ކަރާޗީ (31 މާޗް) - ޕާކިސްތާނުގެ ބޮޑުވަޒީރު އިމްރާން ޚާން އަވަހާރަ ކޮށްލަން ރާވަމުންދާ ކަމުގެ މައުލޫމާތު ލިބިފައިވާ ކަމަށް ވެރިކަން ކުރާ ޕާޓީ ޕާކިސްތާން ތެހްރީކް އެ އިންސާފުން ބުނެފި އެވެ.

އެޕާޓީގެ އިސް ލީޑަރެއް ކަމަށްވާ ފައިސަލް ވައުދާއާ ހަވާލާދީ ޕާކިސްތާނުގެ އާރްވައި ޓީވީއިން ބުނެފައި ވަނީ އިމްރާން ޚާންގެ ފުރާނަފުޅަށް ނުރައްކާ ކުރަން ބަޔަކު މަސައްކަތް ކުރަމުން އަންނަ ކަމަށެވެ.

މި ސަބަބަށްޓަކައި އާއްމު ތަންތަނުގައާއި ޖަލްސާތަކުގައި ތަގުރީރު ކުރައްވާއިރު ބުލެޓް ޕްރޫފް ވެސްޓެއް ތުރުކުރައްވަށް އިމްރާނަށް ލަފާ ދެވިފައިވާ ކަމަށް ވެސް ފައިސަލް ވިދާޅުވި އެވެ.

ޕާކިސްތާނުގެ އާއްމު މަޖިލީހުގައި އިމްރާނަށް އޮތް އަޣުލަބިއްޔަތު ގެއްލުމާއެކު މަގާމުން އިސްތިއުފާ ދިނުމަށް ގިނަ ފިއްތުންތަކެއް ދަނީ ކުރިމަތި ކުރުވަމުންނެވެ. އެގޮތުން އިދިކޮޅުން ވަނީ މަޖިލީހުގައި އޭނާގެ އިތުބާރު ނެތް ކަމުގެ ވޯޓެއް ނަގަން ތާވަލު ކޮށްފަ އެވެ. މި ވޯޓު ތާވަލު ކުރެވިފައިވަނީ އަންނަ އޭޕްރީލް މަހުގެ ތިންވަނަ ދުވަހަށެވެ.

މި ވޯޓުން އިމްރާންއަށް ކާމިޔާބު ލިބުމަކީ ނާދިރު ކަމަކަށް ވާއިރު އޭނާ ވަނީ އިއްޔެ ގައުމާ މުހާތަބުކޮށް ކުރައްވަން އޮތް ތަގުރީރު ވެސް ކެންސަލް ކުރައްވާފަ އެވެ.

އިދިކޮޅު ޕާކިސްތާން ޕީޕަލްސް ޕާޓީ (ޕީޕީޕީ)ގެ ވެރިޔާ ބިލާވަލް ބުއްޓޯ ޒަރުދާރީ ވަނީ އިމްރާނަށް އަޣުލަބިއްޔަތު ގެއްލިފައިވާތީ އޭނާގެ މަގާމުން އިސްތިއުފާ ދޭން ޖެހޭ ކަަމަށް ބުނެފަ އެވެ.

އިމްރާން މަގާމުން ދުރު ކުރަން ކުރަމުން އަންނަ މަސައްކަތްތަކީ ބައިނަލްއަގުވާމީ ފަރާތްތަކެއްގެ އެހީއާއެކު އޭނާއާ ދެކޮޅަށް ހިންގަމުން އަންނަ ކަމެއްގެ ގޮތުގައި އިމްރާން ވަނީ މީގެ ކުރިން ސިފަ ކުރައްވާފަ އެވެ. -- ޓައިމްސް ނައު