ކުރިއަށް އޮތް ލޯކަލް ކައުންސިލް އިންތިހާބާ ދިމާކޮށް ނ. ވިހަފަރުފަޅުގައި އެއާޕޯޓު އެޅުމަށް ބިން ހިއްކަން މިއަދު ފަށައިފި އެވެ.

އެ މަސައްކަތް ފެށުމަށް އެ ސަރަހައްދުގައި މިއަދު މެންދުރުފަހު ބޭއްވި ރަސްމިއްޔާތު ޝަރަފުވެރިކޮށްދެއްވީ ރައީސް މުހައްމަދު މުއިއްޒު އެވެ.

މިއަދުގެ މި ރަސްމިއްޔާތުގައި ޢަމަލީ ގޮތުން މިމަޝްރޫއު ފައްޓަވައިދެއްވީ އިކޮނޮމިކް މިނިސްޓަރު މުހައްމަދު ސައީދާއި އެމްއޭސީއެލްގެ މެނޭޖިން ޑިރެކްޓަރު އިބްރާހީމް ޝަރީފް މުހައްމަދެވެ.

ނ. ވިހަފަރުގައި އެއާޕޯޓެއް ތަރައްގީ ކުރުމަށް ރައީސުލްޖުމްހޫރިއްޔާގެ ގަރާރަކުން ކަނޑައަޅުއްވައި، އިއުލާންކުރެއްވީ 2024 ވަނަ އަހަރުގެ މާޗް މަހުގަ އެވެ.

ވިހަފަރަކީ ވެލިދޫ ކައިރީ އޮންނަ ގުދުރަތީ ރީތި ފަޅެކެވެ. އެއީ ރިސޯޓެއް ތަރައްގީކުރަން މިދިޔަ ސަރުކާރުން ނިންމާފައިވާ ފަޅެކެވެ.

ވެލިދޫގެ ގިނަ އަދަދެއްގެ ރައްޔިތުން އަންނަނީ ގުދުރަތީ ރީކަން ލިބިފައިވާ އެ ފަޅު ހަލާކުކޮށްލައިގެން އެއާޕޯޓް އެޅުމާ ދެކޮޅު ހަދާފަ އެވެ.

ވެލިދޫން ވާހަކަދެއްކި މީހަކު ބުނީ އެ ރަށު ރައްޔިތުންނަށް 20 މިނިޓުން ރ. އިފުރު އެއާޕޯޓަށް ދެވޭއިރު، އެ ރަށަށް އެއާޕޯޓެއް ބޭނުންނުވާ ކަމަށެވެ.

ރައްޔިތުން ބޭނުންވިގޮތަށް ސީޕްލޭންގެ ހިދުމަތް އެރަށުގައި ފެށިފައިވާ ކަމަށާއި އެއާޕޯޓު އަޅަން ގިނަ ރައްޔިތުން ދެކޮޅު ކަމަށް ވެސް އޭނާ ކިޔައިދިނެވެ.

"މިއީ އިންތިހާބަށް ޖަހާ ކަޑައެއް. އެ ފަޅު ހިއްކައިގެން އެއާޕޯޓެއް އަޅައިގެން ކޮން ފައިދާއެއްތޯ ވާނީ. އޭގެބަދަލުގައި ރިސޯޓެއް ތަރައްގީކުރީމަ މިރަށު ޒުވާނުންނަށް ވަޒީފާގެ އެތަކެއް ފުރުސަތުތަކެއް ލިބޭނެ. އަދި ދައުލަތަށް ބޮޑު އާމްދަނީއެއް ވެސް ލިބޭނެ،" އޭނާ ކިޔައިދިނެވެ.