ކީވް (06 ޑިސެމްބަރު) - ރަޝިއާގެ މިސައިލް ހަމަލާތަކާއެކު ޔޫކްރެއިންގެ ބައެއް ސަރަހައްދު ތަކުން ކަރަންޓު ކަނޑާލައިފައިވާ ކަމަށް ހަބަރުތައް ބުނެފި އެވެ.

ޔޫކްރެއިންގެ ރައީސް ވޮލޮޑިމީރް ޒެލެންސްކީ ވިދާޅުވީ ހަމަލާތަކާއެކު ގައުމުގެ ކަރަންޓު ސިސްޓަމް ހަމައަކަށް އެޅުވުމަށްޓަކައި ބައެއް ސަރަހައްދުތަކުން ވަގުތީ ގޮތުން ކަރަންޓް ކަނޑާލެވިފައިވާނެ ކަމަށެވެ.

އޭނާ އިތުރަށް ވިދާޅުވީ ގިނަ ސަރަހައްދުތަކަށް ހަމަލާތަކުގެ އަސަރު ކޮށްފައިވާ ކަމަށާއި ވެރިރަށް ކީވްގެ ބޮޑު ސަރަހައްދަކަށް ކުރިއަށް ދުވަސްތަކުގައި ވެސް ކަރަންޓް ލިބޭނެ ކަމަށް ނުބެލެވޭ ކަމަށެވެ.

ރަޝިއާއިން ރޭ ދިން ހަމަލާތަކުގައި ޔޫކްރެއިންގެ އުމްރާނީ ތަރައްގީއަށް ގިނަ ގެއްލުންތަކެއް ވެފައިވާއިރު އޭގެ ތެރޭގައި ކަރަންޓު ކޭބަލްތަކާއި ކަރަންޓާ ގުޅޭ އެހެނިހެން އެއްޗިއްސަށް ލިބުނު ގެއްލުން ވެސް ހިމެނެ އެވެ.

ޔޫކްރެއިންގައި ފިނި މޫސުން ފެށި ފިނިހޫނުމިން 0 ޑިގްރީ ސެލްސިއަސްގައި އުޅޭއިރު ގިނަ ސަރަހައްދުތަކުން ކަރަންޓް ކެނޑުމަކީ ފިނިބޮޑުވެގެން ގޮސް މީހުން މަރުވުމުގެ ބިރު ބޮޑުވެފައިވާ ކަމެކެވެ.

ޔޫކްރެއިންއިން މި ރިޕޯޓު ނެރެފައިވާއިރު ރަޝިއާއިން ވެސް ވަނީ ޔޫކްރެއިންގެ ހަމަލާތަކުގައި އެގައުމުގެ ތިން މީހަކު މަރުވެފައިވާ ކަމަށް ބުނެފަ އެވެ.

ފެބްރުއަރީ މަހު ޔޫކްރެއިން ހަނގުރާމަ ފެށުނީއްސުރެ ރަޝިއާއިން ދެމުންދާ ހަމަލާތަކުގައި ޔޫކްރެއިންއަށް އިންސާނީ އަދި އުމްރާނީ ގިނަ ގެއްލުންތަކެއް ލިބިފައިވެ އެވެ. -- އަލް އަރަބިއްޔާ