ޓޯކިޔޯ (27 ޖުލައި) - މިދިޔަ އަންގާރަ ދުވަހު ޓޯކިޔޯގައި ރެކޯޑުކުރެވުނު 2،848 ކޮވިޑް ކޭސްއަކީ ކޮވިޑް 19 ޕެންޑަމިކް ފެށުނު ފަހުން އެންމެ މަތިން އެ ސަރަހައްދުގައި ރެކޯޑު ކުރެވުނު ކޭސްތަކުގެ އަދަދު ކަމަށް މީޑިއާތަކުން ބުނެފި އެވެ.

މި އަހަރުގެ އޮލިމްޕިކްސް ބާއްވަމުން އަންނަ ޓޯކިޔޯގައި އިތުރަށް ކޮވިޑް ފެތުރުމުގެ ބިރު ހީވެފައި ވާތީ ބަލިމީހުންގެ އެނދުތައް އިތުރުކުރުމަށް ހޮސްޕިޓަލުތަކަށް ސަރުކާރުން އަންގާފައިވާ ކަމަށް ވެސް މީޑިއާތަކުން ބުނެފައިވެ އެވެ.

ޖަޕާނަކީ މިހާތަނަށް މުޅި ދުނިޔޭގައި ވެސް ކޮވިޑްގެ ސިޔާސަތުތައް އެންމެ ރަނގަޅަށް ހިންގި ކޭސްތައް އެންމެ މަދުން ފެނިފައިވާ ގައުމުތަކުގެ ތެރެއިން އެއް ގައުމެވެ.

ސިއްހީ އިދާރާތަކުން ބުނާ ގޮތުގައި މިދިޔަ އާދީއްތަ ދުވަހާ ހަމައަށް އެގައުމުން ފެނިފައިވާ ކޮވިޑް ކޭސްތަކުގެ 20.8 ޕަސެންޓް ބަލި މީހުން ހޮސްޕިޓަލުތަކުގައި އެނދުމަތި ކުރަން ޖެހިފައިވާ ކަމަށާއި މި އަދަދު 25 ޕަސެންޓަށް މައްޗަށް އަރައިފި ނަމަ ސިއްހީ ކުއްލި ހާލަތު އިއުލާން ކުރަން މަޝުވަރާތައް ފަށާނެ އެވެ.

ހޮސްޕިޓަލުގައި ބައިތިއްބައިގެން ފަރުވާ ދޭން ޖެހޭ މީހުންގެ އަދަދު އިތުރުވަމުން އަންނަ އިރު އަންނަ މަހު ޓޯކިޔޯގެ ހޮސްޕިޓަލް އެނދުތަކުގެ އަދަދު 6،406 އަށް އިތުރު ކުރަން މަސައްކަތް ކުރާ ކަމަށް އޮފިޝަލުން ބުނެ އެވެ.

އެއާއެކު އެމެޖެންސީ ނޫން އޮޕަރޭޝަންތަކާއި ސާޖަރީތައް ފަސްކޮށް ކޮވިޑްގެ ބޭސްފަރުވާ އަށް އިސްކަން ދިނުމަށް ހޮސްޕިޓަލުތަކަށް ވަނީ ސަރުކާރުން އަންގާފަ އެވެ.

ޓޯކިޔޯގައި ކޮވިޑް ކޭސްތައް އިތުރުވަމުން އަންނަނީ މިހާރު ކުރިއަށްދާ އޮލިމްޕިކްސްގެ ސަބަބުން ކަމަށް ގިނަ ބަޔަކު ގަބޫލު ކުރާއިރު އެމީހުން އަންނަނީ މި ނާޒުކު ދަނޑިވަޅުގައި އޮލިމްޕިކްސް ބޭއްވުމަށް ސަރުކާރުއން ނިންމި ނންމުމަށް ފާޑު ކިޔަމުންނެވެ. --އަލް އަރަބިއްޔާ