ޗައިނާގެ ސިޗުއާން ޕްރޮވިންސްގެ އުސް، ސްނޯއިން ފޮރުވިފައިވާ ފަރުބަދަތަކުގެ މެދުގައި ފޮރުވިފައިވާ ޖިއުޒައިގޫ ނެޝަނަލް ޕާކަކީ އިންސާނެއްގެ އަތުން ފަރުމާކުރެވިދާނެ ކަމަށް ގަބޫލު ކުރަން ދަތި މާތް ﷲގެ ކުޅަދުންވަންތަކަން ހާމަކޮށްދޭ މަންޒިލެކެވެ.
"ޖިއުޒައިގޫ" މިއަކުރުގެ މާނައަކީ ނުވަ އަވަށުގެ ވާދީ އެވެ. އެއީ އެ ސަރަހައްދުގައި އެތައް ގަރުނެއް ވަންދެން ދިރިއުޅެމުން އަންނަ ތިބެތީ ގަދީމީ އަވަަށްތަކަށް ނިސްބަތްކޮށް ދެވިފައިވާ ނަމެކެވެ.
ނަމަވެސް، މި ވާދީއަށް ޒިޔާރަތްކުރާ ކޮންމެ ދަތުރުވެރިއެއްގެ ހިތް އަތުލައިގަންނަނީ އެތަނުގައިވާ ކުލަރީތި، ސާފު ފެންގަނޑުތަކާއި، އެކި މޫސުންތަކަށް ބަދަލުވަމުންދާ ޖަންގަލީގެ ރީތިކަމެވެ.
ޖިއުޒައިގޫގެ އެންމެ ބޮޑު އަޖައިބަކީ އެތަނުގައިވާ ސާފު، ނޫ އަދި ފެންފިއްޔާ ކުލައިގެ ފެންގަނޑު ތަކެވެ. މީގެ ތެރެއިން އެންމެ މަޝްހޫރު އެކަކީ "ފައިވް ފްލާވާ ލޭކް" އެވެ.
މި ފެންގަނޑުގެ އަޑީގައި ހުންނަ ކެލްސިއަމް ކާބޮނޭޓް މައިކްރޯ-އެލިމެންޓްތަކުގެ ސަބަބުން، އިރާއި ހިޔަނީގެ ކުޅިވަރާއެކު ފެންގަނޑުގެ ކުލަ ނޫ، ފެންފިއްޔާ، ރަންކުލަ އަދި ފަރުމާ ކުލައަށް ބަދަލުވަމުންދެ އެވެ.
ފެންގަނޑު އެއްކޮށް ސާފުކަމުން، އަޑީގައި އޮންނަ ގަދީމީ ގަސްގަނޑުތަކާއި ކުދި މަސްތައް ވަރަށް ސާފުކޮށް ފެންނަން ހުރެ އެވެ. މިއީ ހަގީގަތުގައިވެސް ކެމެރާއަކަށް ނަގައިގަންނަން ދަތި، އަމިއްލަ ލޮލުން ދެކެގެން މެނުވީ ގަބޫލު ކުރަން ދަތި މަންޒަރެކެވެ.
މި ވާދީގެ އަނެއް ގުދުރަތީ އަޖައިބަކީ ކެސްކޭޑް އުސޫލުން ފައިބާ ފެންއާރުތަކެވެ. މީގެ ތެރެއިން "ޕާލް ޝޯލް ވޯޓާފޯލް"އަކީ ފުޅާކޮށް، ގަލުގެ މަތިން ކުދި މުތީތަކެއް ފަދައިން ފެންތިކިތައް ބުރުވަމުން އޮއްސޭ ވަރަށް ފުރިހަމަ އާ ފެންއާރެކެވެ.
ޕާކުގެ މެދުގައިވާ "ނުއޯރިލާންގް ވޯޓާފޯލް"އަކީ ޗައިނާގެ އެންމެ ބޮޑު ތާޒާ ފެނުގެ ފެންއާރެވެ. ބާރު އަޑަކާއެކު ފަރުބަދަތަކުގެ ތެރެއިން އޮހޭ މި ފެންއާރުތަކުގެ ކައިރީގައި ހުންނައިރު، ގުދުރަތުގެ ބާރު ފުންކޮށް އިހްސާސް ކުރެވޭނެ އެވެ.
ޖިއުޒައިގޫއަށް ޒިޔާރަތް ކުރުމަށް އެންމެ ރަނގަޅު ދުވަސްވަރަކީ ހަރީފު މޫސުމެވެ. އެ ދުވަސްވަރު ވާދީ ވަށައިގެންވާ ބޮޑެތި ޖަންގަލިތަކުގެ ފަތްތައް ރަތް، ރަން، އަދި އޮރެންޖު ކުލައަށް ބަދަލުވެގެންދެ އެވެ.
މި ކުލަތައް ސާފު ފެންގަނޑުގެ މައްޗަށް އެޅިގެންދާއިރު، މުޅި ޕާކު ސިފަވަނީ ކުރެހުންތެރިއަކު ކެންވަހެއްގައި ކުރަހާފައިވާ އާދަޔާހިލާފު ތަސްވީރެއްގެ ގޮތުގަ އެވެ.
ވަޔާއެކު އަންނަ ސާފު ފިނިރޯޅިއާއި، ގުދުރަތީ ހިމޭންކަން އެކުވެގެން ދަތުރުވެރިޔާއަށް ގެނެސްދެނީ ސިކުނޑިއަށް އިންތިހާއަށް އަރާމު އަދި އުފާވެރިކަމެކެވެ.
ޖިއުޒައިގޫއަކީ ހަމައެކަނި ރީތި މަންޒަރުތަކެއް ބަލާލަން ދާ ތަނެއް ނޫނެވެ. އެއީ ދުނިޔޭގެ ހަލަބޮލިކަމާ ދުރަށްގޮސް، ގުދުރަތީ އަޖައިބުތަކުގެ ތެރެއަށް ގެނބި، އިންސާނާގެ ރޫހަށް ތާޒާކަން ހޯދައިދޭނެ މަންޒިލެކެވެ.
