ދިވެހިރާއްޖޭގެ އާންމު އިޖުތިމާއީ މިންގަނޑުތަކާ ހިލާފަށް، ނިވާކަން ކުޑަ ހެދުން އަޅައިގެން އާންމު ތަންތަނުގައި އުޅޭ ބިދޭސީންނާ މެދު ގާނޫނީ ފިޔަވަޅު އަޅާނެ ކަމުގެ އިންޒާރު މޯލްޑިވްސް ޕޮލިސް ސާވިސް އިން މިއަދު ދީފި އެވެ.

ފުލުހުން ނެރުނު ބަޔާނެއްގައި ބުނެފައިވާ ގޮތުގައި، ރާއްޖޭގައި ދިރިއުޅޭ ބައެއް ބިދޭސީން މިފަހަކަށް އައިސް މުޖުތަމައުގެ އަދަބު އަހުލާގީ މިންގަނޑުތަކާ ފުށުއަރާ ގޮތަށް، ނިވާކަން ކުޑަ ހެދުން ލައިގެން މަގުމައްޗާއި އާންމު ތަންތަނުގައި ހަރަކާތްތެރިވަމުންދާކަން ވަނީ ފާހަގަކުރެވިފަ އެވެ.

މިފަދަ އަމަލުތަކަކީ ދިވެހި މުޖުތަމައުގެ އާންމު ސުލޫކާއި ސަގާފަތާ ބީރައްޓެހި، އަދި އިޖުތިމާއީ ހަމަޖެހުމާއި ސުލްހަ މަސަލަސްކަމަށް ބުރޫއަރާފާނެ ކަންކަން ކަމަށް ފުލުހުން ބުނެފައިވެއެވެ. އެހެންކަމުން، މިފަދަ ނޭދެވޭ ކަންކަން މުޖުތަމައުގައި ފެތުރުނަ ނުދިނުމަށާއި، އަމަންއަމާންކަން ދެމެހެއްޓުމަށްޓަކައި އަޅަންޖެހޭ އެންމެހައި ފިޔަވަޅުތައް އަޅާނެ ކަމަށް ވަނީ ހާމަކޮށްފަ އެވެ.

ފުލުހުންގެ ބަޔާނުގައި ބުނީ، މިފަދަ އަމަލުތައް ހުއްޓުވުމަށްޓަކައި ފުލުހުންގެ މައްޗަށް ގާނޫނުން ލާޒިމުކުރާ ޒިންމާތައް އަދާކުރާނެ ކަމަށެވެ. އެގޮތުން ގާނޫނު ނަންބަރު 11/2010 (އާންމު އިޖުތިމާއީ މިންގަނޑުތަކާ ހިލާފު އަމަލުތައް ހުއްޓުވުމުގެ ގާނޫނު) ގެ ދަށުން، އެފަދަ ފަރާތްތަކާ މެދު ގާނޫނީ ގޮތުން އެޅެންހުރި އެންމެ ހަރުކަށި ފިޔަވަޅުތައް އަޅަމުން ގެންދާނެ ކަމުގެ އިންޒާރު ވެސް ވަނީ ދީފަ އެވެ.

މީގެއިތުރުން، ބިދޭސީން ގެންގުޅޭ އެންމެހައި ފަރާތްތަކުން ވެސް، އެ ފަރާތްތަކުގެ ދަށުން މަސައްކަތްކުރާ ބިދޭސީންގެ ކިބައިން މިފަދަ ކަންކަން ތަކުރާރު ނުވާނޭހެން އަމަލުތައް ބެހެއްޓުމަށް ނަސޭހަތްތެރިވެ، އެމީހުން ހޭލުންތެރިކުރުވުމަށް ފުލުހުން ވަނީ އިލްތިމާސްކޮށްފަ އެވެ.

ހަމައެއާއެކު، ރާއްޖެއަށް ޒިޔާރަތްކުރާ ފަތުރުވެރިންނަށް ހާއްސަކޮށްފައިވާ ވަކި ސަރަހައްދުތައް ފިޔަވައި، އެހެނިހެން މީހުން ދިރިއުޅޭ ރަށްރަށުގެ މަގުތަކާއި އާންމު ތަންތަނުގައި އުޅޭއިރު، އިސްލާމީ ރިވެތި އުސޫލުތަކާއި ދިވެހި މުޖުތަމައުގެ ސަގާފަތާއި އާދަކާދަތަކަށް އިހުތިރާމު ކުރުމަށް ފުލުހުން ވަނީ ހަނދާންކޮށްދީފަ އެވެ. އަދި މި އުސޫލުތަކާ ހިލާފުވާ ކޮންމެ މީހަކާ މެދުގައި ވެސް އިސްތިސްނާއެއް ނެތި ފިޔަވަޅު އަޅާނެ ކަމަށް ފުލުހުންގެ ބަޔާނުގައި ވެއެވެ.