ރާއްޖެ އާއި ޖަޕާންގެ ސިޔާސީ ގުޅުން ގާއިމުކުރިތާ 55 އަހަރު ފުރުމާ ދިމާކޮށް ހާއްސަ ފެސްޓިވަލެއް ބޭއްވުމަށް ނިންމައިފި އެވެ.

"ޖަޕާން- މޯލްޑިވްސް ފެސްޓިވަލް" ގެ ނަމުގައި އަންނަ ހޮނިހިރު ދުވަހު ބާއްވާ މި ފެސްޓިވަލު އޮންނާނީ ސޯޝަލް ސެންޓަރުގަ އެވެ.

ރާއްޖޭގައި ހުންނަ ޖަޕާން އެމްބަސީން ބުނީ މިއީ ހުރިހާ އުމުރުފުރައެއްގެ މީހުންނަށް ބައިވެރިވެވޭ ގޮތަށް ބާއްވާ ފެސްޓިވަލެއް ކަމަށެވެ.

މި ފެސްޓިވަލްގައި ޖަޕާންގެ ސަގާފީ ސެޝަންސްތައް ކުރިޔަށް ގެންދާނެއެވެ.

ޖަޕާނާ ގުޅޭ މައުލޫމާތު ދިނުމުގެ އިތުރުން ސޫޝީ ސެޝަނަކާއި، ޔުކަތަ (ޖަޕާންގެ ސަގާފީ ހެދުން) ލައިގެން ފޮޓޯ ނެގުމުގެ ފުރުސަތު ވެސް އޮންނާނެ އެވެ. މީގެ އިތުރުން ޖަޕަނީސް ކަޓްސޫބުސީ (ހިކިމަސް) އާއި މާޝަލް އާޓްސްގެ ހަރަކާތްތައް އޮންނާނެ އެވެ.

ޖަޕާން އެއްބަސީއިން ކޮށްފައިވާ ޕޯސްޓެއް

މީގެ އިތުރުން ދިވެހި ބަހުން ވާހަކަ ދެއްކުމުގެ މުބާރާތަކާއި ދެ ގައުމުގެ ސަގާފަތާއި އާދަކާދަ އާއި ގުޅުން ހުރި މަޖާ ހަރަކާތްތައް މި ފެސްޓިވަލްގައި ކުރިޔަށް ގެންދިއުމަށް ރާވާފައިވެ އެވެ. މި ކުޅިވަރުތަކުގައި ބައިވެރިވެގެން އިނާމު ހޯދުމުގެ ފުރުސަތު ވެސް ވަނީ ހުޅުވާލައިފަ އެވެ.

މި ފެސްޓިވަލް އޮންނާނީ ހޮނިހިރު ދުވަހު ހަވީރު 4:00 އިން 6:00 އަށް އަދި ހަމަ އެރޭ 8:00 އިން 10:00 އަށެވެ.