ބޮލީވުޑްގެ ޒުވާން ތަރި އިޝާން ކައްޓާރުގެ ކުރިއަށް އޮތް ވަތަނީ ފިލްމު "ޕިއްޕާ"ގެ ޓީޒާ ދައްކާލައިފި އެވެ.

އިންޑިއާގެ 75 ވަނަ މިނިވަން ދުވަހާ ދިމާކޮށް މިފިލްމުގެ ޓީޒާ ބެލުންތެރިންނަށް ދޫކޮށްލާފައިވާއިރު، މި ފިލްމު ރިލީޒްކުރުމަށް ހަމަޖެހިފައި ވަނީ މިއަހަރުގެ ޑިސެމްބަރު މަހުގެ ދެ ވަނަ ދުވަހު އެވެ.

"ޕިއްޕާ" އަކީ އިންޑިއާ އާއި ޕާކިސްތާނާ ދެމެދު 1971 ގައި ކުރި ހަނގުރާމައިގައި އަސްކަރިއްޔާގެ 45 ވަނަ ކަވަލްރީ ޓޭންކް ސްކޮޑްރަންގައި މަސައްކަތްކުރި ބްރިގޭޑިއާ ބަލްރާމް ސިންގް މެހެތާގެ ވާހަކަ ކިޔައިދޭ ބައޮގްރަފިކަލް ހަނގުރާމަ ފިލްމެކެވެ.

އާރްއެސްވީޕީ އަދި ރޯއީ ކަޕޫރް ފިލްމްސް އިން ޕްރޮޑިއުސްކޮށްފައިވާ މި ފިލްމުގެ ޑައިރެކްޓަރަކީ 2016 ވަނަ އަހަރު އަކްޝޭގެ "އެއާލިފްޓް"ގެ ޑައިރެކްޓަރު ރާޖާ ކްރިޝްނާ މެނަން އެވެ.

https://www.instagram.com/p/ChREqvdgNZr/

"ޕިއްޕާ" ގައި ޝާހިދު ކަޕޫރުގެ ކޮއްކޮ އިޝާންއާއެކު ދެން ފެނިގެންދާނީ މުރްނާލް ތާކުރް އެވެ.

މުރްނާލްއަކީ ފިލްމު "ޖާޒީ"ގެ ވެސް ބަތަލާ އެވެ. ފިލްމުގެ އިތުރު ކާސްޓުންގެ ތެރޭގައި އާލިއާ ބަޓްގެ މަންމަ ސޯނީ ރާޒްދާއި ޕްރިޔަންޝޫ ޕައިންޔުލީ ހިމެނެ އެވެ.

އިޝާން، 26 އެންމެ ފަހުގެ ފިލްމަކީ 2020 ގެ "ކާލީ ޕީލީ" އެވެ.

"ޕިއްޕާ" އަހަރުގެ ފަހު މަހަށް ތާވަލުކޮށްފައިވާ އިރު މި އަހަރުގެ އޮކްޓޯބަރު 7 ގައި އިޝާންގެ ހޮރޯ-ކޮމެޑީ "ފޯން ބޫތު" ވެސް ރިލީޒްކުރާނެ އެވެ. އޭގެ ކާސްޓްގައި ކެޓްރީނާ ކައިފާއި ސިދާންތު ޗަތުރަވެދީ ވެސް ހިމެނެ އެވެ.