ވޮޝިންޓަން (17 ފެބްރުއަރީ) އެމެރިކާގެ ވައިގެ ސަރަހައްދަށް ވަންނަން މަސައްކަތްކުރި ރަޝިއާގެ ހަތަރު ޖެޓެއް އެގައުމުގެ އަސްކަރިއްޔާއިން ހިފަހައްޓާފައިވާ ކަމަށް ޕެންޓަގަންއިން ބުނެފި އެވެ.

ނޯތު އެމެރިކަން އެއިރޯސްޕޭސް ޑިފެންސް ކޮމާންޑް (ނޯރެޑް)އިން ނެރެފައިވާ ބަޔާނެއްގައި ބުނެފައިވަނީ އެލެސްކާގެ ވައިގެ ސަރަހައްދަށް ވަންނަން އުޅުނު ރަޝިއާގެ ޖެޓުތަކުގެ ތެރޭގައި އެކި މޮޑެލްތަކުގެ ފައިޓަ ޖެޓުތައް ވެސް ހިމެނޭ ކަމަށެވެ.

އެ ޖެޓުތައް ހުއްޓުވާފައިވަނީ އެމެރިކާ އަސްކަރިއްޔާގެ އެފް 35 ފައިޓާ ޖެޓުގެ ދެ އުޅަނދާއި ކޭ 135 މޮޑެލްގެ އުޅަނދެއް ބޭނުން ކޮށްގެން ކަމަށް ވެސް އެ ބަޔާނުގައި ބުނެފައިވެ އެވެ.

ނޯރެޑްއިން އިތުރަށް ބުނީ ރަޝިއާގެ އެ ޖެޓުތައް އެމެރިކާގެ ވައިގެ ސަރަހައްދަށް ވަނުމުގެ ކުރިން ހުއްޓުވާފައިވާ ކަމަށެވެ.

މިއީ މި ހަފްތާ ތެރޭގައި އެމެރިކާގެ ރަޝިއާގެ ޖެޓުތަކެއް ހުއްޓުވި ދެވަނަ ފަހަރެވެ. މީގެ ކުރިން ވެސް އެމެރިކާއިން ވަނީ އެލަސްކާގެ ވައިގެ ސަރަހައްދު ކައިރިން ރަޝިއާގެ ޖެޓުތަކެއް ހިފަހައްޓާފަ އެވެ.

"ރަޝިއާގެ އަމަލުތައް ހުންނަ ގޮތަށް ވިސްނައި މިފަދަ ކަމަކަށް އެމެރިކާއިން އޮތީ ރަނގަޅަށް ތައްޔާރުވެގެން" ބަޔާނުގައި ބުނެފައިވެ އެވެ.

މި ޖެޓުތައް ހުއްޓުވާފައި މިވަނީ އެމެރިކާގެ ވައިގެ ސަރަހައްދުން ޖާސޫސީ އުޅަނދުތަކެއް ކަމަށް ބުނާ އުޅަނދުތަކެއް ފެނި އެ އުޅަނދުތައް ވެސް އެމެރިކާއިން ވައްޓާލާފައިވާ ދަނޑިވަޅެއްގަ އެވެ.

އެހެން ނަމަވެސް ރަޝިއާގެ ޖެޓުތަކަކީ އެމެރިކާގެ ވައިގެ ސަރަހައްދުން ފެނުނު ޖާސޫސީ އުޅަނދުތަކާ އެއްވެސް ގުޅުމެއް ހުރި އުޅަނދުތަކެއް ނޫން ކަމަށް ނޯރެޑުން ބުނެފައިވެ އެވެ. -- އަލް އަރަބިއްޔާ