ ޖާޔާ ބައްޗަންއާއި ރޭކާއަކީ ޒަމާންވީ ދެ ހަތުރުން ކަމަށް ބުނުމަކުން ދޮގަކަށް ނުވާނެ އެވެ. ނަތީޖާއަކަށްވީ އެ ދެތަރިންގެ މެދުގައި އަޅާކިޔުމާއި ތަފާތު ކުރުންތައް ގިނަވުމެވެ.

އެގޮތުން އެ ދެތަރިންނާއެކު އިންޑިއާގެ ސިޔާސީ މަޝްރަހުގައި މަސައްކަތްކުރާ މަޖިލިސް މެމްބަރެއް ކަމަށްވާ ރާޖީވް ޝުކްލާ ވެސް މިވަނީ މިފަހުން އެ ދެތަރިންގެ ތަފާތު މީޑިއާއަށް ކިޔައިދީފަ އެވެ.

ރާޖީވް ބުނީ މަޖިލީހުގައި ވެސް ޖާޔާގެ ހާޒިރުގައި އެއްވެސް މީހަކު ބަލައިނުގަނެވޭ ކަމެއް ކުރާނަމަ އޭނާ ހަނު ނުހުންނާނެ ކަމަށާއި އެމީހެއްގެ މޫނު މަތީގައި އެ ކަމެއްގެ ވާހަކަ ބުނާނެ ކަމަށެވެ. އެގޮތުން މީގެ ކުރިން މިނިސްޓަރުންނަށް ވެސް ޖާޔާގެ ރުޅިގަނޑު އަމާޒު ވެފައިވާ ކަމަށް ރާޖީވް ފާހަގަކުރި އެވެ.

އެއާއެކު ޖާޔާއަކީ މަޖިލީހުގެ ޖަލްސާތަކަށް ގަވާއިދުން ހާޒިރުވާ ކަމަށާއި އޭނާއަކީ މަސައްކަތަށް ވަރަށް ފަރުވާތެރި މީހެއް ކަމަށް ވެސް ރާޖީވް ބުންޏެވެ.

އެހެން ނަމަވެސް އެއާ ޚިލާފަށް ރޭކާއަކީ ސިޔާސީ ޝަހްސިއްޔަތެއްގެ ގޮތުގައި އޭނާ ބަލައިނުގަންނަ ކަމަށާއި މަޖިލީހުގެ ތަޅުމުން ވެސް ރޭކާ ފެންނާނީ ހާލަކުން ފަހަރަކު ކަމަށް ރާޖީވް ފާހަގަކުރި އެވެ.

ޖާޔާއާއި ރޭކާއަކީ ވެސް އިންޑިއާގެ ރައްޔިތުންގެ މަޖިލިސް ރާޖްޔާ ސަބާގެ ދެ މެމްބަރުންނެވެ. އެ މަޖިލީހުގެ މެމްބަރުކަން 2004 ވަނަ އަހަރުން ފެށިގެން ޖާޔާ ފުރަމުން އަންނައިރު ރޭކާ އިންތިހާބުވީ 2012 ވަނަ އަހަރު އެވެ.

ސިޔާސީ ދާއިރާގައި އެ ދެމީހުންގެ ވާދަވެރިކަމަށްވުރެ އާއްމުންގެ ސަމާލުކަން ލިބިފައިވަނީ މަޝްހޫރު އެކްޓަރު އަމީތާބު ބައްޗަންގެ ލޯބީގައި އެ ދެމީހުންގެ މެދުގައި ޖެހުނު މައްސަލައަށެވެ.

އެގޮތުން އަމީތާބާއި ރޭކާގެ ލޯބީގެ ގޮތުން ގުޅިގެން އުޅުނު ކަމަށް މީޑިއާގައި ވާހަކަ ދެކެވޭއިރު އަމީތާބު ކައިވެނިކުރީ ޖާޔާއާ އެވެ. މިއަދާ ހަމައަށް ވެސް ރޭކާ ކައިވެންޏެއް ނުކޮށް ހުރީ އެހެންވެ ކަމަށް ބުނެވެ އެވެ.