ގާތްގަނޑަކަށް 38 ކްރޯޑް ރުޕީސްގެ އެޕާޓްމަންޓްތަކެއް ބޮލީވުޑް މަޝްހޫރު ބަތަލާ އާލިއާ ބަޓް ގަނެ، އެތަނުން ދެ އެޕާޓްމަންޓް އޭނާގެ ދައްތަ ޝާހީން ބަޓަށް ހަދިޔާ ކޮށްފި އެވެ.

ބޮލީވުޑް ހަބަރުތައް ގެނެސްދޭ މީޑިއާތަކުގައި ރިޕޯޓްކޮށްފައިވާ ގޮތުގައި އާލިއާ ގަނެފައި ވަނީ ތިން އެޕާޓްމަންޓެކެވެ. އެގޮތުން އެ އެޕާޓްމަންޓް ގަތުމަށް 37.80 ކްރޯޑް ރުޕީސް ވަނީ ހަރަދުކޮށްފަ އެވެ.

މީޑިއާ ރިޕޯޓްތައް ބުނާ ގޮތުގައި އާލިއާ ގަނެފައިވާ އެއް އެޕާޓްމަންޓް ހުންނަނީ މަޝްހޫރު ކަޕޫރު ބަންގްލޯއާ އެއް މަގެއްގަ އެވެ. އެ އެޕާޓްމަންޓްގެ ބޮޑުމިނަކީ 2،497 އަކަފޫޓެވެ. މި އެޕާޓްމަންޓް ރަޖިސްޓްރީކޮށްފައި ވަނީ އާލިއާގެ ޕްރޮޑަކްޝަން ހައުސް "އިޓާނަލް ސަންޝައިން ޕްރޮޑަކްޝަންސް"ގެ ނަމުގަ އެވެ.

މީގެ އިތުރުން އާލިއާ ވަނީ މުމްބާއިގެ ޖޫހޫ ސަރަހައްދުގައި ހުންނަ ގީގީ އެޕާޓުމަންޓުތަކުން ދެ ފްލެޓެއް އޭނާގެ ދައްތައަށް ހަދިޔާގެ ގޮތުގައި ގަނެދީފަ އެވެ. ޕާކިން ލޮޓަކާ އެކު ލިބުނު އެ ދެ ފްލެޓު އެއްކޮށްލައިގެން 2،086 އަކަ ފޫޓު ބޮޑުމިން ހުރެ އެވެ.

2012 ވަނަ އަހަރު ބޮލީވުޑަށް ތައާރަފުވި އާލިއާއަކީ މިހާރު ބޮލީވުޑްގައި ހުރި އެންމެ މަގުބޫލު އެއް ބަތަލާ އެވެ. މީގެ އިތުރުން އާލިއާ ވަރަށް ފަހުން ވަނީ ހޮލީވުޑް ފިލްމެއްގައި ވެސް މަސައްކަތް ކޮށްފަ އެވެ.

ކާމިޔާބު ފިލްމުތަކެއް ކުޅެފައިވާ އާލިއާ އެކްޓިންގެ އިތުރުން ވިޔަފާރީގައި ވެސް ހަރަކާތެރިވަމުން އަންނަ ފަންނާނެކެވެ. އޭނާ ވަނީ 2020 ވަނަ އަހަރު ކުޑަކުދިންނަށް ހާއްސަ، "އެޑް-އަ-މާމާ" ކިޔާ ކްލޯތިން ބްރޭންޑެއް ފަށައިފަ އެވެ. މި ކަންކަމުގެ އިތުރުން ވެސް ގިނަ އަދަދެއްގެ ވިޔަފާރިތަކަށް އާލިއާ ވަނީ އިންވެސްޓުކޮށްފައި ކަމަށް ރިޕޯޓުތައް ބުނެ އެވެ.

އާލިއާ ފިލްމަކުން އެންމެ ފަހުން ފެނިފައިވަނީ ރަންބީރާ އެކު "ބްރަމަސްތުރަ" އިންނެވެ. އާލިއާ އާއި ރަންވީރް ސިންގްގެ ލޯބީގެ ފިލްމު "ރޮކީ އޯރް ރާނީ ކީ ޕްރޭމް ކަހާނީ" 28 ޖުލައިގައި ސިނަމާގައި އަޅުވާނެ އެވެ.

އާލިއާ ހޮލީވުޑަށް ތައާރަފްވާ "ހާޓް އޮފް ސްޓޯން" ވެސް ކުރިއަށް އެބައޮތެވެ. އަދި އޭނާ އާއި ކެޓްރީނާ ކައިފް އަދި ޕްރިޔަންކާ ޗޯޕްރާ ޖޯނަސްގެ "ޖީ ލޭ ޒަރާ"ގެ ޝޫޓިން ފަށަން ތައްޔާރުވަމުން އަންނަ ކަމަށް ވެސް ހަބަރުތައް ބުނެ އެވެ.