ގދ. ފަރެސްމާތޮޑާގައި އެކަނިވެރި ހާލުގައި ދިރިއުޅެމުން ދިޔަ އުމުރުން ދުވަސްވީ މީހާއަށް އިހުމާލުވި އޭނާގެ ދަރިންގެ މައްސަލަ ކަމާބެހޭ މުއައްސަސާތަކަށް ހުށަހަޅާފައިވޭތޯ ބެލުމަށް، ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) ސޯޝަލް އެންޑް ފެމިލީ ޑިވެލޮޕްމަންޓް މިނިސްޓަރު ގީލާ އަލީ އަށް ސިޓީއެއް ފޮނުއްވައިފި އެވެ.

އުމުރުން 70 އަހަރުން މަތީގެ މި ފިރިހެން މީހާ ގިނަ ދުވަސްތަކަކަށް ފަހު ދައުލަތުގެ ބެލުމުގެ ދަށަށް ގެންގޮސްފައިވާއިރު، ރަށު ތެރެއިން މައުލޫމާތު ލިބޭ ގޮތުގައި އޭނާގެ ބޮޑެތިވެފައި ތިބި ދެ ދަރިން ތިބި ނަމަވެސް، ބައްޕައަށް އެއްވެސް އަޅާލުމެއް ދީފައެއް ނުވެ އެވެ. އެހެންކަމުން، އާއިލާއާ ބެހޭ ގާނޫނުގެ ދަށުން މައިންބަފައިންނަށް އަޅާނުލާ ދޫކޮށްލާ ދަރިންނާ މެދު ފިޔަވަޅު އެޅުމަށް މިނިސްޓްރީން އެ މައްސަލަ އިދާރާތަކަށް ހުށަހަޅާފައިވޭތޯ މެންބަރު ވަނީ ސުވާލު އުފައްދަވާފަ އެވެ.

މެންބަރު ކުޑޫ ފޮނުއްވި ސިޓީގައި ފާހަގަކުރައްވާފައިވާ ގޮތުގައި، އެ މީހާ ދެ އަހަރެއްހާ ދުވަހު ނިކަމެތި ހާލުގައި އުޅެންޖެހުނީ ދައުލަތުގެ ބެލުމުގެ ދަށަށް ގެންދިއުން ލަސްވުމުގެ ސަބަބުންނެވެ. އަދި އެކަން އެގޮތަށް ދިމާވީ ކ. ގުރައިދޫގައި ހުންނަ ހާއްސަ އެހީއަށް ބޭނުންވާ މީހުންގެ މަރުކަޒުން ޖާގަ ނުލިބިގެން ކަމަށް މައުލޫމާތު ލިބިފައިވާތީ، ޖާގަ ނެތް ކަމަށް ބުނެ އެފަދަ ނިކަމެތި ހާލަތެއްގައި އިންސާނަކު ދޫކޮށްލުމަކީ ދައުލަތުގެ އިހުމާލެއް ނޫންތޯ މެންބަރު ވަނީ ސުވާލު ކުރައްވާފަ އެވެ. މީގެ އިތުރުން އެފަދަ މަރުކަޒުތަކުގެ ޖާގަ އިތުރުކުރުމަށް ސަރުކާރުން ކުރަމުންދާ މަސައްކަތްތަކުގެ ތަފްސީލަށް ވެސް އެދިވަޑައިގެންފައިވެ އެވެ.

މަރުކަޒުތަކުން ޖާގަ ނުލިބޭ ހާލަތްތަކުގައި، ރަށު ފެންވަރުގައި ވަގުތީ އެހީތެރިއަކު ހަމަޖައްސައިގެން އެފަދަ ފަރާތްތައް ބެލެހެއްޓޭނެ އިންތިޒާމެއް ގާއިމުވެފައި ނެތް ސަބަބާއި، އުމުރުން ދުވަސްވީ މީހުންނަށް ދާއިމީ އެހީތެރިކަން ފޯރުކޮށްދޭނެ ގައުމީ ނިޒާމެއް އެކުލަވައިލުން ލަސްވާ ސަބަބު ވެސް ސިޓީ މެދުވެރިކޮށް ވަނީ އޮޅުންފިލުވަން އެދިވަޑައިގެންފަ އެވެ.

މިހާތަނަށް އެ މީހާގެ ޒަރޫރީ ކަންކަން ބަލަހައްޓަމުން އައީ ފަރެސްމާތޮޑާ ކައުންސިލާއި ރަށުގެ ޕޮލިސް ސްޓޭޝަނުން ގުޅިގެންނެވެ. އަދި އޭނާ ދިރިއުޅެމުން ދިޔަ ހާލަތު ގޯސްވުމުގެ ސަބަބުން، ދައުލަތުގެ ރައްކާތެރިކަމުގެ ދަށަށް ގެންގޮސްދިނުމަށް އެންމެ ބޮޑަށް އެދިފައިވަނީ ވެސް ކައުންސިލާއި ފުލުހުންގެ ފަރާތުންނެވެ.