އަންމުކޮށް ހީވެފައި އޮންނަނީ އެގޭ ފާތުމަ ބޯ ދޮންނަ މިންވަރަށް މިގޭ އައިޝާ ވެސް ބޯ ދޮންނަށް ޖެހޭނެ ކަމަށެވެ. ނަމަވެސް ހަގީގަތަކީ އަދި މުޅިން އެހެން އެއްޗެކެވެ. ފަހުގެ ދިރާސާތަކުން ހާމަވާ ގޮތުގައި ބޯ ދޮންނަން ޖެހޭ މިނަވަރު އެކި މީހުން ތަފާތެވެ. އެއީ އެ މީހެއްގެ އިސްތަށިގަނޑުގެ ސިއްހީ ހާލަތަށް ރިއާޔަތްކޮށެވެ.
އެކި މީހުންގެ އިސްތަށިގަނޑު ތަފާތެވެ. ތުނި އިސްތަށިގަނޑާއި، ބޯ އިސްތަށިގަނޑެވެ. ތެޔޮކަން ގަދަ، ކުލަ ގަދަ އިސްތަށިގަނޑާއި އެނޫން އިސްތަށިގަނޑެވެ. ބޯ ދޮވުމުގައި އިސްތަށިގަނޑުގެ އުފެދުމާއި ސިއްހީ ހާލަތުގެ އިތުރުން އެ މީހަކު ހެލިފެލިވެ އުޅޭ މިންވަރަށް ވެސް ބަލަންޖެހެ އެވެ.
ބޯ ނުދޮންނަ ނަމަ ދިމާވެދާނެ ސިއްހީ މައްސަލަތައް:
އިސްތަށި ބުޑުން "ސިބަމް" ކިޔާ ތެލެއް ގުދުރަތީ ގޮތުން އަބަދުވެސް އުފައްދަ އެވެ. ބޯ ނުދޮވެ ގިނަ ދުވަސް ވުމުން އެ ތެޔޮތައް ގިނަވެ ފަންގަސް "މެލެއްސީޒިއާ"ގެ ކާނާ އަކަށް ވެ އެވެ. އޭގެ ސަބަބުން ފަންގަސް ދިރިއުޅޭ ސަރަހައްދު ހިރުވާ، ހަންފޮޅެން ދިމާވެ އެވެ. މީގެ އިތުރުން އިސްތަށި ބުޑަށް ޖަމާވާ "ސިބަމް"ގެ ސަބަބުން ބޮލުގެ ހަނގަނޑު ދުޅަވެ، ތަދުވާން ފަށަ އެވެ.
ބޯ ދޮންނަން ބޭނުންކުރާ ޝޭމްޕޫގެ ސަބަބުން އިސްތަށީގެ ބުޑުގައިވާ ކުނިބުނި ނައްތާލަ އެވެ. ކޮންމެ ދުވަހަކު ބޯ ދޮންނަ ނަމަ، ބޮލުގެ ހަންގަނޑު ދުޅަހެޔޮކޮށް ބަހައްޓަދޭ ކަމަށް ފަހުގެ ހޯދުންތަކުން ދައްކަ އެވެ.
އިސްތަށިގަނޑުގެ ވައްތަރުތަކާއި ދޮންނަންޖެހޭ އަވަސް މިން
- އޮއިލީ ނުވަތަ ތެޔޮކަން ގަދަ އިސްތަށިގަނޑު: އާދަޔާހިލާފަށް ތެޔޮކޮށް ހުންނަ އިސްތަށިގަނޑެއް ނަމަ، ބޯ ދޮންނަށް ޖެހޭނީ އާންމު ގޮތެއްގައި ހަފްތާއަކު އެއްފަހަރު ނުވަތަ ދެ ފަހަރު އެވެ. އެއީ ބޮލުގައި ގިނަވާ ތެޔޮތައް ދޮވެ އިސްތަށިގަނޑު ސާފުކުރުމުގެ ގޮތުންނެވެ.
އެއްވެސް މައްސަލައެއް ނުހުންނަ އިސްތަށިގަނޑެއް ނަމަ، ހަފްތާއަކު ދެފަހަރު ނުވަތަ 4 ފަހަރު ދޮވެލުމުން ރަނގަޅުވާނެ އެވެ.
ބޯއަދި ބުޅި އިސްތަށިގަނޑެއް ނަމަ، ހަފްތާއަކު އެއްފަހަރު ނުވަތަ ދެފަހަރަކު ދޮވެލުމުން ފުދޭނެ އެވެ. އެއީ އިސްތަށިގަނޑުގައިވާ ގުދުރަތީ ތެޔޮތައް ބޮލުން ފައިބަން ގިނައިރު ނަގާތީ އެވެ.
ބޯދޮވެ ސާފު ކުރުމަކީ އިސްތަށިގަނޑުގެ އެކި ސިއްހީ މައްސަލަތަކުން ސަލާމަތް ކޮށްދޭ ކަމެކެވެ. ބޯ ދޮންނަށް ޖެހޭ މިންވަރު ކަނޑައަޅާނީ އެ މީހެއްގެ އިސްތަށިގަނޑުގެ ހާލަތަށް ރިއާޔަތްކޮށެވެ.
