އިސްލާމް އާބާދު (08 އޭޕްރީލް)- ޕާކިސްތާނުގެ ގާނޫނު ހަދާ މަޖިލިސް އުވާލަން ބޮޑު ވަޒީރު އިމްރާން ޚާން ކުރެެއްވި އަމުރަކީ ޣައިރު ގާނޫނީ އަމުރެއް ކަމަށް ނިންމައި ދެ ދުވަސް ތެރޭގައި މަޖިލިސް އަލުން ރުޖޫއަ ކުރަން އެގައުމުގެ ސުޕްރީމް ކޯޓުން ހުކުމް ކޮށްފި އެވެ.

ސުޕްރީމް ކޯޓުގެ މި ނިންމުން އައިސްފައި މިވަނީ މިމަހުގެ ތިންވަނަ ދުވަހު އިމްރާން ޚާންގެ މައްޗަށް އިތުބާރު ނެތް ކަމުގެ ވޯޓެއް ނަގަން މަޖިލީހުގައި ތާވަލު ކޮށްފައި ވަނިކޮށް އިމްރާންގެ އަމުރުގެ މަތިން މަޖިލިސް އުވާލިތާ ދުވަސްތަކެއް ފަހުންނެވެ.

މިއާއެކު އޭނާގެ މައްޗަށް ތާވަަލު ކުރެވުނު އިތުބާރު ނެތް ކަމުގެ ވޯޓު މަޖިލީހުގެ ދެން އޮންނަ ޖަލްސާއެއްގައި ނެގޭނެ އެވެ. ބެލެވޭ ގޮތުގައި އެންމެ އަވަހަށް ދެން ޖަލްސާއެއް އޮންނާނީ މާދަމާ އެވެް.

މި ވޯޓުން ނާކާމިޔާބުވެއްޖެ ނަމަ އިމްރާނަށް އޭނާގެ މަގާމު ގެއްލޭނެ އެވެ. އިދިކޮޅުން ވަނީ މަޖިލިސް އުވާލައި ގާނޫނުގެ ބޭރުން އިމްރާނުް އަމަލު ކުރެއްވީ އޭނާއާ ދެކޮޅަށް ނަގާ އިތުބާރު ނެތް ކަމުގެ ވޯޓު ހުއްޓުވަން ކަމަށް ބުނެފަ އެވެ.

ޖުމްލަ 340 ގޮނޑި ހިމެނޭ މަޖިލީހުގެ 172 ގޮނޑީގެ މެޖޯރިޓީ އޮތީ އިދިކޮޅުގަ އެެެެވެ. އެެހެން ކަމުން އިތުބާރު ނެތް ކަމުގެ ވޯޓުގައި އިމްރާނަށް ނާކާމިޔާބީއާ ކުރިމަތިލާން ޖެހުމަކީ ގާތް ކަމެކެވެ.

އިމްރާން ޚާން ވަނީ އޭނާ މަގާމުން ދުރު ކުރަަން އިދިކޮޅުން ކުރަމުން އަންނަ މަސައްކަތްތަކަކީ ބޭރުގެ ނުފޫޒާއެކު ކުރަމުން އަންނަ މަސައްކަތްތަކެއް ކަމަށް ތުހުމަތު ކޮށްފަ އެވެ.