މޮސްކޯ (04 ޑިސެމްބަރު) ބައިނަލްއަގުވާމީ ތެލުގެ ބާޒާރުގައި ވިއްކާ ރަޝިއާ ތެޔޮ ފީފާއެއްގެ އަގު 60 ޑޮލަރުގައި ހިފެހެއްޓުމަށް އީޔޫއިން ނިންމައިފި އެވެ.

ޖީ7ގެ ގައުމުތަކުން ހުށައެޅި މި ހުށައެޅުމަކީ ބާޒާރުގައި ހުރި ތެލުގެ އަގަށްވުރެ ފަސް ޕަސެންޓް ދަށްކޮށް ރަޝިއާ ތެލުގެ މުއާމަލާތްތައް ކުރުމަށް ހުށައެޅި ހުށައެޅުމެކެވެ.

މި އެއްބަސްވުމަށް އެއްބަސްވާން އޮތް ސުންގަޑި ހަމަވާން ކައިރި ވެފައިވާއިރު އެއްބަސްވުމުގައި ބައިވެރިނުވެ އޮތް ހަމައެކަނި ގައުމަކީ ޕޮލެންޑެވެ. ޕޮލެންޑުން ވަނީ އަގު މިއަށްވުރެ ވެސް ދަށްކުރަން ހުށައަޅާފަ އެވެ.

ރަޝިއާއިން ޔޫކްރެއިންއަށް އަރައި ކުރަމުންދާ ހަނގުރާމައާއެކު ހުޅަނގާއި އެމެރިކާއިން ރަޝިއާއަށް ގިނަ ދަތިކުރުމުގެ ފިޔަވަޅުތަކެއް އަޅާފައިވާއިރު މިއީ އެ ފިޔަވަޅުތަކަށް އެންމެ ފަހުން އިތުރުވި ބޮޅެވެ.

މި ނިންމުމާއެކު ރަޝިއާއިން ވަނީ ހިމޭނުން ނުހުންނާނެ ކަމަށާއި ރައްދު ފިޔަވަޅަކަށް ތައްޔާރު ވަމުން އަންނަ ކަމަށް ބުނެ އިންޒާރު ދީފަ އެވެ.

އީޔޫގެ މި ފިޔަވަޅު ޑިސެމްބަރު މަހުގެ ފަސްވަނަ ދުވަހުން ފެށިގެން ތަންފީޒު ކުރެވެން ފަށާއިރު މިއީ ކުރިން އަޅާފައިވާ ފިޔަވަޅުތަކަށްވުރެ ލުއި ފިޔަވަޅެއްކަން ފާހަގަކޮށްލެވެ އެވެ.

ހަނގުރާމަ ފެށުމަށްފަހު އީޔޫއިން ވަނީ ރަޝިއާގެ ސާފުނުކުރާ ތެޔޮ ގަތުން އެއްކޮށް ހުއްޓާލާފަ އެވެ. -- އަލް އަރަބިއްޔާ