މަޝްހޫރު ލަވަކިޔުންތެރިޔާ، އަދި މޯލްޑިވިއަން އައިޑަލް ސީޒަން-2ގެ ހޯސްޓް ލަމްހާ ލަތީފް ފުރަތަމަ ދަރިފުޅަށް ކިޔާފައިވާ ނަމާ ގުޅިގެން ގިނަ ބަޔަކު ފާޑުކިޔުމުން އެކަމަށް އޭނާ ރައްދު ދީފި އެވެ.

ލަމް އާއި ކުޑަ މުއާއަށް އެ މީހުންގެ ފުރަތަމަ ދަރިފުޅު ލިބިފައިވަނީ މިދިޔަ ސެޕްޓެމްބަހު މަހުގެ ހަވަނަ ދުވަހު އެވެ.

މީގެ ކުރިން ވެސް އަމިއްލަ ހަޔާތުގެ އެކި ސަފްހާތައް އިންސްޓަގްރާމްގައި އޭނާގެ ފޭނުންނާ ހިއްސާކުރާ ލަމް، އޭނާގެ އަލަތު ދަރިފުޅު "މުލާ" އާއެކު ނަގާފައިވާ ޗާލު ފޮޓޯތަކަށް ވެސް ދަނީ އޭނާގެ ބެލުންތެރިންގެ ލޯބި ހޯދަމުންނެވެ.

https://www.instagram.com/p/CUXOvdfMd7v/

ނަމަވެސް ލަމްގެ ދަރިފުޅުގެ ނަން މީޑިއާތަކުން ހާމަކުރުމާއެކު ބައެއް މީހުންގެ ފަރާތުން ކުއްޖާއަށް ވެސް ވަނީ ފާޑުކިޔައި ބަދު ބަސް ބުނެފަ އެވެ. މިކަމާ ގުޅިގެން ލަމް ވަނީ އަސަރާއެކު ހިތުގެ އުދާސްތައް އޭނާގެ އިންސްޓަ ސްޓޯރީގައި ބަންޑުންކޮށްލާފަ އެވެ.

"ތިޔަ ފަރާތްތަކުގެ ދަރިންނޭ ކިޔައިގެން ތިބާ ހިތްދަތިވާ ފަދަ ވާހަކައެއް މީހަކު ދައްކައިފި ނަމަ އިހުސާސް ވާނީ ކިހިނެތް؟ ގަބޫލު ވެސް ނުކުރެވޭ ގިނަ ކޮމެންޓް ތަކަކީ އަންހެނުންގެ ލިޔެފައި ހުރި އެއްޗެހި ކަމަކަށް،" ލަމްގެ އިންސްޓަ ސްޓޯރީގައި ލިޔަފައިވެ އެވެ.

ފޭސްބުކްގައި ބައެއް މީހުން ކުރި ކޮމެންޓްތަކުގެ ސްރީންޝޮޓް ވަނީ ލަމްގެ ސްޓޯރީގައި ހިއްސާ ކޮށްފަ އެވެ.

ލަމް އިންސްޓަގްރާމްގައި ލިޔެފައިވާ ޕޯސްޓެއް

އެއަށް ރައްދު ދެމުން ލަމް ބުނީ އޭނާއާ ބެހޭގޮތުން ލިޔާ ލިޔުންތަކަށް މީހުން ކުރާ ހުތުރު ކޮމެންޓްތަކާ މެދު މީގެ ކުރިން އަޅާނުލާ ކަމަށެވެ.

ނަމަވެސް މަންމައަކަށްވުމާއެކު ދަރިފުޅާއެކު ހޭދަކުރާ ވަގުތުތައް ހިއްސާކުރަނީ އޭނާގެ އުފަލުގައި ބައިވެރިވާ، އަދި އެ އުފާވެރި ވަގުތުތައް ދެކެން ބޭނުންވާ މީހުނަށް ކަމަށެވެ.

އެ ޕޯސްޓްތައް ލަނީ އެއިން ކޮންމެ ޕޯސްޓަކަށް ހަބަރު ހަދާނެ ކަމަށް ދެކިގެން ނޫން ކަމަށާއި އޭނާއަށް ނުރަނގަޅު ކޮމެންޓްތައް ލިބޭނެކަން އެނގުނު ނަމަވެސް، ދަރިފުޅޭ ކިޔައިގެން ކޮމެންޓް ކުރާއިރު ތަންކޮޅެއް އޯގާތެރި ވާނެ ނަމައޭ ހިތަށް އަރާކަމަށް ލަމް ބުންޏެވެ.

ލަމް އިންސްޓަގްރާމް ސްޓޯރީގައި ހިއްސާ ކޮށްފައިވާ ކޮމެންޓްތަކެއް

އަދި އެފަދަ ގިނަ ކޮމެންޓުތައް އަންނަނީ އަންހެނުންގެ ކިބައިންކަން ފާހަގަކޮށް އޭނާ ބުނީ އެތަން ފެނުމުން ހައިރާންވެ ލަދުގަންނަ ކަމަށެވެ.

ލަމްގެ ޕޯސްޓްތައް ބަލަން ބޭނުން ނުވާ މީހުނާއި ނަފްރަތުގެ ވާ މީހުން، އިންސްޓަގްރާމުން ލަމް އަންފޮލޯ ކުރުމަށް އޭނާ އެދުނެވެ. އަދި އެފަދަ މީހުން، އޭނާއާ ބެހޭގޮތުން ނޫސްތަކުގައި ލިޔާ ލިޔުންތައް ނުކިޔުމަށާއި ކޮމެންޓް ނުކުރުމަށް އޭނާ ވަނީ އެދިފަ އެވެ.

ލަމްއާއި ކުޑަމުއާ ކައިވެނީގެ ގޮތުން ގުޅުނީ 2017 ވަނަ އަހަރު އެވެ. މިދިޔަ މަހު ދަރިފުޅުގެ ނަން ފޭނުންނާ ހިއްސާ ކުރި ޕޯސްޓްގައި ލަމް ބުނެފައި ވަނީ ދަރިފުޅުގެ ނަމަކީ ގާތްގަނޑަކަށް މީގެ ހަތަރު ވަރަކަށް އަހަރު ވަންދެން އޭނާގެ ހިތުގައިވާ ނަމެއް ކަމަށެވެ.