މާލެ ސަރަހައްދުގައި ކުރިއަށް ގެންދިއުމަށް ނިންމާފައިވާ ސިއްހީ ދާއިރާގެ ބިޔަ މަޝްރޫއުތަކުގެ މަސައްކަތްތައް ބާރުދުވެލީގައި ކުރިއަށް ގެންދިއުމަށް ތައްޔާރުވަމުންދާ ކަމަށް ހެލްތު މިނިސްޓަރު ގީލާ އަލީ ވިދާޅުވެއްޖެ އެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު ވަނީ މާލެ، ވިލިމާލެ އަދި ހުޅުމާލެ ހިމެނޭހެން މާލެ ސަރަހައްދުގައި ތަރައްގީކުރުމަށް ރޭވިފައިވާ ބޮޑެތި ހޮސްޕިޓަލްތަކާއި ސިއްހީ މަރުކަޒުތަކުގެ ތަފްސީލުތައް ހިއްސާކުރައްވާފަ އެވެ.

އެގޮތުން ޗައިނާ ސަރުކާރުގެ ހިލޭ އެހީގެ ދަށުން ވިލިމާލޭގައި 100 އެނދުގެ ޓާޝަރީ ހޮސްޕިޓަލެއް ތަރައްގީކުރުމަށް ހަމަޖެހިފައިވާކަން ގީލާ ފާހަގަކުރެއްވި އެވެ. އަދި ހުޅުމާލެ ދެވަނަ ފިޔަވަހީގައި ކެންސަރު ބަލި ދެނެގަތުމަށް ހާއްސަކޮށްގެން ގާއިމުކުރާ 'ޑައިގްނޯސްޓިކް ސެންޓާ ފޯ އޮންކޮލޮޖީ ސާވިސަސް' ގެ އެއްބަސްވުމުގައި ކުރިއަށް އޮތް ދެ ހަފުތާ ތެރޭގައި ސޮއިކުރެވޭނެ ކަމަށް ވިދާޅުވި އެވެ.

މީގެ އިތުރުން ހުޅުމާލެ ދެވަނަ ފިޔަވަހީގައި ތަރައްގީކުރާ 500 އެނދުގެ މަލްޓި-ސްޕެޝަލިޓީ ހޮސްޕިޓަލުގެ އަމަލީ މަސައްކަތް ކުރިއަށް ގެންދާނެ އެންމެ އެކަށޭނަ ގޮތްތަކާ ގުޅޭގޮތުން މަޝްވަރާކުރަމުންދާއިރު، ފުރަތަމަ ފިޔަވަހީގައި ގާއިމުކުރާ 250 އެނދުގެ މަލްޓި-ސްޕެޝަލިޓީ ހޮސްޕިޓަލް މަޝްރޫއުގެ ފަންނީ މަޝްވަރާތައް ވެސް ކުރިއަށްދާ ކަމަށް އޭނާ ވިދާޅުވި އެވެ.

ހަމައެއާއެކު ބޭންކް އޮފް މޯލްޑިވްސް (ބީއެމްއެލް) ގެ މާލީ އެހީތެރިކަމާއެކު 'ނޭޝަނަލް ޑިސެބިލިޓީ ސަރވިސް އެންޑް ތެރަޕީ ސެންޓަރ' ތަރައްގީކުރުމުގެ މަސައްކަތް ހުޅުމާލޭގައި ބާރަށް ކުރިއަށްދާކަން މިނިސްޓަރު ފާހަގަކުރެއްވި އެވެ. އަދި ހުޅުމާލެ ދެވަނަ ފިޔަވަހީގައި ތެލެސީމިއާއާއި ލޭގެ ބަލިތަކަށް ހާއްސަކޮށްގެން ގާއިމުކުރާ 100 އެނދުގެ 'ތެލެސީމިއާ އެންޑް ހެމަޓޮލޮޖީ ހޮސްޕިޓަލް' ގެ މަޝްވަރާތައްވެސް ކުރިއަށްދާ ކަމަށް ވިދާޅުވި އެވެ.