މާލޭ ހުކުރު މިސްކިތުގައި އަލިފާނުގެ ޙާދިސާއެއް ހިނގައި ގެއްލުންތަކެއް ލިބިގެން ވަގުތީ ގޮތުން ބަންދުކުރުމަށްފަހު، މިސްކިތް އަލުން ހުޅުވާލައިފި އެވެ.

ހުކުރު މިސްކިތް ވަގުތީގޮތުން ބަންދުކޮށްފައި ވަނީ މިދިޔަ މަހުގެ 28 ވަނަ ދުވަހުގެ ރޭ 8:50 ހާއިރު، ހިނގި އަލިފާނުގެ ހާދިސާގައި ލިބުނު ގެއްލުންތައް މަރާމާތު ކުރުމަށްފަހު އެވެ.

އެ މިސްކިތުގައި އަލިފާނުގެ ހާދިސާއެއް ހިނގީ ކަރަންޓު ޝޯޓެއްވެ، ފަންކާއެއްގައި ރޯވެގެން ކަމަށް އެ މިސްކިތް ބަލަހައްޓާ ހެރިޓޭޖް މިނިސްޓްރީގެ ކޮމިއުނިކޭޝަންސް ޑިރެކްޓަރު އިސްމާއީލް ނާއިލް ނަޝީދު ވިދާޅުވި އެވެ.

މި ހާދިސާގައި އެއްވެސް މީހަކަށް ގެއްލުމެއް ނުވި ނަމަވެސް މިސްކިތުގެ ގިނަ ތަންތަނަށް ގެއްލުންތަކެއް ލިބިފައިވެ އެވެ.

އެގޮތުން މިސްކިތުގެ ހިރިގަލަށާއި މަތި ވަޑާންގަނޑަށް ކޮންމެ ވެސް ވަރެއްގެ ގެއްލުންތަކެއް ލިބިފައިވާ ކަމަށް ނާއިލް ވިދާޅުވި އެވެ. އަދި މިސްކިތް ހުޅުވާނީ ތަނުގެ ކަރަންޓު ވަޔަރިން ހުރި ހާލަތު ބަލައި ރައްކާތެރިކަން ކަށަވަރުކުރުމަށް ފަހު ކަމަށް އޭނާ ވިދާޅުވެފައިވެ އެވެ.

މި ހާދިސާ ހިނގި މާލޭގެ ހުކުރު މިސްކިތަކީ ދުނިޔޭގެ ތަރިކައިގެ ވަގުތީ ލިސްޓުގައި ދަފްތަރު ކޮށްފައިވާ ތަނެކެވެ. މިސްކިތް އަލުން ހުޅުވާފައިވަނީ ރޭ ފަތިސްނަމާދަށް ފަހުގަ އެވެ.