ރާއްޖެ ވަރަށް ބޮޑަށް ދަރަނިވެފައި އޮއްވައި ރައީސުލްޖުމްހޫރިއްޔާ އާއި ރައީސުލްޖުމްހޫރިއްޔާގެ ނައިބާއި ރައްޔިތުންގެ މަޖިލިހުގެ މެމްބަރުން ހިމެނޭ ހެން ދައުލަތުގެ އިސް މަގާމުތަކުގެ މުސާރަތައް ބޮޑު ކުރަން މަޖިލިހުގެ މާލިއްޔަތު ކޮމިޓީން މިއަދު ފާސްކޮށްފި އެވެ.

މާލިއްޔަތު ކޮމިޓީން ވަނީ ރައީސް އާއި ނައިބު ރައީސް އާއި މަޖިލިހުގެ މެމްބަރުންގެ އިތުރުން މަޖިލިހުގެ ރައީސް އާއި ނައިބު ރައީސް އާއި ވަޒީރުންނާއި ފަނޑިޔާރުންނާއި މިނިވަން މުއައްސަސާތަކުގެ މެމްބަރުންނާއި މޭޔަރުންނާއި ކައުންސިލަރުންގެ މުސާރަތައް އަލުން ރިވިއުކޮށް، އެ މުސާރަތައް ބޮޑު ކުރުމަށް ނިންމައިފަ އެވެ. މި މަގާމުތަކަށް މުސާރަ ބޮޑުކުރަން އަންނަ އަހަރަށް ލަފާކޮށް މަޖިލިހުން ފާސް ކުރި ބަޖެޓުގައި ވެސް އޮތީ ހިމަނައިފަ އެވެ. ކޮމިޓީން މިގޮތަށް ނިންމީ މެމްބަރުންގެ އިއްތިފާގުންނެވެ.

ކޮމިޓީން ފާސް ކުރި ގޮތުން ނަމަ، މުސާރައިގެ އެންމެ ބޮޑު ކުރިއެރުމެއް ލިބޭ އެއް ބަޔަކީ މަޖިލިހުގެ މެމްބަރުންނެވެ.

މަޖިލިހުގެ ރައީސަކަށް މުސާރައިގެ ގޮތުގައި މިހާރު ލިބިވަޑައިގަންނަވަނީ 73،125ރ. އެވެ. އެކަމަކު، އަލަށް ގެންނަ ބަދަލުގެ ސަބަބުން މަޖިލިހުގެ ރައީސަކަށް މުސާރައިގެ ގޮތުގައި 90،000ރ. ލިބިވަޑައިގަންނަވަ އެވެ. މަޖިލިހުގެ ނައިބު ރައީސަށް މުސާރައިގެ ގޮތުގައި މިހާރު ލިބިވަޑައިގަންނަވަނީ 71،000ރ. އެވެ. އެކަމަކު، މިހާރު ގެނައި ބަދަލުން މަޖިލިހުގެ ނައިބު ރައީސަށް 88،000ރ. ލިބިވަޑައިގަންނަވަ އެވެ.

މަޖިލިހުގެ މެމްބަރަކަށް ކޮމިޓީ އެލަވަންސާއެކު ލިބިވަޑައިގަންނަވަނީ 82،500ރ. އެވެ. އެކަމަކު އަލަށް ގެންނަން އުޅޭ ބަދަލާ އެކުގައި މެމްބަރުންނަށް ކޮމިޓީ އެލަވަންސްއާ އެކުގައި 100،000ރ. ލިބިވަޑައިގަންނަވާނެ އެވެ.

މީގެއިތުރުން ރައީސުލްޖުމްހޫރިއްޔާ އަށް މުސާރައިގެ ގޮތުގައި 120،000ރ. އަދި ރައީސުލްޖުމްހޫރިއްޔާގެ ނައިބަކަށް މުސާރައިގެ ގޮތުގައި 93،000ރ. ހަމަޖައްސަން ކޮމިޓީން ވަނީ ފާސްކޮށްފަ އެވެ. މިނިސްޓަރުންނަށް ކަނޑައަޅާފައި ވަނީ 72،000ރ. އެވެ.

އުއްތަމަ ފަނޑިޔާރެއްގެ މުސާރަ 91،000ރ. އަށް ހަމަޖައްސަން ކޮމިޓީން ފާސް ކުރިއިރު، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އާއި ޕްރޮސެކިއުޓާ ޖެނެރަލް (ޕީޖީ) އާއި އޮޑިޓާ ޖެނެރަލްގެ މުސާރައިގެ ގޮތުގައި ކަނޑައަޅާފައި ވަނީ 74،000ރ. އެވެ.

ކޮމިޓީން ނިންމި ގޮތުން މޭޔަރެއްގެ މުސާރައިގެ ގޮތުގައި ހަމަޖައްސާފައި ވަނީ 46،000ރ. އެވެ. ޑެޕިއުޓީ މޭޔަރެއްގެ މުސާރައަކީ 40،500ރ. އެވެ. އޭގެ އިތުރުން ސިޓީ ކައުންސިލްގެ މޭޔަރުންނާއި އަތޮޅު ކައުންސިލްގެ ރައީސުންނާއި ނައިބު ރައީސުންނާއި ރަށު ކައުންސިލްގެ ރައީސުންނާއި ނައިބު ރައީސުންނާއި މެމްބަރުންގެ މުސާރަ ބޮޑު ކުރަން ވެސް ކޮމިޓީން ނިންމާފައިވެ އެވެ.

- ސިޓީ ކައުންސިލް މެންބަރުން 35،000ރ.

- އަތޮޅު ކައުންސިލް ރައީސް 33،000ރ.

- ރަށު ކައުންސިލް ރައީސް 25،500ރ.

- ރަށު ކައުންސިލް ނައިބުން 20،000ރ.

- ރަށު ކައުންސިލަރުން 18،000ރ.

ކޮމިޓީ ބައްދަލުވުމަށް މިކަން ހުށަހެޅުއްވީ އެ ކޮމިޓީގެ ނައިބު މުގައްރިރު ދާންދޫ ދާއިރާގެ މެންބަރު އަބްދުﷲ ޔައުގޫބް އެވެ. އެ ހުށަހެޅުންތަކަށް ތާއީދު ކުރެއްވީ، ހަނިމާދޫ ދާއިރާގެ މެންބަރު އަބްދުލްގަފޫރު މޫސާ އެވެ. އެ ހުށަހެޅުންތަކަށް ކޮމިޓީގެ އެއްވެސް މެންބަރަކު އިއުތިރާޒް ނުކުރެއްވުމުން، އެ މުސާރަތަކަށް ބަދަލު ގެެންނަން ކޮމިޓީން ފާސްވި ކަން ވަނީ އިއުލާންކޮށްފަ އެވެ.

ކޮމިޓީން މިގޮތަށް ނިންމި ނަމަވެސް ކޮމިޓީގެ ރިޕޯޓު މަޖިލިހުގެ ތަޅުމުން ފާސް ކުރަން ޖެހޭނެ އެވެ.

ދައުލަތުގެ ވަރަށް ގިނަ ވެރިންގެ މުސާރަތައް ބޮޑު ކުރަން ނިންމި އިރު، ރާއްޖެ އޮތީ ވަރަށް ބޮޑަށް ދަރަނިވެރިވެފަ އެވެ. އެގޮތުން މިހާރު ވެސް ރާއްޖޭގެ ދަރަނި 114 ބިލިއަން ރުފިޔާ އަށް އަރާފައިވާ އިރު، މި އަހަރު ނިމޭ އިރު އެ އަދަދު ބޮޑު ތަނުން އިތުރުވާނެ ކަމަށް ކަމާބެހޭ ފަރާތްތަކުން ވަނީ ލަފާކޮށްފަ އެވެ.