ށ. ނަރުދޫގައި ދެ ފާރު ދޭތެރޭގައި ތާށިވި ކުއްޖަކު ފާރު ތަޅާލައިގެން ސަލާމަތްކޮށްފި އެވެ.

އެކަން ހިނގި ގޮތުގެ މައުލޫމާތު ދެއްވަމުން ނަރުދޫ ކައުންސިލްގެ ރައީސް މުހައްމަދު މުސްތަރުސިދު ވިދާޅުވީ ހަތަރު އަހަރުގެ ފިރިހެން ކުއްޖާ ތާށިވީ ގޭގެ އިންފާރާއި ގޭގެ ފާރާ ދޭތެރޭގައި ކަމަށެވެ. އެ ދެ ފާރު ރާނާފައި ހުރި ގޮތުން، ބޭރަށް ހުންނަ ހިސާބުން ހުންނަނީ ފުޅާކޮށް، އެތެރެއަށް ވަދެވޭ ގޮތަށް ކަމަށާއި އެތެރެއަށް ދިޔަ ވަރަކަށް ވަނީ ހަނި ކަމަށް ކައުންސިލް ރައީސް ވިދާޅުވި އެވެ.

ހަތަރު އަހަރުގެ އެ ކުއްޖާދެ ފާރު ދޭތެރެއަށް މާބޮޑަށް ވަނުމުގެ ސަބަބުން ވަނީ ވަރަށް ބޮޑަށް ތާށިވެފަ އެވެ.

އެކުއްޖާ ސަލާމަތް ކޮށްފައިވަނީ އެރަށު ގިނަ ބައެއްގެ އެހީތެރިކަމާ އެކީގަ އެވެ. ކުއްޖާ ސަލާމަތްކުރީ އެ ކުއްޖާ އަށް ނުކުމެވޭ ވަރަށް ފާރުން ބާގަނޑެއް ހަދައިގެންނެވެ.

ކައުންސިލްގެ ރައީސް ވިދާޅުވީ، އެ ހާދިސާ ހިނގީ އެ ކުއްޖާގެ މަންމަ ކާން ހުރި ވަގުތުގައި ކަމަށެވެ. އަދި ކުއްޖާ ސަލާމަތްކޮށް ބެލިބެލުމުން އަނިޔާއެއް ލިބިފައިނުވާކަން ޔަގީން ކުރެވިފައިިވާ ކަމަށް ވެސް އޭނާ ވަނީ ވިދާޅުވެފަ އެވެ.

"އިދާރަކުރެއްވިއްޔާ ކުއްޖާއަކަށް ނުލިބޭ އެއްވެސް އަނިޔާއެއް. ގައިގައި ހިރަފުސް ޖެހިފައި ހުރީ. އިތުރު ކަމެއް ނުވޭ،" މުހައްމަދު ވިދާޅުވި އެވެ.