މި އަހަރުގެ އަޟްހާ އީދުގައި މާލެ ސިޓީ ކައުންސިލުން އުޟްހިޔާ ކަތިލީ މާލޭގައި ދިރިއުޅޭ އެންމެހާ ރައްޔިތުންގެ ނަމުގައި ކަމަށް މާލެސިޓީގެ މޭޔަރު ޑރ. މުހައްމަދު މުއިއްޒު ވިދާޅުވެއްޖެ އެވެ.

އަޟްހާ އީދު ދުވަހު ކައުންސިލުން އުސްފަސްގަނޑުގައި ބޭއްވި އުޟްހިޔާ ކަތިލުމުގެ ހަފްލާގައި ވާހަކަފުޅު ދައްކަވަމުން މޭޔަރު މުއިއްޒު ވިދާޅުވީ އަޟްހާ އީދަކީ މުސްލިމުންނަށް އެންމެ މުގައްދަސް އެއް މުނާސަބަތު ކަމަށާއި، އެ ދުވަހު އެންމެ ހާއްސަވެގެން ދަނީ އުޟްހިޔާ ކަތިލުމަށް ކަމަށެވެ.

އެހެންކަމުން މާލެސިޓީ ކައުންސިލުން ގަސްތުކުރީ މާލޭގައި ދިރިއުޅުއްވާ އެންމެހާ ރައްޔިތުންގެ ނަމުގައި ކައުންސިލްގެ ފަރާތުން އުޟްހިޔާ ކަތިލަން ކަމަށާއި، އެކަން ކުރިއަށް ގެންދިޔައީ އެ ނިޔަތުގަ އެ މާތް މަޤްސަދުގައި ކަމަށް މޭޔަރު ވިދާޅުވި އެވެ.

"އަޟްހާ އީދަކީ މުސްލިމުންނަށް އެންމެ މުޤައްދަސް އެއް މުނާސަބަތު. އެ ދުވަހު އެންމެ ހާއްސަވެގެން ދަނީ އުޟްހިޔާ ކަތިލުމަށް. އެހެންވީމަ މާލެސިޓީ ކައުންސިލުން އަޅުގަނޑުމެން ގަސްތުކުރީ މާލޭގައި ދިރިއުޅުއްވާ އެންމެހާ ރައްޔިތުންގެ ނަމުގަ އަޅުގަނޑުމެން ކައުންސިލްގެ ފަރާތުން އުޟްހިޔާ ކަތިލަން،" މޭޔަރު މުއިއްޒު ވިދާޅުވި އެވެ.

މާލެސިޓީ ކައުންސިލުން އީދު ދުވަހު އީދު ނަމާދަށްފަހު އުސްފަސްގަނޑުގައި ބޭއްވި އުޟްހިޔާ ކަތިލުމުގެ ހަފްލާގައި ގިނަ ރައްޔިތުންތަކަކަށް ވަނީ އުޟްހިޔާ ހަދިޔާ ކޮށްފަ އެވެ.

އަޟްޙާ އީދަށް މާލެ ސިޓީކައުންސިލުން ގިނަ ޙަރަކާތްތަކެއް ހިންގާފައިވާއިރު އެ ހުރިހާ ޙަރަކާތެއްގައި މާލެސިޓީގެ މޭޔަރު ޑރ. މުހައްމަދު މުއިއްޒު ވަނީ އަމަލީގޮތުން ބައިވެރިވެ ވަޑައިގެން ރައްޔިތުންނާއި އެކު އީދުގެ އުފަލުގައި ބައިވެރިވެވަޑައިގަންނަވާފަ އެވެ.

މާލެސޓީ ކައުންސިލުން އަޟްޙާ އީދަށް ހައްސަކޮށް ހިންގި ހަރަކާތްތަކަށް އާންމުންގެ ބޮޑު ތަރުހީބެއް ވަނީ ލިބިފަ އެވެ. އަދި މާލެ އާއި ވިލިމާލެ ވަނީ ބޮކިތަކުން ދިއްލާލާފަ އެވެ.