އަދާލަތު ޕާޓީގެ ރިޔާސީ އިންތިޚާބު މިމަހުގެ 30 ވަނަ ދުވަހަށް ފަސްކޮށްފި އެވެ.

އެ ޕާޓީން ނެރެފައިވާ އިއުލާނެއްގައި ވަނީ އަދާލަތު ޕާޓީގެ ދުސްތޫރުގައިވާ ގޮތުގެ މަތިން ޕާޓީގެ ތިން ވަނަ ދައުރަށް ޕާޓީގެ ރައީސާއި ނައިބު ރައީސް ހޮވުމަށް ބާއްވާ އިންތިޚާބު 30 ޖެނުއަރީ ގައި ބޭއްވުމަށް ހަމަޖެހިފައިވާ ކަމަށެވެ. އަދި އަދާލަތު ޕާޓީގެ ދުސްތޫރުގެ 42.1 ވަނަ މާއްދާގެ ދަށުން ޕާޓީގެ ރައީސްގެ ކިބައިގައި ހުންނަންޖެހޭ ޝަރުތުތަކަށް، ޖެނުއަރީ 8، ވަނަ ދުވަހު ބޭއްވުނު މަޝްވަރާ މަޖިލީހުން ބަދަލު ގެނެސްފައިވާތީ، އިންތިޚާބަށް ކުރިމަތިލުމަށް ޖެނުއަރީ 1 ގައި ކޮށްފައިވާ ނަންބަރު އިއުލާން ބާތިލުކޮށް، އެ މަގާމަށް ކުރިމަތިލުމަށް އަލުން ހުޅުވައިލާފައިވާ ކަމަށެވެ.

އެގޮތުން ޕާޓީގެ ރިޔާސީ އިންތިޚާބުގައި ވާދަކުރުމަށް ބޭނުންވާ ފަރާތްތަކުން އެކަމަށް އެދޭ ފޯމާއި، ފޯމާއެކު ހުށައަޅަންޖެހޭ ލިޔެކިޔުން ޖަނަވަރީ 17 ވަނަ ދުވަހުގެ 2:00 ގެ ކުރިން އަދާލަތު ޕާޓީގެ މައި އޮފީހަށް ހުށައަޅަން ޖެހެ އެވެ.

ކުރިން އަދާލަތު ޕާޓީގެ ރިޔާސީ އިންތިޚާބު ބާއްވަން ނިންމާފައިވަނީ މިމަހުގެ 23ގަ އެވެ.

އަދާލަތު ޕާޓީގެ ރައީސް ކަމަށާއި ނައިބުރައީސް ކަމަށް ވެސް އަންހެނުންނަށް ކުރިމަތިލެވޭ ގޮތަށް އެ ޕާޓީގެ ދުސްތޫރު ނުވަތަ އަސާސީ ގަވާއިދު ނުވަތަ ދުސްތޫރު ވަނީ ބަދަލުކޮށްފަ އެވެ.

އެ ޕާޓީގެ ރައީސް އަދި މި ސަރުކާރުގެ ހޯމް މިނިސްޓަރު އިމްރާން އަބްދުﷲ ކުރައްވާފައިވާ ޓުވީޓެއްގައި ވިދާޅުވެފައި ވަނީ އަދާލަތު ޕާޓީގެ ރައީސްގެ ކިބައިގައި ހުރުން ލާޒިމް ކުރާ ޝަރުތުތަކުގެ ތެރޭގައި ފިރިހެނަކަށްވުން ހިމެނިފައި އޮތީ ދީނީ ގޮތުން ލާޒިމްކުރާ ކަމަކަށް ނުވިޔަސް ޕާޓީ އުފެދުނުއިރު ޕާޓީގެ މެމްބަރުން ބޭނުންވީ އެގޮތް ކަމަށް އޭރުގެ ޕާޓީގެ ލީޑަރޝިޕްގައި ތިއްބެވި ބޭފުޅުންނަށް ފެނިވަޑައިގަތުމުން ކަމަށެވެ. ނަމަވެސް މިވަގުތު ޕާޓީ ކުރިއަށް ގޮސްފައިވާ މިންވަރަށް ބަލައި ޕާޓީ އިތުރަށް ހުޅުވާލައި ޕާޓީގެ އެންމެ އިސް ސަފުގައި އަންހެނުންނަށް ހަރަކާތްތެރި ވުމަށް އޮތް ފުރުސަތު އިތުރަށް ފަހިކުރުމަށް ފެންނާތީ، އަދާލަތު ޕާޓީގެ ރައީސްގެ ކިބައިގައި ހުރުން ލާޒިމްކުރާ ޝަރުތުގެ ތެރެއިން ފިރިހެނަކަށްވުން އުނިކުރަން އިސްލާހު ހުށައެޅުއްވީ ކަމަށް އިމްރާން ވިދާޅުވި އެވެ.

އަދާލަތު ޕާޓީގެ މިހާރުގެ ރައީސްއަކީ ހޯމް މިނިސްޓަރުގެ މަޤާމުގައި ހުންނެވި އިމްރާން އެވެ. ނައިބު ރައީސަކީ ރައީސުލްޖުމްހޫރިއްޔާގެ އޮފީހުގެ ޗީފް އޮފް ސްޓާފް އަލީ ޒާހިރެވެ. އެބޭފުޅުން ސަރުކާރުގެ މަގާމުތަކުގައި ހިމެނިވަޑައިގަންނަވަނީ އަދާލަތު ޕާޓީއަށް ކޯލިޝަނުން ލިބޭ ސްލޮޓްގެ ތެރެއިންނެވެ.

އިލެކްޝަންސް ކޮމިޝަންގެ ތަފާސް ހިސާބުތައް ދައްކާގޮތުން މިދިޔަ ސެޕްޓެމްބަރު މަހުގެ ނިޔަލަށް ޢަދާލަތު ޕާޓީގައި ހިމެނޭ މެމްބަރުންގެ ޢަދަދަކީ 6،640 އެވެ.

އަދާލަތު ޕާޓީ އުފެދިގެން އައީ ރާއްޖޭގައި އިސްލާމީ ޝިޢާރު ފުޅާކޮށް އިސްލާމްދީން ޙިމާޔާތްކޮށް އަދި ދީނީ ކަންތައްތައް ވަރުގަދަ ކުރުމަށް ކަމަށްވިޔަސް ފަހަކަށް އައިސް އެޕާޓީ ދީނީ ކަންކަމުގައި މާބޮޑަށް ޙަރަކާތްތެރިވާތަނެއް ނުފެނެ އެވެ. އަދި މިސަރުކާރު ވެރިކަމާ ޙަވާލުވިފަހުން ކުރިމަތިވި އެމްޑީއެންއާއި އުތެމައިގެ މައްސަލައިގައިވެސް އެޕާޓީން ބަސް ނުބުނާތީ ވަރަށް ގިނަ ބައެއްގެ ފާޑު ކިޔުންތައް ވަނީ އަމާޒުވެފަ އެވެ.