ދިވެހިރާއްޖެ އިގްތިސާދީ އަނދަވަޅަކަށް ވެއްޓެމުންދާއިރު އެގޮތަށް ރާއްޖެ ދިއުމަށް ދޫކޮށް ނުލެވޭނެ ކަމަށް އެމްޑީޕީގެ ޗެއާޕާސަން، ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.

އެމްޑީޕީގެ ކޮންގްރެސް ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ނަޝީދު ވިދާޅުވީ، ރައްޔިތުންނަށް ކަމެއް ކޮށްދިނުމުގެ އެއްވެސް ހިޔާލެއް ނެތި ސަރުކާރުން ކުރަމުންދާ ކަމަކީ ރައްޔިތުންނަށް އޮޅުވާލައި މަކަރު ހެދުން ކަމަށެވެ. އަދި ރައީސް މުއިއްޒުގެ ސަރުކާރު ބަދަލުކޮށް އަނެއްކާވެސް ރާއްޖޭގެ ރައްޔިތުންނަށް އެމްޑީޕީން ހެޔޮވެރިކަމެއް ކޮށްދޭނެ ކަމަށް އެމަނިކުފާނު ވިދާޅުވި އެވެ.

ސަރުކާރުގެ ހަމައެކަނި އަމާޒަކީ ދޮގު ހެދުމާއި، އޮޅުވާލުމާއި، މަކަރު ހެދުން ކަމަށް ސިފަކުރައްވަމުން ނަޝީދު ވިދާޅުވީ، ރާއްޖޭގެ ރައްޔިތުންނަށް ކަމެއް ކޮށްދިނުމުގެ ކުޑަ ހިޔާލެއްވެސް ސަރުކާރުގެ ނެތް ކަމަށެވެ. އަދި ލާހޫރޭ އިގްތިސާދީ ސިޔާސަތުތަކެއްގެ ސަބަބުން ދިވެހިރާއްޖެ ކަނު ބަނދެވިގެން އަނދަވަޅަކަށް ވެއްޓެމުންދާއިރު، އެމްޑީޕީން އެ މަގަށް ރާއްޖެ ދިއުމަށް ދޫނުކުރާނެ ކަމަށް އެމަނިކުފާނު ފާހަގަކުރެއްވި އެވެ.

"ބަތްކައްކާ ކުޅުން މީޒާނެއް ނެތް. ލާހޫރޭ އިގްތިސާދީ ސިޔާސަތުތަކެއް މި ދިވެހިރާއްޖެ މިގެންދަނީ ކަނު ބަނދެވިގެން ތިބެ އަނދަވަޅަކަށް ވެއްޓުމަށް. އަޅުގަނޑުމެންނެއް މި ޕާޓީއެއް އެ މަގަށް މި ރާއްޖެ ދިއުމަކަށް ދުލެއް ނުކޮށްލެވޭނެ،" ނަޝީދު ވިދާޅުވި އެވެ.

އެމްޑީޕީގެ ކޮންގްރެސް ފެށުމުގެ ރަސްމިއްޔާތުގެ ތެރެއިން --- ފޮޓޯ: އެމްޑީޕީ

އޭގެއިތުރުން، ރައީސް މުއިއްޒުގެ ސަރުކާރު ބަދަލުކޮށް، ދިވެހި ރައްޔިތުންގެ ޑިމޮކްރެޓިކް ޕާޓީގެ ސަރުކާރެއް އުފައްދައިގެން ރައްޔިތުންނަށް ހެޔޮ ވެރިކަމެއް ހޯދައިދެއްވާނެ ކަމަށް ނަޝީދު ވިދާޅުވި އެވެ. ސަރުކާރުން ގެންގުޅޭ ސިޔާސަތުތައް ފެއިލްވެފައިވާކަން ފާހަގަކުރައްވަމުން، ދަރަނި އަދާކުރުމުގެ އެއްވެސް ސިޔާސަތެއް ސަރުކާރުގައި ނެތް ކަމަށާއި ބޭރުން ފައިސާ ހޯދުމުގެ ގާބިލުކަމެއްވެސް ނެތް ކަމަށް އެމަނިކުފާނު ވިދާޅުވި އެވެ.

އެމްޑީޕީގެ ކޮންގްރެސްގެ މަސައްކަތްތައް ކުރިއަށްދާ ގޮތަށް ބަލާއިރު، އިފްތިތާހީ ރަސްމިއްޔާތަށްފަހު މާދަމާ މެންދުރުފަހުން ފެށިގެން ރޭގަނޑުގެ ނިޔަލަށް އިންވެސްޓްމަންޓް ފޯރަމެއް ބޭއްވުމަށް ވަނީ ހަމަޖެހިފަ އެވެ. އަދި ހޮނިހިރު ދުވަހުގެ ހެނދުނުން ފެށިގެން ކޮންގްރެސްގެ ރަސްމީ މަސައްކަތްތައް ކުރިއަށްގެންދިއުމަށް ވަނީ ރޭވިފަ އެވެ.