ޓެރަރިޒަމާ ދެކޮޅަށް ފުލުހުން ތ. ތިމަރަފުށީގއި ކުރިއަށް ގެންދިޔަ އޮޕަރޭޝަންގައި ހައްޔަރުކުރި އެންމެންގެ ބަންދު ކްރިމިނަލް ކޯޓުން ދަމަހައްޓައިފި އެވެ.

ތިމަރަފުށީގައި ހަރުކަށި ފިކުރުގެ ހަރަކާތްތައް ހިންގައި އައިއީޑީއެއް ގޮއްވާލަން އުޅުނުކަމުގެ ތުހުމަތަށް ދައުވާކޮށްފައިވާ އަށް މީހުން ޝަރީއަތް ނިމެންދެން ބަންދުކުރީ އެ މީހުންގެ ފަރާތުން މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެ ކަމަށް ބެލެވޭތީ އެވެ.

މިއަހަރުގެ ފެބްރުއަރީ މަހު ފުލުހުން ތިމަރަފުށީގައި ކުރިއަށް ގެންދިޔަ އެ އޮޕަރޭޝަނެއްގައި ހައްޔަރުކޮށްފައި ވަނީ، ފެހިވިދުވަރުގެ، އަބްދުﷲ ޝަރީފް އާއި، ތ. ތިމަރަފުށި، ކެނެރީގެ، އަލީ މުނީޒު އާއި ތ. ތިމަރަފުށި، އަސުރުމާގެ، މުހައްމަދު އާސިރު އާއި، ތ. ތިމަރަފުށި، އަސްރަފީވިލާ، އަހުސަން މުހައްމަދު އާއި، ރ. މަޑުއްވަރި، ބީޗްހައުސް އަބްދުﷲ އިމާދު އާއި، ތ. ތިމަރަފުށި، ސައިމާ، ޝަމާހު ޝަރީފާއި، ނ. ކުޑަފަރި، ރޯޒްމީޑު، އިބްރާހިމް ލޫތު އާއި، ރ. ކަނދޮޅުދޫ، ފެހިވިލާ، އަލީ އަރުހަމް މުހައްމަދެވެ.

އެ ހުރިހާ މީހުންގެ ޝަރީއަތް ނިމެންދެން ބަންދު ކުރަން ކްރިމިނަލް ކޯޓުން މީގެ ކުރިން ނިންމާފައިވާއިރު، މިއަދު ވަނީ އެ އަމުރު މުރާޖައާކުރުމުގެ އަޑުއެހުމެއް ބާއްވައިފަ އެވެ. ކޮންމެ 30 ދުވަހަކުން ބަންދު ރިވިއު ކުރުމަކީ ޖިނާއީ އިޖުރާއަތުގެ ގާނޫނުގެ ދަށުން ކުރަން ލާޒިމުކުރާ ކަމެކެވެ.

ތ. ތިމަރަފުށިން ޓެރަރިޒަމްގެ ތުހުމަތުގައި ހައްޔަރުކުރި މީހުން

އެގޮތުން އަމުރު މުރާޖާކުރުމަށް މިއަދު ބޭއްވި އަޑު އެހުމުގައި ދައުލަތުން ބުނީ، އެ އަށް މީހުންނަކީ ހަރުކަށި ފިކުރުގެ ނުރައްކާތެރި ބައެއް ކަމަށެވެ. އެ މީހުންނަކީ ފަނޑިޔާރުގެ ހިމެނޭހެން މުޅި ދައުލަތް ވެސް ބަލައިނުގަންނަ ބައެއް ކަމަށާއި ދައުލަތުގެ ތަންތަނުގައި ވަޒީފާ އަދާކުރުން ވެސް އެ މީހުން ގަބޫލުނުކުރާ ކަމަށާއި، ފަނޑިޔާރުންނަށް ވެސް އެ މީހުން "ތާޣޫތުން"ގެ ގޮތުގައި ނިސްބަތްކޮށްފައި އެބަ ހުރިކަމަށެވެ.

ތުހުމަތުކުރެވޭ މީހުންގެ ނުރައްކާތެރިކަން ދެއްކުމަށް ދައުލަތުން ބުނީ، އެ މައްސަލައިގައި ހިމެނޭ އަރުހަމަކީ ހަތިޔާރު އުފެއްދުމުގެ ގާބިލުކަން ހުރި މީހެއް ކަމަށް ފުލުހުންގެ އިންޓެލިޖެންސް ރިޕޯޓުން އެނގޭ ކަމަށެވެ. އޭނާ ދިރިއުޅޭ ގެއިން ވެސް އައިއީޑީއެއް އުފައްދަން ބޭނުންވާ ފަދަ ސާމާނު ފެނިފައިވާ ކަމަށެވެ.

ދައުލަތުގެ އެ ވާހަކަތާ ގުޅިގެން އަރުހަމް ބުނެފައި ވަނީ އޭނާ ދިރިއުޅުނު ގެ ފުލުހުން ބަލައި ފާސްކުރީ ގާނޫނާ ހިލާފަށް ކަމަށެވެ. އިންޓެލް ރިޕޯޓުގައި އޭނާގެ އުފަން ދުވަސް ވެސް އޮތީ ނުބައިކޮށް ކަމަށް ބުނެ އޭގެ ސައްހަކަމާ މެދު އޭނާ ސުވާލު އުފެއްދި އެވެ. ރާއްޖެއިން ބޭރަށް ހަނގުރާމައަށް ދާން އުޅުމުގެ ދައުވާ ވެސް އަރުހަމްގެ މައްޗަށް ދައުލަތުން ކުރެ އެވެ.

ދެން ހިމެނޭ މުނީޒުގެ މިސާލު ނަންގަވައި ދައުލަތުން ބުނީ، އޭނާ އަކީ ހަނގުރާމައަށް ދިޔުމުގެ ތަމްރީނު ހަދާފައި ހުރި މީހެއް ކަމަށެވެ. ތ. އަތޮޅުގެ ފަޅު ރަށެއްގައި މުނީޒާއި އިތުރު ބަޔަކު ހަނގުރާމައަށް ތަމްރީނު ހަދާފައިވާ ކަމުގެ ހެކި ދައުލަތުން ވަނީ ހޯދައިފަ އެވެ. އެ ތަމްރީނުގެ ތަކުގެ ތެރެއިން ހަށިގަނޑު ވަރުގަދަކުރަން ރާޅާ ދެކޮޅަށް ފެތުމާއި ހިނގުން ފަދަ ހަރަކާތްތައް އެ ރަށުގައި އެ މީހުން ހިންގި އެވެ.

މިއަދު ކޯޓަށް މުނީޒު ހާޒިރުވިއިރު އޭނާ ހުރީ ވަރަށް ބޮޑަށް ހިކިފަ އެވެ. މުނީޒުގެ ވަކީލު އާދަމް ޝަމީމް ވިދާޅުވީ، މުނީޒު ބަންދަށް ގެންދިޔަ އިރު 73 ކިލޯ ހުއްޓަސް މިހާރު ބަރުދަން 45 ކިލޯއަށް ވެއްޓިފައިވާ ކަމަށެވެ. އޭނާއަށް އެއްވެސް އެއްޗެއް ރަނގަޅަށް ނުކެވޭ ކަމަށާއި އެއްޗެއް ކާއިރަށް ހޮޑުލެވޭ ކަމަށް އާދަމް ޝަމީމް ވިދާޅުވި އެވެ. އަދި ކިޑްނީ ފެއިލްވުމުގެ ބިރު ވެސް އޮތް ކަމަށް ޑޮކްޓަރުން ބުނެފައިވާ ކަމަށެވެ.

އަޑުއެހުމުގައި ދައުލަތުން ބުނީ، ޓެރަރިޒަމްގެ ތުހުމަތުކުރެވޭ އެ އެންމެނަކީ ވެސް މުޖުތަމައުއަށް ނުރައްކާތެރި މީހުން ކަމަށާއި އެ މީހުން ދޫކޮށްލައިފި ނަމަ ހެއްކަށް ނުފޫޒު ފޯރުވަފާނެ ކަމަށް ބުނެ ދައުލަތުގެ ވަކީލުން އެދުނީ އެ އެންމެންގެ ބަންދު ދެމެހެއްޓުމަށެވެ. އެ އެންމެންގެ މައްޗަށް ވެސް ތުހުމަތެއް އުފެދޭ މިންވަރަށް ވުރެ އިތުރަށް ހެކި ލިބިފައިވާ ކަމަށް ދައުލަތުން ބުންޏެވެ.

ތުހުމަތުކުރެވޭ އެންމެންގެ ވަކީލުން ވެސް ބަންދަށް ލުއި ގޮތެއް ހަމަޖައްސައިދޭން އެދުނެވެ. ބައެއް މީހުން ސިއްހީ ބޮޑެތި މައްސަލަތަކާއި، ބަލަން ޖެހޭ އާއިލާތަކުގެ ވާހަކަ ވަކީލުން ފާހަގަކުރި އެވެ. ނަމަވެސް، އެ މީހުންގެ ފަރާތުން މުޖުތަމައުއަށް ނުރައްކަލެއް ކުރިމަތިވެދާނެ ކަމަށް ގާޒީ އަލީ އާދަމްއަށް ގަބޫލު ކުރެވޭތީ އޭނާ ނިންމެވީ ބަންދު ދަމަހައްޓާށެވެ. ގާޒީ އަލީ އާދަމް ވިދާޅުވީ، އެ މީހުން ކުރި ކަމަށް ބުނާ ކުށަކީ ބޮޑު ކުށަކަށްވާއިރު، އެ ކުށް ކުރި ކަމަށް ތުހުމަތު ކުރެވޭ އެކަށީގެންވާ ހެކި އެބަ ހުރި ކަމަށެވެ.

މިދިޔަ އަހަރުގެ ނޮވެމްބަރު މަހު ތެރޭ މާލެ ކައިރީގައި އޮތް "ނަސާހް 3" ކިޔާ ދޯންޏަކުން ވެސް ވަނީ ޓެރަރިޒަމާ ގުޅުންހުރި ބޮޑުންތަކެއް ހައްޔަރުކޮށްފަ އެވެ. އެކަމުގެ މައުލޫމާތު ދެމުން ފުލުހުން ބުނީ، ފުލުހުންގެ އިންޓެލިޖެންސަށް އެ ދޯނީގައި އައިއީޑީއެއް ހަދަން މަސައްކަތްކުރާ ކަމުގެ މައުލޫމާތު ލިބުނު ކަމަށާއި އެކަމަށް ބޭނުންކުރާ ބައެއް ސާމާނު ވެސް ދޯނިން ފެނިފައިވާ ކަމަށެވެ. ދޯނި އަޅާފައި އޮތް ސަރަޙައްދުގެ 10 މީޓަރު މޫދު އަޑިން ބަޑިބޭސް އެކުލެވޭކަމަށް ބެލެވޭ ކާޓްރިޖްތަކެއް ވެސް ފުލުހުން ވަނީ ހޯދައިފަ އެވެ.

ދޯނިން ހައްޔަރުކުރި މީހުންނަކީ ދަތުރު ދިއުމުގެ ނަމުގައި ފަޅުރަށްރަށަށް ގޮސް ތަމްރީނުތައް ހަދައި ދީނުގެ ނަމުގައި ހަރުކަށި ފިކުރު ފެތުރުމުގެގޮތުން ރަށުގެ ބައެއް ގޭގޭގައި ހަރުކަށި ފިކުރުގެ ކްލާސްތައް ހިންގައި އޮންލައިންކޮށް ހަރުކަށި ފިކުރުގެ ދަރުސްތައް ބާއްވައި ކުޑަކުދިންނަށް އަމާޒުކޮށްގެން އެ ކުދިން ހަރުކަށި ފިކުރަށް ލެންބުމަށް މަސައްކަތްކުރާ ބައެކެވެ.

މީގެ އިތުރުން އެ މީހުން އައިއެސްއާ ގުޅިގެން ހަނގުރާމަ ކުރުމަށް ޝައުގުވެރިކަން ފާޅުކޮށް، ރާއްޖޭގައި ޓެރަރިޒަމްގެ ހަމަލާއެއް ދިނުމަށް އިންޓަނެޓުން ސާޗްކުރަމުންދާ ކަމަށް ބައިނަލްއަގުވާމީ އިންޓެލިޖެންސް އިދާރާއަކުން ވެސް ފުލުހުންނަށް މައުލޫމާތު ދީފައި ވެ އެވެ.