ވަކިވެގެން އެދިޔައީ ރާއްޖޭގެ ބްރޯޑްކާސްޓިންގެ ބާނީ

ރާއްޖޭގެ ބްރޯޑްކާސްޓިން ދާއިރާގެ ބާނީ އަކީ ކޮންބޭފުޅެއްތޯ ސުވާލުކޮށްފި ނަމަ އެންމެ ފުރަތަމަ ވެސް ހިތަށް ގެނެވޭނެ ނަމަކީ ސަމަރު ބުލޫ އިބްރާހީމް މަނިކުގެ ނަން ކަމާމެދު ޝައްކެތް ނެތެވެ.

1974 ވަނަ އަހަރުން ފެށިގެން ރާއްޖޭގެ ބްރޯޑްކާސްޓިން ދާއިރާއަށް ޚިދުމަތް ކުރައްވަން ފެއްޓެވި އިބްރާހީމް މަނިކަކީ ރާއްޖޭގެ ރޭޑިއޯއާއި ޓީވީ ޒަމާނަށް ފެތޭގޮތަށް ބަދަލުކުރެއްވި މޭސްތިރިޔާ އެވެ.

އެ މަސައްކަތުގައި ޢަމަލީ ގޮތުން ބައިވެރިވެ، އެކަމަށް ހޔާތުގެ ގިނަ ދުވަސްތަކެއް ހޭދަކުރެއްވި ބޭފުޅެެކެވެ. ބްރޯޑްކާސްޓިން ދާއިރާ އިތުރަށް ފުޅާކުރައްވާ އެދާއިރާއަށް އެތައް ބަޔަކަށް ފުރުސަތު ހޯއްދަވައިދެއްވި ހިންގުންތެރިއެކެވެ. އެގޮތުން ދިވެހިރާއްޖޭގެ އަޑާއި ޓެލެވިޒަން މޯލްޑިވްސްއަކީ އިބްރާހީމް މަނިކުގެ މޭސްތިރިކަމުގެ ދަށުން އުފެދިގެން ހެދި ބޮޑުވެގެންއައި ދެ ތަނެވެ. ހާއްސަކޮށް އެމަނިކުފާނުގެ ހިތްޕުޅުގައި ދިވެހިރާއްޖޭގެ އަޑަށް އިތުރު ލޯތްބެއް އުފެދިފައިވާކަމީ ޝައްކެއް ވެސް އޮތްކަމެއް ނޫނެވެ.

ޕްރޮގްރާމްތައް އުފެއްދުމާއި ހުށައެޅުއްވުމުގައި އަމިއްލަފުޅަށް އަމަލީގޮތުން ބައިވެރިވެ ވަޑައިގެންނެވި އެވެ. ކޮންމެ ދުވަހެއްގެ ހެނދުނު ދިވެހި ރާއްޖޭގެ އަޑުން ގެެނެސްދޭ "ބާއްޖަވެރި ހެނދުނާ" އި ރޯދަ މަހުގެ ހަވީރު އަބްދުﷲ ސޯދިގު (ސޯދުބެ) އާއެކު ގެނެސްދެއްވި "ރޯދަކުރުކުރުން" ފަދަ ޕްރޮގްރާމްތަކަކީ ދިވެހިންގެ ހަނދާނުން ފިލުވާލަން ދަތި ޕްރޮގްރާމްތަކެވެ.

އިބްރާހީމް މަނިކުގެ އެންމެބޮޑު ގަައުމީ ޚިދުމަތްތަކުގެ ތެރެއިން ދިވެހިރާއްޖޭގެ އަޑުގެ ޚިދުމަތްތަައް ފާހަގަކޮށްލަން ޖެހެ އެވެ. މުޅި ރާއްޖޭގެ އެންމެހާ ކަންކޮޅުތަކަށް ވަގުތުން ވަގުތަށް ޚިދުމަތް ލިބެންފެށި ހަމައެކަނި މީޑިއާއަކީ އަދި މުއާސަލާތީ ވަސީލަތަކީ ދިވެހިރާއްޖޭގެ އަޑު ކަމަށްވީއިރު، ދިވެހިރާއްޖޭގެ އަޑަށް ލިބިފައިވާ އެންމެ ބޮޑު ތާރީހީ ޝަރަފާއި ފަހުރަކީ އެއީ އެވެ.

ރާއްޖޭގެ އާންމު ހޭލުންތެރިކަމާއި ރައްޔިތުންގެ ފައިދާއާ ކުރިއެރުމަށް އެންމެ ގިނަގުނަ ޚިދުމަތްތަކެއް ގައުމީ ގޮތުން، އަދާކޮށްފައިވާ މީޑިއަކީ ދިވެހިރާއްޖޭގެ އަޑު ރާއްޖެއާ ދުނިޔޭގެ ހަބަރާ މައުލޫމާތާއި، ދީނީ، ގައުމީ، ތައުލީމީ، ސިއްހީ، އިޖުތިމާއީ، ބަހަވީ، އަދަބީ، ސަގާފީ، އަދި ކުޅިވަރާއި މުނިފޫހިފިލުވުމުގެ ރޮނގުތަކުން ދިވެހިރާއްޖޭގެ އަޑުން ކޮށްފައިވާ ގައުމީ ހިދުމަތްތަކާއި އަދާކޮށްފައިވާ ގައުމީ ދައުރަކީ ދިވެހި ތާރީޚުގައި ލާމަސީލު ނަމޫނާއެކެވެ.

ގައުމީ މުނާސަބަތުތަކާއި އިހުތިފާލުތައް ފާހަގަކުރުމުގަ އާއި އެ ކަންކަން ރައްޔިތުންނަށް ވަގުތުން ގެނެސްދިނުމުގައި އެންމެބޮޑު ދައުރެއް އަދާކޮށްފައިވާ މީޑިއާއަކީ ވެސް ދިވެހިރާއްޖޭގެ އަޑެވެ. މިކަންކަމުގެ އެންމެ ބޮޑު މޭސްތިރިއަކީ އިބްރާހީމް މަނިކު އެވެ.

ރޭޑިއޯއަށްފަހު 1980 ގެ އަހަރުތަކުގެ ތެރޭގައި ޓީވީއެމްގެ ވެސް ވެރިޔާގެ މަގާމު ލިބިވަޑައިގެންނެވި އެވެ. އެއަށްފަހު ޓީވީ މެދުވެރިކޮށް ޚަބަރާއި މައުލޫމާތު ފެތުރުމާއި ޕްރޮގްރާމްތައް އުފެެއްދުމުގައި މުވައްޒަފުންނަށް މަގުދައްކަވައިދެއްވާ އެކަންކަމަށް މަގުފަހިކޮށްދެއްވަމުން ގެންދެވި އެވެ. ޒަމާނާ އެއްގޮތަށް ޓީވީގެ ކަންކަން ބައްޓަން ކުރައްވަން ގިނަ ގުނަ މަސައްކަތްތަކެއް ކުރެއްވި އެވެ.

މި ދާއިރާއިން އެމަނިކުފާނުގެ ހިދުމަތްތަކަށް ބަލާލާއިރު، 1980 އިން 1989 އަކާއި ހަމައަށް ދިވެހިރާއްޖޭގެ އަޑުގެ ޑެޕިއުޓީ ޑިރެކްޓަރުކަމާއި ޑިރެކްޓަރުކަމުގެ މަގާމު ފުރުއްވާފައިވެ އެވެ. އަދި 1989 އިން 1993 އަކާއި ހަމައަށް ޑިރެކްޓަރު ޖެނެރަލް އޮފް ބްރޯޑްކާސްޓިން ހައިސިއްޔަތުން ދައުލަތުގެ ރޭޑިއޯއާއި ޓީވީ ހިންގެވުމުގައި އިސް ދައުރެއް އަދާކުރައްވާފައިވެ އެވެ.

ރޭޑިއޯގެ ހިދުމަތުގައި އުޅުއްވަމުން ގައުމީ އެކި ކަންކަމުގައި ވެސް ބައިވެރިވެވަޑައިގެން މަސައްކަތް ކުރެއްވި ހިދުމަތްތެރިއެވެ. އެކިއެކި މުނާސަބަތުތަކާ ގުޅިގެން ގައުމީ ލަވަ ހެއްދެވުމާއި، ގައުމީ އެކި މުނާސަބަތާއި ގުޅޭ ޕްރޮގުރާމު އުފެއްދުމަކީ ވެސް އިބްރާހިމް މަނިކު ޚާއްސަ އިސްކަމެއް ދެއްވި މަސައްކަތްތަކެކެވެ.

އިބްރާހިމް މަނިކަކީ މިޔުޒިކާއި ލަވަކިޔުން ކުރިއެރުމުގެ ރޮނގުން 1996 ވަނަ އަހަރު ޢާންމު ހިދުމަތުގެ ހިތްވަރު ދިނުމުގެ އިނާމު ވެސް ލިބަޑައިގެންފައިވާ ބޭފުޅެކެވެ.

މީގެ އިތުރުން ކުޑަކުދިން ކިޔާ ހިތްވާކަހަލަ ފޮތެއް ސަރުކާރުން ގަބޫލުކުރައްވާ ފެންވަރަކަށް ދިވެހި ބަހުން އެކުލަވާލައްވައިގެން ސަރުކާރުންދޭ އިނާމު 1999، 2000 އަދި 2001 ވަނަ އަހަރު އިބްރާހިމް މަނިކަށް ވަނީ ލިބިވަޑައިގެންފަ އެވެ.

އިބްރާހީމް މަނިކު ބްރޮޑްކާސްޓިން ދާއިރާއަށް ކޮށްދެއްވި ހިދުމަތްތަކުގެ އަގުވަޒަން ކުރުމުގެ ގޮތުން މިއަހަރު ބްރޯޑްކާސްޓިން ކޮމިޝަނުން ވަނީ އޭނާއަށް ލައިފް ޓައިމް އެޗީވްމަންޓް އެވޯޑް ވެސް ދެއްވާފަ އެވެ.