ބ. ދަރަވަންދޫގައި ރޭ ޓެރަރިޒަމާ ދެކޮޅަށް ހިންގި އޮޕަރޭޝަންގައި ފުލުހުން ހައްޔަރުކުރީ ލ.ގަން، ދުންފިނި އުފާ، އަހުމަދު ފާތިހު އެވެ. ފާތިހުއަކީ ކުރީގެ ރައީސް، ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަވަހާރަކޮށްލަން ވެގެން އައިއީޑީ ހުރި ސައިކަލު ކެނެރީގެ ކައިރީގައި ޕާކުކުރި މީހާ އެވެ.

ފާތިހު މިއަދުގެ ވަގުތެއްގައި ވަނީ މާލެ ގެނެސްފަ އެވެ. މިއީ ނަޝީދު އަވަހާރަކޮށްލަން ދިން ޓެރަރިސްޓު ހަމަލާއާ ގުޅިގެން ހައްޔަރުކުރި ހަތަރު ވަނަ މީހާ އެވެ. ރޭ ފުލުހުން ހިންގި އޮޕަރޭޝަނެއްގެ ދަށުން ދަރަވަންދޫން ފާތިހު ހައްޔަރުކޮށް އޭނާ ގެންގޮސްފައި އޭދަފުއްޓަށެވެ. އެއީ އޭނާ ކޮވިޑް-19އަށް ޓެސްޓު ކުރުމަށެވެ.

އޭނާ ދަރަވަންދޫއަށް ދިޔައީ މީހަކާ ކައިވެނިކުރަން މި މަހުގެ 10 ވަނަ ދުވަހު އެވެ.

ނަޝީދަށް ހަމަލާދިނުމުގެ ތުހުމަތުގައި ފުލުހުން މީގެ ކުރިން ހައްޔަރުކުރި ތިން މީހުންނަކީ ފުލުހުން ހައްޔަރުކޮށްފައި ވަނީ މއ. ފޭރުގެ މުޖާޒް އަހުމަދު އާއި ގއ. ކޮނޑޭ ފޮޅޭމާ ތަހުމީން އަހުމަދު އަދި ވ. ތިނަދޫ އަހުމަދު އަދުހަމް އެެވެ. އެ ތިން މީހުންގެ ތެރެއިން އަދުހަމްއަކީ ހަމަލާ ދިނުމުގައި އިސްކޮށް އުޅުނު މީހާ އެވެ.