ރާއްޖޭގެ އެންމެ މަޝްހޫރު ލަވަކިޔުންތެރިންގެ ތެރޭގައި ހިމެނޭ މުހައްމަދު ހުޒާމް ނިޔާވެއްޖެ އެވެ.

މައުލޫމާތު ލިބިފައިވާ ގޮތުގައި އުމުރުން 48 އަހަރުގެ ހުޒާމް ނިޔާވީ ބަލިވެ އުޅުމަށްފަހު އިންޑިއާގައި ބެންގަލޫރުގައި ފަރުވާހޯދަމުން ދަނިކޮށް ރޭގެ ވަގުތެއްގަ އެވެ.

ހުޒާމްއަކީ ޓީވީއެމްގެ ސްކޫލު ކުދިންގެ ލަވަ މުބާރާތުން، 1990ގެ މެދުތެރޭގައި އޭރު މާލޭ އިންގްލިޝް ސްކޫލުން ވާދަކޮށް ގިނަ ކާމިޔާބީތަކެއް ހޯދާފައިވާ ލަވަކިޔުންތެރިޔެކެވެ. އަދި ފިލްމުތަކާއި އަލްބަމްތަކަށްވެސް ހުޒާމް ލަވަ ކިޔާދީފައިވެ އެވެ. ނަމަވެސް އޭނާ ލަވަކިޔުމުގެ ދާއިރާގައި ހަރަކާތްތެރިވެ ނޫޅޭތާ ގިނަ އަހަރުތަކެއްވެއްޖެ އެވެ.

ހުޒާމް އަކީ އިންޖީނިއަރިންގެ ރޮނގުން މެލޭޝިޔާގައި މަތީ ތައުލީމް ހާސިލްކޮށް އެ ދާއިރާގައި މަސައްކަތްކުރި ފަރާތެކެވެ.

ހުޒާމަކީ އޭރު ގިނަ ފިލްމުތަކަށް ލަވަކިޔައިދީފައިވާ ފަންނާނެކެވެ. އެގޮތުން އޭނާ ކިޔާފައިވާ ލަވަތަކުގެ ތެރެއިން އާންމުންގެ ތެރޭގައި އެންމެ މަގުބޫލު ލަވަ ތަކުގެ ތެރޭގައި "ތަދާ ވޭނުގާ"، "ދޮންކަނބުލޮ ނިދާލާށޭ"، "ތުއްތު މޫނާ"، "ނަޔާފަރިވެ ޒީނަތްވީ"، "ޖައްވުގެ ތެރެއިން ފެނުމުން"، "މުޅި ޖާން ހިތާ"، "ބޭނުމޭ އިޝްގާ" ފަދަ ލަވަތައް ހިމެނެ އެވެ.

https://www.youtube.com/watch?v=g_x6xgIF6fA

ހުޒާމްގެ ކުލި ވަކިވުމާ ގުޅިގެން އޭނާގެ ރަހުމަތްތެރިންނާއި ފަންނާނުން އަންނަނީ ތައުޒިޔާ ކިޔަމުންނެވެ.

https://www.youtube.com/watch?v=lxJHuga4izs