ކައުންސިލްތަކުގެ ކަންކަން ބަލަހައްޓާ މައި އިދާރާ ކަމަށްވާ ލޯކަލް ގަވަރމަންޓް އޮތޯރިޓީ (އެލްޖީއޭ) އަށް މިއަހަރަށް ރައްޔިތުންގެ މަޖިލީހުން ކަނޑައަޅައި ފާސްކޮށްދިން ބަޖެޓަށް ވުރެ އިތުރަށް 13 މިލިއަން ރުފިޔާ އެ އިދާރާއިން ހަރަދުކޮށްފައިވާކަން ފިނޭންސް މިނިސްޓްރީގެ ތަފާސްހިސާބުތަކުން ހާމަވެއްޖެ އެވެ.

ފިނޭންސް މިނިސްޓްރީން އާންމުކޮށްފައިވާ ދައުލަތުގެ އާމްދަނީއާއި ހަރަދުގެ އެންމެ ފަހުގެ ހިސާބުތައް ދައްކާ ގޮތުގައި، މިދިޔަ މަހުގެ 24 ވަނަ ދުވަހުގެ ނިޔަލަށް އެލްޖީއޭއިން ވަނީ ޖުމްލަ 51 މިލިއަން ރުފިޔާ ހަރަދުކޮށްފަ އެވެ. ނަމަވެސް، މިއަހަރަށް ރައްޔިތުންގެ މަޖިލީހުން އެ އޮތޯރިޓީއަށް ފާސްކޮށްދީފައިވަނީ 38.1 މިލިއަން ރުފިޔާގެ ބަޖެޓެކެވެ.

މިއީ ފާސްކޮށްދިން އަދަދަށް ވުރެ 34 އިންސައްތަ ނުވަތަ 13 މިލިއަން ރުފިޔާގެ އިތުރުވުމެކެވެ. މީގެއިތުރުން، މިދިޔަ އަހަރުގެ މި މުއްދަތާ އަޅާބަލާއިރު ވެސް އެލްޖީއޭގެ ހަރަދުތައް ވަނީ ބޮޑުތަނުން އިތުރުވެފަ އެވެ. އެގޮތުން މިދިޔަ އަހަރުގެ އެ މުއްދަތުގައި އެލްޖީއޭއިން ހަރަދުކުރީ 25 މިލިއަން ރުފިޔާ ކަމަށްވާއިރު، މިއަހަރުގެ މިހާތަނަށް އެ އަދަދު ވަނީ 26 މިލިއަން ރުފިޔާ އިތުރުވެފަ އެވެ.

ކައުންސިލްތަކަށް ސަރުކާރުގެ ބަޖެޓުން ދޫކުރާ ބްލޮކް ގްރާންޓް ފައިސާއަކީ ހާއްސަ ވަކި ބަޖެޓެއްގެ ދަށުން ދޭ ފައިސާއަކަށް ވުމާއެކު، އެލްޖީއޭގެ ބަޖެޓަށް ވުރެ އިތުރަށް މިހާ ބޮޑު ހަރަދެއް ހިނގަން މެދުވެރިވި ސަބަބެއް އަދި މިހާތަނަށް ސާފުވާ ގޮތެއް ނުވެ އެވެ.

އެލްޖީއޭއާ އެއްގޮތް ޒިންމާތަކެއް އަދާކުރަމުން ދިޔަ ސިޓީސް އަދި ލޯކަލް ގަވަނަންސް މިނިސްޓްރީ ދާދިފަހުން އުވާލިއިރު، އެ ވުޒާރާއިން ވަނީ 68 މިލިއަން ރުފިޔާ ހަރަދުކޮށްފަ އެވެ. އެ މިނިސްޓްރީއަށް މިއަހަރަށް 158 މިލިއަން ރުފިޔާގެ ބަޖެޓެއް ފާސްކޮށްފައި އޮތުމުން، އުވާލިއިރު ބަޖެޓުގައި 90 މިލިއަން ރުފިޔާ ބާކީ ހުއްޓެވެ. މިހާރު އެ ވުޒާރާގެ މަސައްކަތްތައް ވަނީ ހައުސިން މިނިސްޓްރީއާއި ފިނޭންސް މިނިސްޓްރީގެ ދަށަށް ބަހާލާފަ އެވެ.

ފާހަގަކޮށްލެވޭ ގޮތުގައި، ދައުލަތުގެ އެހެން އެއްވެސް މުއައްސަސާއަކުން މިއަހަރުގެ މިހާތަނަށް ބަޖެޓަށް ވުރެ އިތުރަށް ހަރަދުކޮށްފައެއް ނުވެ އެވެ. ރައްޔިތުންގެ މަޖިލީހުން މިއަހަރަށް ފާސްކޮށްދިން 64.2 ބިލިއަން ރުފިޔާގެ ޖުމްލަ ބަޖެޓުގެ 71 އިންސައްތަ (46 ބިލިއަން ރުފިޔާ) މިހާރު ހަރަދުވެފައިވާއިރު، އާމްދަނީއާއި ހިލޭ އެހީގެ ގޮތުގައި ދައުލަތަށް ލިބިފައިވަނީ 30.2 ބިލިއަން ރުފިޔާ އެވެ.