ޣައްޒާ (04 ސެޕްޓެމްބަރު) - އިޒްރޭލަށް ޖާސޫސް ކޮށްދިން ދެ މީހަކު ހިމެނޭ ގޮތަށް ފަލަސްތީނުގެ ފަސް މީހަކު ދަން ޖައްސައި މަރާލާފައިވާ ކަމަށް ޣައްޒާގައި ހަރަކާތްތެރިވާ ހަމާސް ޖަމާއަތުން ބުނެފި އެވެ.

މަރުގެ ހުކުމް ތަންފީޒު ކުރެވުނީ އާދީއްތަ ދުވަހުގެ ހެނދުނު ކަމަށާއި މަރާލެވުނު މީހުންގެ ތެރޭގައި އިޒުރޭލާ އެއްބައިވެގެން މަސައްކަތްކުރި ދެ މީހެއްގެ އިތުރުން ދެން ހިމެނެނީ އެކި ކުށްތަކުގައި މަރުގެ ހުކުމް އިއްވުނު މީހުން ކަމަށް ހަމާސްއިން ނެރުނު ބަޔާނެއްގައި ބުނެފައިވެ އެވެ.

މަރުގެ ހުކުމް ތަންފީޒު ކުރެވުނު މީހުންގެ މާ ގިނަ ތަފްސީލުތަކެއް ހާމަކޮށްފައި ނުވި ނަމަވެސް ހަމާސްއިން ވަނީ އެ މީހުންގެ ނަމުގެ ފުރަތަމަ އަކުރުތަކާއި އުފަންވި އަހަރު އާއްމުކޮށްފަ އެވެ.

އިޒްރޭލަށް އެހީވުމުގެ ތުހުމަތުގައި މަރުގެ ހުކުމް ތަންފީޒު ކުރެވުނު އެކަކީ 1991 ވަނަ އަހަރު ހަމާސް ޖަމާއަތުގެ ސަލާމަތީ ކަންކަމާ ބެހޭ މައުލޫމާތު އިޒްރޭލުގެ ސަރުކާރަށް ފޯރުކޮށްދިން މީހެއް ކަމަށް ހަމާސްއިން ބުނެ އެވެ.

މީގެ އިތުރުން ދެން ހުކުމް ތަންފީޒު ކުރެވުނު މީހުންގެ މައްޗަށް ސާބިތުވެފައިވަނީ ގަސްދުގައި މީހަކު މަރާލުމުގެ ކުށް ކަމަށް ހަމާސްއިން ނެރުނު ބަޔާނުގައިވެ އެވެ. -- އަލް އަރަބިއްޔާ