ފިލްމު ކުޅޭ އަގު ބޮޑު ކޮށްފައިނުވާ ކަމަށާއި މީޑިއާގައި ދެކެމުން އަންނަނީ ހަގީގަތާ ހިލާފު ހަބަރެއް ކަމަށް އެކްޓަރު ކާތިކް އާރިޔަން ބުނެފި އެވެ.

ބޮލީވުޑްގައި ކާމިޔާބު ފިލްމުތަކެއް ގެނެސްދީފައިވާ ކާތިކް ފިލްމު ކުޅެދޭ އަގު ބޮޑުކޮށްފައިވާ ކަމަށްބުނެ މީޑިއާގައި ވަނީ ރިޕޯޓް ކޮށްފަ އެވެ. އެގޮތަށް ރިޕޯޓްކޮށްފައިވަނީ މިހާރު ސިނަމާގައި ދައްކަމުން އަންނަ ކާތިކްގެ "ބޫލް ބުލައްޔާ 2" އަކަށް ލިބެމުން އަންނަ ކާމިޔާބީއާ ގުޅިގެންނެވެ.

މިކަމާއި ގުޅިގެން ކާތިކް ކޮށްފައިވާ ޓްވީޓެއްގައި ބުނެފައިވަނީ އޭނާ ފިލްމު ކުޅެދޭ އަގު ބޮޑު ނުކުރާ ކަމަށާއި ފިލްމަށް ލިބުނު ކާމިޔާބީއާ އެކު އޭނާގެ މަގުބޫލުކަން އިތުރުވިކަން ގަބޫލުކުރާ ކަމަށެވެ.

މީޑިއާތަކުން އިއްޔެ ބުނި ގޮތުގައި ކާތިކް ދެން ފިލްމަކުން ފީއެއްގެ ގޮތުގައި ނަގާނީ 35-40 ކްރޯޑް ރުޕީސްއާ ދެމެދުގެ އަގެކެވެ. އަދި 40 ކްރޯޑަށް ވުރެ ދެން އަގު ކުޑައެއް ނުކުރާނެ އެވެ. އޭނަ 2019 ގައި ވެސް ފިލްމު ކުޅޭ އަގުބޮޑުކުރި ކަމުގެ އަޑުތަކެއް އެރި އެވެ. އޭރު މީޑިއާތަކުން ބުނީ 31 އަހަރުގެ އެކްޓަރު ތިން ކްރޯޑުން ހަތް ކްރޯޑަށް އަގުމަތިކޮށްފައިވާ ކަމަށެވެ.

ދެހާސް އެގާރައިގެ "ޕިޔާރު ކާ ޕަންޗްނާމާ" އިން ބޮލީވުޑަށް ނުކުތް ކާތިކްގެ އެންމެ ފުރަތަމަ ބޮޑު ކާމިޔާބީއެއް ލިބުނު ފިލުމަކީ 2018 ގެ "ސޯނޫ ކޭ ޓިޓޫ ކީ ސްވީޓީ" އެވެ.

އޭނަގެ ކުރިއަށް ހުރި ފިލްމުތަކުގެ ތެރޭގައި "ޝެހެޒާދާ"، "ފްރެޑީ"، "ކެޕްޓަން އިންޑިއާ" އަދި "ސަތިއަނާރަޔަން ކީ ކާތާ" ހިމެނެ އެެވެ.